Presentación da Lérez Up 2023 | © Concello de Pontevedra

Cultura Friki e videoxogos únense na segunda edición da Lérez Up en Pontevedra

16 Agosto 2023

O evento, organizado pola asociación Gaming Troop e o Concello de Pontevedra, celebrarase o 26 e 27 de agosto no Recinto Feiral

O pasado verán a Lérez Up reuniu a máis de 3500 persoas na súa primeira edición no Recinto Feiral de Pontevedra, enchéndose de apaixonados da cultura xaponesa, dos videoxogos, do manga e do anime. Este punto de encontro volverá contar coa presenza de diferentes asociacións que ofrecerán un abanico de actividades para todos os gustos: torneos, xogos de mesa, cosplay, karaoke, xogos indie, graffiti, manualidades e máis.

O alcalde, Miguel Anxo Fernández Lores, acompañado da edil de Novas tecnoloxías, Anabel Gulías, e as voceiras da asociación pontevedresa Gaming Troop (colectivo organizador do evento), Rocío Fernández e Sonia Piñeiro, presentou deste o local da agrupación esta nova edición, que se celebrará os días 25 e 26 de agosto no interior do Recinto Feiral.

«Estamos encantados de volver celebrar a Lérez Up en Pontevedra e só podo manifestar o meu agradecemento e orgullo de que en Pontevedra teñamos un grupo de xente que sexa quen de poñer en marcha citas como esta», explicou o rexedor. «Partimos do éxito espectacular do ano pasado, unha edición que visite e na que quedei abraiado de ver tanta xente moza (e non tan moza), non só de Pontevedra, senón de toda a comarca e que quedaran encantados».

Lores subliñou o atractivo do que goza esta actividade, lembrando que desde o Concello sempre se promocionará e se traballará a prol de xerar novas sinerxías entre os diferentes sectores económicos e sociais da cidade.

Nesta segunda edición, os fans dos videoxogos voltarán loitar en torneos como o do League of Legends ou Valorant, que xa levan unhas semanas na súa fase previa en liña. Non pode faltar o torneo estatal de Smash Bros. Ultimate, que conta nestes momentos con 100 xogadores inscritos procedentes de toda España e Portugal.

Aproveitando o éxito que tivo na primeira edición, este 2023 manterase a zona de consolas e ordenadores para xogo libre. Os asistentes poderán probar e retarse entre eles coa ampla variedade de videoxogos como o Teamfight Tactics, Tekken 7, Switch Sports, Mario Strikers, ou o novo Street Fighter 6, entre outros, que contarán con torneos de pequenas dimensións.

Para os afeccionados ó cosplay, repetirase o exitoso concurso onde se premiará á mellor caracterización dunha personaxe, valorando a súa actuación, vestimenta e representación. Ademais, o xurado impartirá charlas sobre o mundo do cosplay con consellos e técnicas para iniciarse a este ámbito.

Así mesmo, o evento terá máis de 60 postos formados por pequenos creadores locais e de tódalas partes do país que exporán a súa obra e traballo para os máis fanáticos do arte, da ilustración e a artesanía. A Lérez Up bateu un récord de demandas nesta edición, duplicando a capacidade dispoñible en tan só dez minutos desde a súa apertura.

Como non podería ser doutra maneira, repetirase a zona de descanso con varios foodtrucks de cociñas locais no interior do Recinto Feiral.

Neste ano destacan as novas zonas para dar unha experiencia máis completa ós asistentes: un salón de actos onde terá lugar o clásico concurso de cosplay así coma dúas actuacións musicais; unha zona indie máis completa onde se promocionarán ata 9 videoxogos creados por estudios independentes que veñen compartir o seu traballo; unha zona exclusiva para talleres e a ampliación doutras xa existentes.

Na programación resaltan a cantidade de charlas, que se centrarán no desenvolvemento de videoxogos, a autoedición, modelaxe e patronaxe, ou a xestión do proceso creativo. Nomes como Paula Cheshire, Victor Develops, Luzbel ou AngryYuna compartirán as súas experiencias co público, fomentando un entretemento máis didáctico.

A Lérez Up pretende, unha vez máis, destacar que a mestura de entretemento, vocacións e cultura alternativa é máis que necesaria. A maiores o Salón resáltase como un centro de interese para todas as idades nos que promover os valores comunitarios e de identidade, podendo así gozar duns intereses comúns e, finalmente, converténdose nun referente do catálogo de festas anuais da provincia de Pontevedra.

Está pasando!

lun25novConsultarConmemoración do 25N en RibadumiaDía Internacional da Eliminación da Violencia Contra a Muller(Consultar: luns) Ribadumia

lun25nov11:30Inauguración dunha intervención artística en Pontevedra‘Son muller, son Diana’,11:30 Pontevedra

lun25nov19:00Proxección de 'A Foreign Song' en PontevedraCINECLUBE PONTEVEDRA19:00 Pontevedra

mar26nov20:30Proxección de 'A Calumnia' en PontevedraCINECLUBE PONTEVEDRA20:30 Pontevedra

VER MÁIS AXENDA