Culturgal expándese co público como gran protagonista
17 Novembro 2023
Leilía, Bernardo Atxaga, Yolanda Castaño, Kiko da Silva, María Lado ou Jaione Camborda son algúns dos nomes que se atoparán co público da Feira
O salón de actos do Pazo da Cultura de Pontevedra acolleu onte a presentación da 16ª edición de Culturgal, que terá lugar do 1 ao 3 de decembro. Ao acto asistiron Víctor López, presidente de Culturgal; Natividad González, deputada de Cultura da Deputación da Coruña; Jacobo Sutil, director de Agadic; Marta Fernández Tapias, vicepresidenta da Deputación de Pontevedra; Demetrio Gómez, concelleiro de Cultura do Concello de Pontevedra; e Camilo Franco, director de Culturgal.
Segundo comentou Víctor López, “a palabra que define esta edición de Culturgal é medrar”, servindo de escaparate para pór en contacto as culturas galegas cos públicos que xa están e “cos que teñen que vir”. Natividad González destacou o papel da Feira para “dar a coñecer as propostas de máis actualidade do mundo da cultura”, que tamén supón unha oportunidade para a Deputación da Coruña para dar a coñecer as iniciativas desenvolvidas pola institución cos públicos, que son “os auténticos protagonistas”.
Pola súa banda, Jacobo Sutil puxo o énfase tamén nese labor de Culturgal de facer unha panorámica das producións do ano anterior e “anunciar moitos dos proxectos que van ter lugar no futuro”, destacando como o evento pon en valor “a todos aqueles que traballan día a día para poñelos en marcha”. Na mesma liña, Marta Fernández-Tapias insistiu na relevancia da Feira ao “amosar o músculo deste sector traballador, innovador e dinámico”, considerando fundamental a presenza da Deputación de Pontevedra nel porque “a través da cultura tamén se fai provincia”.
Demetrio Gómez declarou ter o “convencemento de que a nosa cultura é quen de chegar a todos os públicos sempre que a apoiemos con todas as nosas forzas” e confirmou que desde o Concello de Pontevedra están “encantados de acoller ano tras ano o principal escaparate da cultura galega”. Por último, Camilo Franco compartiu a súa visión na mudanza de propósito de Culturgal, “que non sexa tanto un resumo do que pasou o ano anterior como un avance do que vai acontecer o ano seguinte, para que o público o vexa”.
Nesta edición Culturgal pasa a denominarse Feira das Culturas Galegas, cunha vontade de recoller o carácter plural do sistema e da oferta cultural do país. Igualmente, a Feira asume o desafío de pór en relación aos públicos con esta realidade diversa. “As culturas precisan públicos e Culturgal quere loitar por el”, sintetizou Camilo Franco. Con esta filosofía, a programación xeral aglutina máis de 100 actividades nas que o espazo do Pazo da Cultura adquire unha importancia maior, ás que cómpre sumar máis doutra centena de propostas organizadas polas entidades expositoras.
O director repasou algunhas das novidades de Culturgal para esta edición. A Feira das Culturas Galegas contará en 2023 con cinco escenarios: Literatura, Música, Escénicas, Infantil e Arte. Por eles veremos desfilar propostas do máis variado (recitais, avances, proxeccións, obradoiros, presentacións, concertos…) que inclúen nomes como Leilía, Bernardo Atxaga, Paula Carballeira, Yolanda Castaño, Jaione Camborda, Leilía ou a Orquestra Galega de Liberación.
Da poesía aos videoxogos
A poesía e o cómic serán dúas das disciplinas ás que Culturgal quere dedicar un gran peso. Dentro da primeira, os diversos recitais que o público poderá atopar no recinto reunirán voces como as de Helena de Carlos, Yolanda Castaño, María Lado, Oriana Méndez, Marga Tojo, Samuel L. París ou Dores Tembrás. Pola súa parte, o ciclo Ilustrando traerá ao Pazo da Cultura para debuxar en vivo cunha tableta gráfica a un amplo abano de profesionais da banda deseñada galega, como Kiko da Silva, Fran Bueno, María Bren, Edi García, Miguel Robledo ou Laura Romero.
A Feira das Culturas Galegas terá oco para as propostas que saen dos marcos con xéneros mestizos. Neste senso, presentarase o podcast de terror 13 Avisos. Historias para escoitar á noite, dirixido por Paula Carballeira, e haberá ocasión de presenciar o encontro das poéticas de Iria Piñeiro e Mónica de Nut en Kennebec. No recinto tamén haberá unha área de videoxogos con competicións de producións galegas e unha exposición dedicada a repasar a historia do videoxogo en Galicia.
O que vén
En Culturgal o público poderá achegarse ás producións que chegarán en 2024 á pantalla e aos escenarios. Proxectaranse avances de seis obras cinematográficas que se estrearán o ano que vén, ademais das exhibicións doutros filmes como Honeymoon, O Corno ou Matria. O Centro Coreográfico Galego e o Centro Dramático Galego presentarán a súa programación para o vindeiro ano, que no caso deste último inclúe a celebración do seu 40º aniversario.
As galerías e institucións artísticas que participan este ano no Espazo Arte representan modos de traballo novidosos e de relacións entre a arte e a sociedade existentes no contexto galego, mais tamén con certa vontade de transcendelos. Desde cadansúa ollada particular, estes proxectos realizarán un programa de actividades que incluirán performance, intervencións e obradoiros con diferentes artistas do país. Entre os postos atoparanse, por exempo, Solaina, Solaina (Lugo), Patio de Luz (Santiago de Compostela) ou La Doce (Boiro).
Un evento familiar
Culturgal continúa a ser un espazo de referencia para asistir en familia. A programación desta décimo 16ª edición mantén a relevancia das actividades para público infantil durante todas as xornadas con teatro, cinema, animación, obradoiros ou lecturas dramatizadas. Ademais, haberá un espazo de coidado de crianzas para que poidan xogar e divertirse conxuntamente.
Culturgal Expandido
Culturgal conta por primeira vez con dúas sedes. Baixo a denominación de Culturgal Expandido, os días 23 e 24 de novembro a Feira espallarase á Sede da Deputación de Pontevedra en Vigo. Esta ampliación anticipa unha liña de traballo que continuará en futuras edicións, nunha procura tanto de novos públicos como de axeitarse ao mapa do país, segundo tamén destacou Víctor López. O Culturgal Expandido é posible grazas ao apoio da Deputación de Pontevedra.
Entradas máis baratas
As entradas de Culturgal poden mercarse xa a través da web a un prezo reducido. A Feira custa de maneira xenérica un 25% menos, pois a entrada simple pasa de 4 a 3 euros. Como consecuencia, os bonos tamén baixan nunha proporción similar. Este descenso responde á vontade de Culturgal de favorecer a asistencia e participación de todos os públicos. En billeteira o prezo será máis elevado.
