De Ítaca a Cangas, unha semana para descubrir o mellor cine internacional e as promesas galegas

12 Setembro 2024

  • Desde curtametraxes ata documentais, a XIX Semana de Cine ofrece unha viaxe cinéfila imperdible
  • ‘Viaxe a Ítaca’, presenta películas e historias que exploran culturas, tradicións e vidas en constante transformación

O Cineclub Cangas, promovido pola Asociación Cívico-Cultural Xiria, volve a sorprender coa súa XIX Semana de Cine, que este ano ten como lema ‘Viaxe a Ítaca, unha viaxe de ida e (poida que) volta ás illas persoais’. Unha cita anual consolidada na axenda cultural das Rías Baixas, que ofrece unha selección coidada de cinema internacional, galego e familiar, acompañada de encontros especiais con cineastas.

Esta décimo novena edición celebrarase do 4 ao 11 de outubro de 2024 no Auditorio Municipal de Cangas. As proxeccións terán lugar cada día ás 21:00 horas, con excepción das sesións especiais para escolas e familias, que se realizarán pola mañá e pola tarde.

‘As Neves’ (Sonia Méndez, España, 2024)

Programación

A Semana de Cine arrincará o venres 4 de outubro ás 21:00 horas, coa proxección de ‘As Neves’, coa presenza da actriz Andrea Varela, quen compartirá cos espectadores os desafíos e experiencias vividas durante a rodaxe deste filme.

O sábado, 5 de outubro, haberá dobre sesión. Ás 18:00 horas, proxectarase ‘Sirocco e o Reino dos Ventos’, unha película de animación francesa dirixida por Benoît Chieux e galardoada co Premio do Público no Festival de Annecy, ideal para un público familiar. Máis tarde, ás 21:00 horas, será a quenda de ‘O mal non existe’, do director xaponés Ryûsuke Hamaguchi. Este filme, recoñecido co Gran Premio do Xurado en Venecia e premiado como mellor película no BFI London Film Festival, promete unha profunda reflexión sobre o impacto ecolóxico e social nunha pequena comunidade rural.

‘Fogos artificiais (Stranizza d’amuri)’ (Beppe Fiorello, Italia, 2023)

A programación continúa o domingo, 6 de outubro, ás 21:00 horas, coa proxección de ‘Fogos artificiais (Stranizza d’amuri)’, unha emocionante historia de amor ambientada na Sicilia do verán de 1982. Esta película, dirixida por Beppe Fiorello, foi nomeada aos Premios David di Donatello.

O luns, 7 de outubro, ás 21:00 horas, os espectadores poderán mergullarse na cultura e tradicións de Bután coa película ‘O monxe e o rifle’. Esta produción, que mestura reflexión política e humor, sitúase nun momento clave de transición cara á democracia no reino de Bután, e examina as tensións entre o modernismo e as tradicións.

O martes, 8 de outubro, estará dedicado ás curtametraxes galegas baixo o título ‘Galicia en Curta’. Ás 21:00 horas, comezará a proxección de ‘O niño dos paxaros’, ‘Habitar’, ‘To bird or not to bird’, ‘Non te vexo’ e ‘Nena’. Esta tradicional sección do Cinemas Ocultos amosa cada ano a forza creativa e o talento emerxente do cinema galego.

‘Dunia e o eco do tambor’ (Marya Zarif, André Kadi, Francia- Canadá, 2023)

O mércores, 9 de outubro, as actividades estarán centradas nas escolas, co programa ‘Escolas ao Cine’. Proxectarase ‘Dunia e o eco do tambor’, un filme canadense dirixido por Marya Zarif e André Kadi. Con pases ás 10:00 e ás 12:00 horas, esta película narra a historia de Dunia, unha nena que, tras fuxir de Siria, atopa en Canadá unha nova vida marcada pola multiculturalidade e a amizade.

O xoves, 10 de outubro, ás 21:00 horas, será a quenda de ‘Luzzu’, filme maltés que aborda os desafíos dun mariñeiro que loita por manter viva a tradición pesqueira familiar nun ecosistema precario. Dirixida por Alex Camilleri, esta película gañou o Premio do Xurado no Festival de Sundance e foi recoñecida nos Premios Independent Spirit.

A décimo novena edición desta semana de cine pecharase o venres, 11 de outubro, ás 21:00 horas, coa proxección do documental galego ‘Chichi e máis eu’. O filme, dirixido por Nico Campos, explora a vida de Xesús Chichi Campos, pioneiro do cómic galego e unha figura clave pero esquecida na cultura galega. A proxección irá seguida dun coloquio co director, proporcionando unha oportunidade única para reflexionar sobre a vida e legado do artista.

A XIX Semana de Cine ‘Viaxe a Ítaca’ promete ser unha viaxe cinematográfica a través de distintas realidades, cunha programación diversa que invita á reflexión e ao descubrimento cultural.

Cineclub Cangas, cine universal nas Rías Baixas

O Cineclub Cangas, cunha traxectoria que comezou en 1978, mantén viva a chama do cinema en Cangas, superando desafíos ao longo das décadas. Hoxe, grazas á mellora das condicións técnicas e a un equipo renovado, o Cineclub está comprometido en promover o cinema galego, con especial atención ás curtametraxes e ao cine infantil, ademais de facilitar encontros entre o público e os creadores.

Esta XIX Semana de Cine é unha oportunidade para seguir gozando de cinema de calidade, nun espazo de reflexión sobre as nosas propias “illas persoais”, como suxire o título deste ano. O equipo do Cineclub Cangas convida a todas as persoas a unirse nesta experiencia cinematográfica compartida.

Está pasando!

xov21nov09:00XIII Encontro de Conservación e Restauración en PontevedraA madeira, soporte de bens culturais09:00 Pontevedra

xov21novConsultarConmemoración do 25N en RibadumiaDía Internacional da Eliminación da Violencia Contra a Muller(Consultar: xoves) Ribadumia

xov21nov18:30Proxección de 'Amanece que no es poco' en Pontevedraciclo de proxeccións dos premios feroz 202518:30 Pontevedra

xov21nov20:00‘Conversas do primeiro andar’ no Mercado de PontevedraMúsica, libros e viño no Gastroespazo do Mercado 20:00 Pontevedra

VER MÁIS AXENDA