Proxección de 'Mulheres do Meu País' en Vigo

xov27nov18:00Proxección de 'Mulheres do Meu País' en Vigociclo 'Mulleres (d)e Abril. Activistas: cinema por mulleres'18:00 Auditorio do Parque Nacional das Illas Atlánticas de Galicia (Edificio Cambón) - Vigo

Detalles do Evento

O edificio Cambón de Vigo acolle o xoves 27 de novembro, ás 18:00 horas, unha nova sesión do II Ciclo de Cine ‘Mulleres (d)e Abril. Activistas: cinema por mulleres‘, coa proxección de ‘Mulheres do Meu País‘ (Raquel Freire, 2019) e debate posterior moderado por Toya Prudêncio, muller xitana e activista pola igualdade e o recoiñecemento da cultura xitana que participou neste filme visibilizando as mulleres da súa comunidade.

Este documental entretece catorce historias cruzadas, superpostas, contrastadas e postas en diálogo. Son catorce testemuñas de vida, de resistencia e de dignidade que nos conmoven, nos interpelan, que ás veces nos arrincan unha gargallada e noutras nos obrigan a presenciar as escenas sen dar un chío.

En cada muller, unha historia na que se entrelazan múltiples formas de opresión; en cada suxeito, una singularidade que é tamén síntese de diversas determinismos sociais.

No seu conxunto, constrúe un retrato do país, das súas estruturas e desigualdades, mais tamén da intelixencia, da coraxe, da emancipación e da loita pola felicidade.

Ciclo de cine ‘Mulleres (d)e Abril. Activistas: cinema por mulleres’

Durante os meses de outubro e novembro, terá lugar no Auditorio do Parque Nacional das Illas Atlánticas de Galicia o II Ciclo de cine “Mulleres (d)e Abril”, organizado pola I Cátedra Internacional José Saramago, BiFeGa/Feminario e Abella Producións, con apoios do Grupo de Investigación BiFeGa, o Instituto Camões e o Instituto de Literatura Comparada Margarida Losa.

A entrada é balde, non é necesaria reserva previa.

A programación do Ciclo de Cine ‘Mulleres (d)e Abril. Activistas: cinema por mulleres’ é a seguinte:

16 DE OUTUBRO (con Xisela Franco)

’12 de maio de 1937′ (Mar Caldas, 2025)

‘As Pioneiras do Cinema em Língua Portuguesa’ (Luísa Sequeira, 2023)

‘Margarita Ledo, parolar cun eu’ (Xisela Franco, 2021)

23 DE OUTUBRO (con Margarita Ledo Andión)

‘Nación’ (Margarita Ledo Andión, 2020)

30 DE OUTUBRO (con María Platas Alonso)

‘Chisholm ’72: Unbought and Unbossed’ (Shola Lynch, 2004)

6 DE NOVEMBRO (con Ana Cristina Pereira)

‘Sambizanga’ (Sarah Maldoror, 1972)

20 DE NOVEMBRO (con Egídia Souto)

‘Cesária Évora’ (Ana Sofia Fonseca, 2022)

27 DE NOVEMBRO (con Toya Prudêncio)

‘Mulheres do Meu País’ (Raquel Freire, 2019)

4 DE DECEMBRO (con Sara Tabuyo)

‘RBG’ (Betsy West & Julie Cohen, 2018)

11 DE DECEMBRO (con Lúcia Liberato Evangelista)

‘Baronesa (Juliana Antunes, 2017)