Este xoves 22 chega ao Principal dentro de Ponteatro o espectáculo ‘Unha inimiga do pobo’ de Talía Teatro, finalista en 9 apartados dos María Casares
21 Febreiro 2024
- Dentro da programación, o público poderá gozar tamén de ‘O auto do Castromil’, de Producións Teatrais Excéntricas o 21 de marzo que opta a 5 premios
- Na pasada edición do ciclo, contou co espectáculo ‘Hamelin’ de Redrum Teatro, outro dos grandes favoritos con 6 candidaturas e con 2, ‘Vox Populi’ de Malasombra
- ‘As alumnas’ que terá lugar o vindeiro martes 27 de febreiro foi gañadora doutros galardóns coma o Premio Nacional de Literatura Dramática, o Premio Follas Novas 2023 á mellor obra de teatro e o Luisa Villalta a proxectos pola igualdade
- Entradas dispoñibles en Ataquilla.com a un prezo de 8 e 4 euros + gastos e de non esgotarse, unha hora antes de cada pase
Varias das pezas teatrais programadas no ciclo Ponteatro do Concello de Pontevedra atópanse entre as candidatas aos Premios de Teatro María Casares, que, convocados pola Asociación de Actores e Actrices de Galicia (AAAG) celebra a súa XXVIII edición.
A nova, comunicada hoxe, non fai máis que reafirmar a calidade da selección dos espectáculos da que o concelleiro de Cultura Demetrio Gómez facía gala na presentación da edición actual o pasado 19 de xaneiro: “presentamos unha nova edición do ciclo Ponteatro que achegará á vila 6 espectáculos do mellor do panorama galego entre o 8 de febreiro e o 18 de abril. Tentamos que ademáis de ser espectáculos de grandes compañías, sexan pezas que conviden á reflexión e ao compromiso social”, afirmaba.
Algunhas como ‘Hamelín’ de Redrum ou ‘Vox Populi’ de Malasombra, formaron parte da programación 2023 pero o público aínda está a tempo de gozar dunha das favoritas con 9 candidaturas ‘Unha inimiga do pobo’ de Talía Teatro que chegará mañá xoves ás 21h. ao Principal. A candidata a 5 categorías, ‘O auto do Castromil’ de Producións Teatrais Excéntricas terá lugar tamén no Principal o 21 de marzo.
Dende a organización afirman estar “moi contentos coa resposta do público á programación en xeral e a este ciclo en concreto. Xa no seu lanzamento esgotou os 50 abonos iniciais en apenas 3 días e tivemmos que ampliar ata 90, a venda de entradas neste formato. Actualmente para o pase de mañá de Talía Teatro xa quedan apenas 5 entradas no patio de butacas. (Aínda hai localidades no anfiteatro). Da galardoada ‘As alumnas’, que virá o martes que vén ao Principal, xa quedan tamén moi poucas entradas para a tarde e o pase matinal con escolares tivo unha boísima acollida”.
As entradas a o prezo habitual de 8 euros (4 euros para estudantes, desempregados/as e maiores de 65 anos) están á venda en Ataquilla.com e de non esgotarse, cada espectáculo contará unha hora antes con venda na billeteira do Teatro Principal.
A programación do ciclo PONTEATRO 2024 é a seguinte:
XOVES 8 FEBREIRO | 20.00 | PAZO DA CULTURA
‘Iribarne’ de Butaca Zero
Iribarne é unha investigación escénica sobre unha desas figuras absolutamente imprescindibles do noso pasado recente. Un intento (irreverente) por comprender como chegamos até aquí da man dun político que, nas súas propias palabras, dicía as verdades sen condón. Pero ollo: por máis que o poida parecer, isto NON é un biopic sobre Manuel Fraga. Teríanos encantado facelo… pero non collía nunha soa obra!
- Texto orixinal: Esther F. Carrodeguas
- Dirección: Xabier Castiñeira
- Elenco: Mónica García, Xurxo Cortázar, Anxo Outumuro, Lidia Veiga, Jorge de Arcos e Esther F. Carrodeguas
- Duración: 180´ (Haberá un descanso de 15´)
XOVES 22 FEBREIRO | 21.00 | TEATRO PRINCIPAL
‘Unha inimiga do pobo’ de Talía Teatro
Helena é unha prestixiosa doutora que regresa á vila natal para comezar de novo. Embarazada de sete meses, afronta o seu estado coa ilusión posta nun novo proxecto profesional: o balneario que ela mesma deseñou e que se presenta como un alternativa turística sostible e saudable para a súa vila. A inesperada contaminación das augas da zona e a súa loita por preservar a saúde da poboación fronte aos intereses económicos van colocala no punto de mira da veciñanza, que ve como se pon en risco a prosperidade da comunidade.
- Texto orixinal: Henrik Ibsen
- Dirección: Tito Asorey
- Elenco: Marta Lado Dani Trillo, María Ordóñez, Toño Casais, Rubén Prieto, Marta Ríos, Diego Rey, Xurxo Barcala e Artur Trillo
- Duración: 90´
MARTES 27 FEBREIRO | 21.00 | TEATRO PRINCIPAL
‘As Alumnas’ de Culturactiva
A educación, peza fundamental no desenvolvemento e na liberdade das persoas -especialmente das mulleres- centra esta obra. As dúas personaxes representan casos concretos de mulleres na época anterior e posterior á Guerra Civil, así como as transformacións sociais do momento. A peza achégase á figura da pedagoga galega María Barbeito, e visibiliza como o franquismo significou un enorme retroceso na educación do Estado.
- Texto orixinal: Paula Carballeira
- Premio Nacional de Literatura Dramática 2023
- Premio Follas Novas 2023 á mellor obra de teatro
- Premio Luisa Villalta a proxectos pola igualdade
- Dirección: Fina Calleja
- Elenco: Anabell Gago e Mónica Camaño
- Duración: 75´
XOVES 21 MARZO | 21.00 | TEATRO PRINCIPAL
‘O auto do Castromil’ de Producións Teatrais Excéntricas
Unha viaxe onírica abordo dun coche de liña. Os viaxeiros dormen e talvez o conductor. As maletas e demais bagaxes amotínanse, cobran vida e repasan unha curiosa historia de Galiza, na que aparece un pobo que loita, é derrotado, volve levantar a cabeza e rebélase de novo. O auto de Castromil é unha viaxe chea de humor e espíritu antroidesco en transporte público pola Galiza inconsciente. Está feita con anacos das obras de Manuel María: “A rebelión dos baús”, “O Auto dos semulados da Caravilla”, “Unha vez foi o trebón”, “Abril de Lume e Ferro” e o “Entremés da OTAN”.
- Espectáculo gañador do III Concurso de proxectos que convoca a Fundación Manuel María
- Dirección e dramaturxia: Quico Cadaval
- Elenco: Rocío González, Víctor Mosqueira, Marcos Orsi e Patricia Vázquez
- Duración: 70´
XOVES 11 ABRIL | 21.00 | TEATRO PRINCIPAL
‘Helen Keller, a muller marabilla?’ de Grupo Chévere
Todo comeza ao descubrir unha muller, totalmente descoñecida para o grupo, chamada Helen Keller, que se convirte nunha celebridade ao ser a primeira persoa xordocega en obter un título universitario (1904). Pero ao investigar vanse descubrindo outras facetas desconcertantes da súa figura que son sistematicamente ocultadas. E o máis sorpredente, nos últimos anos espállase polas redes sociais unha campaña que afirma que Helen Keller é un fake, incluíndo unha petición para eliminala da historia…
- Idea orixinal: Chusa Pérez
- Dirección e dramaturxia: Xron
- Elenco: Ángela Ibáñez, Patricia de Lorenzo e Chusa Pérez
- Duración: 80´
- Espectáculo en lingua de signos (LSE) e lingua falada (galego) con textos proxectados en galego
XOVES 18 ABRIL | 21.00 | TEATRO PRINCIPAL
‘Brokeback Sabucedo (paixón entre bestas)’ de Sal do Teatro
Roi e Rafa son dous antigos amigos da infancia que se atopan na Rapa das Bestas en Sabucedo logo de moitos anos. De pequenos eran moi amigos pero foron distanciándose polas circunstancias da vida. Roi marchou vivir a Madrid e Rafa segue a vivir na vila. No seu encontro en Sabucedo xorden outro tipo de sentimentos que estaban ocultos, e dunha amizade comeza a xurdir unha paixón. Brokeback Sabucedo é un canto á diversidade, unha homenaxe a tradición galega e unha crítica á enerxía eólica.
- Texto: Santiago Telmo e Carlos Losada
- Dirección: Rocío Romero
- Elenco: Borja Salgado e Santiago Telmo
- Duración: 65´
