Alcarrás (Carla Simón, 2022, España) | © Cineclube Pontevedra

‘Cinema e Estrelas’ volve levar os mellores filmes en versión orixinal á praza da Pedreira

5 Xullo 2023

A praza da Pedreira acollerá durante a vindeira semana o ciclo de cinema ao aire libre ‘Cinema e Estrelas’, unha cita xa habitual co mellor cinema en versión orixinal subtitulada, que forma parte da programación das festas de verán do Concello de Pontevedra.

Todas as películas comezarán ás 23:00 horas e proxectaranse en versión orixinal subtitulada en castelán.

Martes 11 | 23 h | PRAZA DA PEDREIRA

‘TODO Á VEZ EN TODAS PARTES’

Daniel Kwan e Daniel Scheinert, 2022, EE UU, 139 min., VOSE

Cando unha ruptura interdimensional altera a realidade, Evelyn (Michelle Yeoh), unha inmigrante chinesa nos EE UU que ten problemas coa declaración da renda, vese envolta nunha salvaxe aventura na que só ela pode salvar o mundo. Perdida nos infindos mundos do multiverso, esta heroína inesperada debe canalizar os seus novos poderes para loitar contra os estraños e desconcertantes perigos do multiverso mentres o destino do mundo pende dun fío.

Daniel Kwan e Daniel Scheinert son os artífices desta divertidísima e ecléctica aventura de ciencia ficción que arrasou nos Oscar 2023, onde gañou sete galardóns, incluíndo Mellor Filme, Mellor Dirección e Mellor Guión Orixinal.

Mércores 12 | 23 h | PRAZA DA PEDREIRA

‘ALCARRÁS’

Carla Simón, 2022, España, 120 min., VOSE

En ‘Alcarrás’, unha pequena localidade rural de Lleida, a vida da familia Solé xira arredor do cultivo de pexegueiros, fonte do seu sustento ao longo de xeracións. Logo de oitenta anos cultivando a mesma terra, un parque de paneis solares acelera o cambio de ciclo e a familia reúnese para realizar a súa última colleita.

Interpretada por actores non profesionais e recoñecida co Oso de Ouro no Festival de Berlín 2022, Alcarràs é a confirmación do gran talento da directora de Verano, 1993.

Xoves 13 | 23 h | PRAZA DA PEDREIRA

‘DECISION TO LEAVE’

Park Chan-wook, 2022, Corea do Sur, 138 min., VOSE

Hae-Joon, un veterano detective, investiga a sospeitosa morte dun home no cume dunha montaña. De seguida comezará a sospeitar de Sore, a muller do defunto, mentres a atracción que sente por ela o desestabilizará.

Un noir elegante e visualmente exquisito que lle serviu a Park Chan-Wook (Oldboy, A doncela) para alzarse en Cannes o premio á Mellor Dirección.

Venres 14 | 23 h | PRAZA DA PEDREIRA

‘O TRIÁNGULO DA TRISTEZA’

Ruben Östlund, 2022, Suecia, 147, VOSE

Logo da Semana da Moda, Carl e Yaya, unha parella de modelos e influencers, son convidados a un cruceiro de luxo. Mentres a tripulación lles brinda todas as atencións aos exclusivos pasaxeiros, o capitán négase a saír da súa cabina. Os acontecementos toman un xiro inesperado cando unha treboada pon en perigo o confort dos pasaxeiros e muda as antigas xerarquías.

Entre a comedia irreverente e a análise sociolóxica, O triángulo da tristeza é a segunda Palma de Ouro que gaña Ruben Östlund en Cannes, logo de conseguila en 2017 con The Square.

Sábado 15 | 23 h | PRAZA DA PEDREIRA

‘JOHNNY GUITAR’

(Nicholas Ray, 1954, EE UU, 110 min., VOSE)

*Proxección en 35 mm

Vienna (Joan Crawford) é propietaria dun salón de xogos situado nos arrabaldos dunha cidade do Oeste e unha das mulleres máis poderosas da zona. Os celos obsesionan a Emma, antiga rival, que ha facer todo o posible por detela. Mais Vienna contará coa axuda dun vello amor, Johnny Guitar, un antigo pistoleiro reconvertido en músico.

Cun orzamento de serie B, Nicholas Ray fixo de Johnny Guitar un dos westerns máis icónicos da historia do cinema. Esta última sesión proxectarase en copia de 35 mm.

Evento tipo

Localización do Evento

ven22nov09:00XIII Encontro de Conservación e Restauración en PontevedraA madeira, soporte de bens culturais09:00 Pontevedra

ven22nov17:30ven18:30'A galiña dos ovos de conto', con Pedras de Papel en Pontevedraapego no outono 202417:30 - 18:30 Pontevedra

ven22nov20:00Concerto de Abraham Cupeiro en Vilagarcía'resoando no pasado'20:00 Vilagarcía de Arousa

sáb23nov10:00Andaina solidaria do Rotary Club de Pontevedraaxuda aos damnificados pola DANA10:00 Lago de Castiñeiras

VER MÁIS AXENDA

‘Cinema e Estrelas’ volve levar os mellores filmes en versión orixinal á praza da Pedreira

zoompontevedra