O curso ‘Tirando do Fío’ fará un percorrido pola historia da indumentaria a través da arte desde o antigo Exipto á Revolución francesa

24 Xaneiro 2024

Carolina Munáiz impartirá este curso no Museo de Pontevedra, que se pon en marcha o 31 de xaneiro e se desenvolverá todos os mércores ata o 17 de abril

O Museo de Pontevedra organiza un curso sobre a historia da indumentaria a través da arte, desde o antigo Exipto á Revolución francesa. ‘Tirando do Fío’ será impartido por Carolina Munáiz, que dedicará cada sesión a un momento histórico diferente, percorrendo así o antigo Exipto, Grecia, Roma, Bizancio, a Idade Media, o Renacemento e o Barroco ata desembocar na Revolución francesa.

O curso celebrarase os mércores desde o 31 de xaneiro ao 17 de abril, de 19:00 a 20:30 horas no Edificio Castelao. O 14 de febreiro (Mércores de Cinza) e o 27 de marzo (Semana Santa) non haberá curso.

O acceso é libre. Aquelas persoas que queiran obter un certificado de asistencia, deberán inscribirse previamente en reservas.museo@depo.gal e asistir como mínimo ao 70% das sesións.

A profesora, Carolina Munáiz, explica que “o curso aborda unha aproximación aos cambios históricos substanciais e o seu reflexo nas siluetas, pezas e complementos icónicos de cada período cultural”, deténdose en aspectos como “a simboloxía cromática do téxtil, o influente ámbito militar no traxe civil, a convivencia e separación de criterio masculino e feminino, o percorrido das artificiosas pezas interiores ou a propaganda de poder da casa de Austria e da Coroa francesa”.

As primeiras catro sesións do curso aproximaranse ás antigas civilizacións mediterráneas: a cultura téxtil do antigo Exipto, a adecuación das pezas na Grecia clásica e a consecuente expresión de poder mediante a aparencia en Roma e en Bizancio. Nas xornadas dedicadas á Idade Media expoñerase a relevancia que cobra o traxe como expoñente social nas monarquías medievais e como, cara ao século XIII, se aprecia un punto de inflexión: a desmaterialización das pezas e, por conseguinte, a revelación do corpo. O gusto ascendente pola verticalidade terá connotacións na esvelta silueta propia do gótico pleno.

O curso afondará despois na indumentaria no Renacemento, con valores máis terreais, na que prima a liña horizontal á par dun espírito materialista que se traducirá en ostentación e luxo na clase podente. No Barroco, a teatralidade e a extraversión serán aliadas da imaxe en tempos de absolutismos, aínda cando a corte española conseguía manter fama de carismática austeridade. En rumbo contrario á paulatina depuración da silueta do home, os valores preciosistas e de artificio asumidos pola elite feminina europea vivirán o seu esplendor no Versalles do XVIII, mais serán abruptamente rexeitados tras a sobrevinda Revolución francesa.

Carolina Munáiz é docente na Escola Superior de Deseño de Moda Formarte da Coruña, titulada en Ilustración pola EASD Pablo Picasso e con formación de primeiro ciclo da Escola de Cantería de Pontevedra. É profesora das materias de Historia da Indumentaria e de Historia da Arte e da Moda do Século XX. Compaxina o labor docente coa súa traxectoria como pintora.

Programa completo:

  • 31 de xaneiro. O antigo Exipto
  • 7 de febreiro. Da Grecia prehelénica á Grecia clásica
  • 21 de febreiro. Indumentaria do imperio: Roma
  • 28 de febreiro. O luxo bizantino e o medievo europeo
  • 6 de marzo. O traxe na Baixa Idade Media
  • 13 de marzo. Do Gótico internacional ao Renacemento
  • 20 de marzo. O boato renacentista
  • 3 de abril. A cultura do Barroco
  • 10 de abril. A moda rococó
  • 17 de abril. Desenlace revolucionario
Está pasando!

dom24nov09:00Andainas Saudables da Eurocidade Tui-ValençaDo 7 de abril ao 15 de decembro de 202409:00 Eurocidade Tui-Valença

dom24novConsultarConmemoración do 25N en RibadumiaDía Internacional da Eliminación da Violencia Contra a Muller(Consultar: domingo) Ribadumia

dom24nov10:30II Medio Maratón Concello de VilagacíaCampionato Xunta de Galicia de Medio MAratón 202410:30 Vilagarcía de Arousa

dom24nov20:00'Non pasarán' de Ártika Cía en VigoV Festival 'Comediártiko'20:00 Vigo

VER MÁIS AXENDA