Recreación do transporte do viño | © Atlantis Comunicación

A Feira Franca revela un programa cheo de actividades de todo tipo que farán que Pontevedra viaxe no tempo até o medievo

28 Agosto 2024

A xornada inaugural vivirase o día 6 de setembro, namentres que o sábado, 7 de setembro, ducias de actividades e espectáculos tomarán as rúas e prazas do centro da cidade

Os días 6 e 7 de setembro a Boa Vila ten unha das súas citas máis especiais. A Feira Franca achégase e os seus preparativos déixanse sentir nas rúas e nas prazas a través de murallas que van medrando, castelos que se intúen e dragóns que van tomando os xardíns. A área de Festas do Concello de Pontevedra vén de publicar o programa definitivo desta edición para marcar en vermello as actividades que veciñanza e visitantes poderán gozar de balde durante a celebración da Feira.

Na práctica, o programa aposta por unha continuidade xa coñecida que vai desde o espectáculo inaugural na Praza da Verdura o venres ás 22.00 horas, até o clásico e lendario Torneo Medieval que se realiza na praza de touros, en dous pases diferentes (17.30 e 20.00 horas). Por suposto, estará aberto case desde primeira hora o Mercado Medieval, recrearase o transporte do viño polas rúas de Santa Clara, Sarmiento, Pasantaría, praza da Ferraría con remate na praza da Peregrina; e a música medieval tomará cada recuncho, ao tempo que a demostración de esgrima, os grupos de animación ou o tiro con arco se viven con normalidade.

Pola tardiña, os pasarrúas medievais animarán a xornada a través dos tambores e a percusión, encarando unha longa noite cunha Pontevedra que estará, previsiblemente, chea de xente. Cómpre lembrar que as crianzas terán espazos de seu, tanto en Raíña Vitoria, coma nos soportais da Pedreira e na mesma Praza do Concello.

O programa está dispoñíbel na web oficial do Concello de Pontevedra na web oficial da Feira Franca. Inclúe todas as actividades cadanseus horarios, ademais de contar cun mapa infográfico do centro histórico de Pontevedra e da distribución dos puntos de interese.

Está pasando!

lun16setConsultar17º Festival Internacional de Cinema de BueudO 6 AO 21 DE SETEMBRO DE 2024(Consultar: luns) Bueu

xov19set18:00Visita guiada á exposición 'A era das fábulas' en PontevedraA arte e o poder rexenerador da fantasía18:00 Pontevedra

xov19set20:30Concerto de Infermi d'amore en PontevedraSociedade Filarmónica de Pontevedra20:30 Pontevedra

ven20setConsultar8º Galician Freaky Film Festival en VigoFestival Internacional de Cinema Freak e Fantástico de Vigo(Consultar: venres)

VER MÁIS AXENDA