O Local de Música de Pontevedra volve adaptar a súa oferta de formación e mentorización á situación sanitaria

3 Febreiro 2021

O Local de Música, o proxecto formativo e de mentorización para mozos e mozas de Pontevedra, presenta para o exercicio 2021 un programa de nove accións, que inclúen a adaptación virtual para os períodos de restricións derivados da situación sanitaria.

Neste momento o Local de Música ten implementados os adecuados protocolos de seguridade para a asistencia ao centro para cando as condicións sexan seguras, máis xa ten un traballo realizado para avanzar cara unha realidade onde a vida dixital se integre coa presencial e se desenvolva con normalidade. Así, mentres se manteñan as actuais restricións, as actividades realizaranse en liña e o horario de atención será de luns a venres de 10:00 a 14:00h e de 16:00 a 20:00h.

As actividades programadas inclúen a realización dun informe sobre o estado da música en Pontevedra, os programas Local Online (v2), MusicLAB e LP3, o Congreso Z, o Proxecto Europa, Proxecto Youtube, Proxecto Twich e o Proxecto Spotify.

Informe do estado da música en Pontevedra

Iniciarase unha ronda de entrevistas con diferentes axentes da industria musical da cidade para analizar a situación actual e as posibles saídas para o escenario post-covid. Estas entrevistas retransmitiranse na nova canle de Twich do Local, extraeranse partes das entrevistas para xerar contidos estables na canle de Youtube e elaborarase un informe coas principais ideas e conclusións.

Local Online (v2)

Continuando coa estratexia deseñada no confinamento de 2020, establécese un programa de comunicación e participación en redes sociais con diferentes iniciativas:

  • Calendly. Sistema de citas virtuais cos profesionais do local, que xa se poden reservar directamente desde o espazo privado de usuarias do Local de Música.
  • Aula Virtual (v2). Estase a traballar na mellora da experiencia de uso (UX) da plataforma. Incorporaranse novos cursos e traballarase na difusión da mesma.
  • Historia da música. Continuarase coa colaboración cos grupos de música de Pontevedra para a difusión das diferentes bandas que xurdiron na cidade. Así mesmo, ofertarase contido multimedia sobre artistas que son parte da historia da música.
  • Concurso. Buscarase un novo desafío como o creado “Imos Buscar Ao Mellor Grupo Da Historia De Pontevedra”, no que participaron centos de persoas na anterior edición.

LP3

O proxecto de profesionalización do Local vencellado a un itinerario formativo (LP1 e LP2) executarase no primeiro semestre do ano. LP3 consiste na mentorización (en liña) de grupos de música de Pontevedra para axudarlles a trazar unha estratexia de mercado. O obxectivo é sacar adiante un traballo de gravación que lles facilite a entrada ao mercado. Constará de tres momentos: o plan de preproducción, formación (con contidos da aula virtual e sesións síncronas) e a gravación de temas propios. Para complementar o proceso, e tamén na liña de profesionalización, incorporarase a un alumno (de Pontevedra) en prácticas da Escola de Audiovisuais de Vigo para facer labores de apoio na produción técnica das gravacións.

Congreso Z

A nova xeración que está a usar o local naceu despois do 2005: a chamada “xeración Z”. Para escoitalos e comprender o seu punto de vista sobre como ven o mundo, deseñarase un “congreso” virtual que se retransmitirá en directo desde Twitch e onde se convidará a xente moza a falar sobre diferentes temas. Esta iniciativa conectarase coas diferentes accións que se desenvolven desde o Departamento de Xuventude.

Proxecto Europa

No proxecto do Local de Música establecíase a posibilidade de iniciar un intercambio con salas de concertos de Portugal. Ante a imposibilidade de coñecer a viabilidade desta iniciativa a curto prazo, transformarase o proxecto nunhas xornadas de difusión sobre os diferentes programas da Unión Europea dirixidos á xente moza (destacando i- Portunus).

Proxecto Youtube

A iniciativa de avanzar na comunicación e interacción co Local de Música fixo que se traballara intensamente na creación de contidos dixitais non efémeros. Nesta fase, seguirase a crear contidos de calidade para alimentar esta plataforma e continuar coa construción das narrativas dixitais do Local.

Proxecto Twitch

A que está a ser a gran revolución das redes sociais para a xente moza, onde se fan retransmisións en directo, será a plataforma na que máis se centrará o Local de Música. Desde Twitch faranse os directos e retansmisións en streaming e buscarase a implicación activa de xente moza para a realización desta iniciativa.

Proxecto Spotify

Como xa se avanzou no Nadal, no novo canal de Spotify seguirase convidando a diferentes persoas de Pontevedra a crear listas de reproducción coas súas seleccións. Esta iniciativa pretende dar visibilidade aos diferentes proxectos e axentes clave da cidade conectados coa música e tender liñas de diálogo e colaboración.

MusicLAB

Tal e como estaba previsto no proxecto, continúase coas propostas referidas ao uso da tecnoloxía na música. Neste proxecto achéganse novas ideas e propostas para o uso de solucións tecnolóxicas para os grupos de música desde diferentes planos (ferramentas de xestión, de edición, música electrónica, etc.).

Está pasando!

sáb23nov10:00Andaina solidaria do Rotary Club de Pontevedraaxuda aos damnificados pola DANA10:00 Lago de Castiñeiras

sáb23nov10:30Ruta guiada 'Mulleres na Historia de Moaña'Descubre Moaña no Outono 202410:30 Moaña

sáb23nov11:30Visita ao mural ‘O río da vida’ da UNED Pontevedra Fundación Manuel Moldes e Concello de Pontevedra11:30 Pontevedra

sáb23nov18:00‘Conversas do primeiro andar’ no Mercado de PontevedraMúsica, libros e viño no Gastroespazo do Mercado 18:00 Pontevedra

VER MÁIS AXENDA