Novos Cinemas reafirma un ano máis o seu compromiso coa formación cinematográfica

21 Novembro 2024

  • O #LAB selecciona catro proxectos procedentes de Arxentina, Portugal, España e Galicia
  • ENCONTROS e AULA completan a actividade formativa
  • O festival reforza as sinerxías internacionais coa sección CARTA BLANCA e a colaboración de Porto/Post/Doc

O Festival Internacional de Cinema de Pontevedra, Novos Cinemas, reafirma un ano máis o seu compromiso coa formación cinematográfica con seis días de actividades que servirán de impulso creativo para cineastas emerxentes, dende os laboratorios de primeira longametraxe, aos encontros cos profesionais do audiovisual e aos talleres adaptados a distintos públicos con directores como Álvaro Gago.

Catro proxectos de primeira longametraxe foron seleccionados por Novos Cinemas para participar no seu laboratorio de desenvolvemento, #LAB. Este laboratorio está dirixido pola cineasta Isona Admetlla, socióloga e xestora cultural con ampla experiencia como docente, consultora e deseñadora de audiencias. Xunto a Isona Admetlla haberá un equipo de mentores de ámbito internacional composto por Lorena Morin, directora do MECAS (Mercado Internacional del Cine Casi Hecho), o director e produtor Lukas Valente e a distribuidora María Vera, que orientarán os equipos seleccionados ao longo do proceso.

Os proxectos seleccionados son: ‘Un dios me ha robado el rostro’, do español Franco Figueroa (Arxentina); ‘Me llamo Erik Satie, como todo el mundo’, de Joanna Carro (Portugal); ‘Feísmo’, de Lorena Iglesias (Galicia); e ‘Púa’, de María Gisèle Royo e Julia de Castro (España).

A sección ENCONTROS contará coa participación de dous cineastas galegos, Adrián Canoura e Ángel Santos, que compartirán imaxes inéditas das súas longametraxes; con Pedro Miguel Alves, da Escola das Artes – Universidade Católica Portuguesa (Porto), que exporá as liñas mestras do programa académico nun dos centros de formación máis relevantes de Portugal; e co fotógrafo e realizador buenense Amador Lorenzo, quen presentará o seu proxecto de investigación fotográfica e audiovisual recompilado no libro Nacenza. A oferta complétase cunha mesa redonda sobre estratexias de promoción para o cinema de autor e emerxente coa presenza de María Yáñez, María Vera e Lorena Morín.

A sección AULA do festival reforza o intercambio de coñecemento entre profesionais do audiovisual e a cidadanía mediante talleres adaptados a diferentes públicos que promoven a aprendizaxe e a participación activa. Destacan o taller do director Álvaro Gago, en colaboración coa Universidade de Vigo; outro impartido por Jamie Weiss, centrado na produción audiovisual e desenvolvido en colaboración coa ECAM (Escola de Cinematografía e do Audiovisual da Comunidade de Madrid); e un taller infantil sobre a planificación dun filme a través da creación dun storyboard en AULA + NOVOS.

CARTA BLANCA e colaboración co Porto/Post/Doc

O festival complementa a súa oferta formativa con dúas iniciativas que achegan novos puntos de vista e reforzan as alianzas internacionais: a CARTA BLANCA e a colaboración co Porto/Post/Doc. A CARTA BLANCA é unha sección na que se convida a outro festival a programar unha sesión especial. O elixido nesta edición é Daniel Martins Maciel, do MDOC – Melgaço International Documentary Film Festival.

Pola súa parte, a presenza de Porto/Post/Doc evidencia e amplifica as conexións de Novos Cinemas co cinema e os festivais lusos. Esta colaboración, que abre unha vía cara a unha hermandade co festival portuense, terá lugar no marco da sección Working Class Heroes, unha singular iniciativa que promove a produción cinematográfica centrada na historia obreira da cidade de Porto mentres facilita a emerxencia de novas voces e incide no valor social e ideolóxico do cinema. A sesión será presentada presentada por Sérgio Gomes, director executivo de Porto/Pos/Doc.

O festival Novos Cinemas, organizado pola Asociación Cultural Novos Cinemas e Matriuska Producciones, conta co apoio e financiamento do Concello de Pontevedra, a Xunta de Galicia a través da Axencia Galega das Industrias Culturais (Agadic), a Deputación de Pontevedra, a Universidade de Vigo e o ICAA.

Está pasando!

xov21nov09:00XIII Encontro de Conservación e Restauración en PontevedraA madeira, soporte de bens culturais09:00 Pontevedra

xov21novConsultarConmemoración do 25N en RibadumiaDía Internacional da Eliminación da Violencia Contra a Muller(Consultar: xoves) Ribadumia

xov21nov18:30Proxección de 'Amanece que no es poco' en Pontevedraciclo de proxeccións dos premios feroz 202518:30 Pontevedra

xov21nov20:00‘Conversas do primeiro andar’ no Mercado de PontevedraMúsica, libros e viño no Gastroespazo do Mercado 20:00 Pontevedra

VER MÁIS AXENDA