Presentación da imaxe da XXIX Festa da Arribada | Concello de Baiona

Baiona presenta a imaxe da XXIX Festa da Arribada

31 Xaneiro 2025

Baiona desvela a imaxe da XXIX Festa da Arribada 2025, que se celebrará do 28 de febreiro ao 2 de marzo, nun acto en Sabarís ao que acudiron o Alcalde de Baiona, Jesús Vázquez Almuiña, Concelleiros e o deseñador e ilustrador da imaxe, David Sierra.

A imaxe destaca pola súa policromía, con cores vivas e rechamantes. A protagonista é a Carabela Pinta navegando cara a Baiona, representada pola Fortaleza de Monterreal, e rodeada de elementos festivos que dan a benvida á tripulación da Pinta ese primeiro de marzo de 1493.

Segundo palabras do Alcalde de Baiona “a imaxe promocional da festa recolle a importancia do feito histórico que conmemoramos, do mesmo xeito que fixeramos o ano pasado. A Festa da Arribada non é unha festa sen máis, é unha festa motivada por un gran contido histórico que fala dun feito que cambiou o rumbo da humanidade e que puxo ao noso municipio nos mapas da historia.

A protagonista é sen dúbida a Carabela pero no cartel vemos detalles que nos lembran a Baiona con elementos mariñeiros ou a ilustración da Fortaleza, pero que tamén falan do ambiente festivo que puido haber, hai 532 anos, ante a chegada de noticias novas dunha expedición sen precedentes e que, sen dúbida, ese ambiente festivo é o que teremos na próxima edición da Arribada”.

A Concelleira de Turismo, Sheila González, destaca “o gran traballo levado a cabo polo deseñador que recolleu as premisas do departamento de turismo nas que o protagonista da imaxe tiña que ser o feito histórico da arribada da Carabela Pinta a Baiona. Ademais, é un cartel cheo de detalles como, por exemplo, a constelación que representa a travesía de volta e que é a que aparece no azulexo da arribada,e os elementos que aparecen ao redor, detalles ilustrados que celebran a chegada da carabela e mostran o carácter festivo da Arribada.

A policromía do cartel pretende evocarnos esa época histórica e recréanse escenas cun estilo que pretende lembrar aos antigos códices ilustrados pero renovado para traelo ao momento actual no que se celebra a festa.

Tamén nos gustou o detalle semicircular que rodea á carabela que nos evoca a esa imaxe icónica de Baiona que é a réplica da Carabela Pinta vista desde os arcos da Ribeira, e que tanto chama a atención aos nosos visitantes.

Con isto, continuamos coa campaña promocional que se está levando a cabo para atraer visitantes a Baiona durante a Festa da Arribada e que complementa a xa posta en marcha en redes sociais, a través do vídeo promocional, que tanto éxito esta suscitando e que xa notamos nas solicitudes de información recibidas na Oficina de Turismo desde diversos puntos de España e Portugal e que, esperamos, véxanse traducidas nunha maior afluencia de turistas á Festa da Arribada, que amplíen a súa estancia en Baiona pero, sobre todo, que coñezan este feito histórico tan importante e á vez bastante descoñecido entre os nosos turistas e ao que dedicamos esforzos durante todo o ano para que, todo aquel que nos visite coñézao e fale diso.”

SOLICITUDES PARA PARTICIPAR NO REAL MERCADO MEDIEVAL DA ARRIBADA 2025

Ata o luns 10 de febreiro estará aberto o prazo de inscricións para participar no Real Mercado Medieval da Arribada 2025.

Todas aquelas persoas, entidades e colectivos que o desexen poderán solicitar posto de venda no Real Mercado Medieval que este ano cumpre a súa XXIX edición e na que se conmemora o 532 Aniversario da Arribada.

Pódense descargar tanto as Bases Reguladoras como a Solicitude (Anexo I e II) na páxina web baiona.gal e no taboleiro de anuncios do Concello de Baiona.

Así mesmo, para dúbidas e aclaracións habilitarase un correo electrónico [email protected] e un teléfono de consultas 699 199 400 de luns a venres en horario de mañá.

Está pasando!

ven31xanConsultarFestas de San Brais 2025 en SalcedoDo 26 de xaneiro ao 3 de febreiro de 2025(Consultar: venres) Pontevedra

ven31xanConsultarXXIII Certame da Camelia en Soutomaior31 de xaneiro, 1 e 2 de febreiro de 2025(Consultar: venres) Soutomaior

ven31xan18:00Visitas guiadas 'É tempo de xogar' en PontevedraColección de Juan Manuel Alfaya Ocampo18:00 Pontevedra

ven31xanConsultarNoites Abertas 2025 en Pontevedraampla oferta de ocio alternativo, participativo e inclusivo(Consultar: venres) Pontevedra

VER MÁIS AXENDA