Presentación da XXV Subida á Escusa | Concello de Poio

A XXV Subida á Escusa reunirá a 75 pilotos en Poio, nunha edición histórica que acolle por primeira vez o Campionato Galego e a Copa de España de Montaña

10 Xuño 2025

  • Dispútase entre este venres, 13 de xuño, e o domingo, día 15.
  • Poñen en valor a coincidencia dos dous campionatos como “un atractivo engadido que sitúa a Poio no mapa do motor nacional”.

Poio converterase esta fin de semana no epicentro do motor en Galicia coa celebración da XXV Subida á Escusa, unha das probas máis emblemáticas do calendario autonómico, que nesta edición acada unha participación récord de 75 pilotos.

Trátase dun fito que consolida o crecemento desta cita, convertida xa nun referente tanto polos seus valores deportivos como polo apoio crecente da afección.

Nesta edición, a proba presenta unha novidade histórica: por primeira vez coinciden nela a celebración do Campionato Galego de Montaña e da Copa de España, sendo a única proba en Galicia que acolle esta última competición. Esta conxunción supón un importante recoñecemento ao prestixio da Subida á Escusa, que transcorre por un trazado de 3,3 quilómetros.

O alcalde de Poio, Ángel Moldes, e a presidenta da escudería e directora de carreira, Noemí Blas, presentaron esta mañá a proba, acompañados do delegado de Deportes da Xunta de Galicia, Manuel Benavides, e do presidente da Federación Galega de Automobilismo, Antonio Rodríguez Troitiño.

Moldes destacou que “é unha proba moi importante para o noso concello, con moito arraigo en toda a provincia e que contribúe de forma notable á dinamización económica do municipio”. Así, puxo en valor a coincidencia dos dous campionatos como “un atractivo engadido que sitúa a Poio no mapa do motor nacional”.

Desde a Xunta de Galicia, Daniel Benavides recoñeceu o “cariño especial” que lle ten a esta proba, “que é máis ca unha cita deportiva, é un sentimento arraigado nunha zona que dá nome á proba”, á que chegou da man do actual alcalde e da que dende entón se declara un apaixonado.

Pola súa banda, Antonio Rodríguez Troitiño, presidente da Federación Galega de Automobilismo, tamén estivo presente no acto e subliñou o bo momento que vive este deporte: “Estamos a ver un crecemento constante nos rallies de montaña, cun incremento ano tras ano de participación, como demostra esta edición da Subida á Escusa”.

O venres 13, a partir das 18.00 horas, comezarán as verificacións técnicas e administrativas opcionais, mentres que a competición desenvolverase o sábado 14 e o domingo 15.

A quenda de adestramentos do sábado comezará ás 15.00 horas, seguida de dúas mangas. O domingo os motores acenderanse ás 9.00 horas co mesmo formato, unha quenda de adestramento e, posteriormente, dúas mangas de competición.

Está pasando!

xov12xuñConsultar‘Vilagarcía, Cidade de Libro’Do 10 ao 15 de xuño de 2025(Consultar: xoves) Vilagarcía de Arousa

xov12xuñConsultarXLVI Festa do Viño de BarroDo 12 ao 15 de xuño de 2025(Consultar: xoves) Barro

xov12xuñConsultarFestival Sete Falares en PontevedraEncontro Internacional de Contadores de Historias(Consultar: xoves) Pontevedra

xov12xuñ19:00Proxección de ‘Bos tempos, marabillosos tempos’ e ‘Diálogo árabe-israelí’ en PontevedraCICLO ‘CINE, ARTE E GUERRA’19:00 Pontevedra

VER MÁIS AXENDA