‘Tarzán, o musical’ | © Coda TM

O musical ‘Tarzán’ regresa a Vilagarcía da man da escola de música e danza Coda

9 Xaneiro 2024

  • Despois do éxito rexistrado na súa estrea durante as festas de San Roque, os vilagarciáns terán unha nova oportunidade para gozar do musical ‘Tarzán’ da man da escola de música e danza Coda
  • O vistoso e emocionante espectáculo dirixido ao público familiar represéntase o sábado 27 de xaneiro no Auditorio a partir das 18.00 horas
  • As entradas xa se poden adquirir ao prezo único de 17 euros a través de Ataquilla.com. De non esgotarse antes, tamén se porán á venta na billeteira do Auditorio o día da función dende dúas horas antes do inicio

Unha banda composta por 8 músicos e un coro de máis de 20 voces interpretarán en rigoroso directo os temas pop e étnicos que fían un espectáculo en cuxo elenco sobresaen os roles dos simios, encarnados en artistas expertos nos movementos destes animais e que complementan a súa actuación con acrobacias, animal flow e capoeira.

A maiores da calidade musical, interpretativa e da posta en escena, o traballo de Coda destaca por ser a primeira tradución e adaptación ao galego da famosa novela de ficción de E. Rice Burroughs ‘Tarzán dos monos’, centrada na personaxe do neno orfo criado por gorilas na xungla.

A versión de Coda, cos seus logrados números musicais, consegue transmitir toda a épica, a emoción e o dinamismo da obra orixinal, con mensaxes como a necesidade de pertenza e aceptación, a familia, o amor e a amizade. Ademais, cos coidados decorados e o vistoso vestiario, o espectáculo transporta ao público ás profundidades da xungla. O ‘Tarzán’ de Coda representa unha excelente oportunidade para gozar en familia dunha experiencia inesquecible e conmovedora.

SINOPSE

Tras o naufraxio dunha embarcación nas costas de África Occidental, unha familia de gorilas adopta ao único supervivinte: un neno orfo ao que os simios deciden chamar Tarzán. O neno medrará loitando pola aceptación do seu pai simio e polo intento constante de ser un mono máis e adaptarse a pesar das diferenzas.

Pasado o tempo, unha expedición humana que penetra na xungla para cazar gorilas, atópase con Tarzán, descubrindo por primeira vez unha criatura coma el. No grupo viaxa Jane, unha moza inglesa da que Tarzán se namora. A defensa da súa manada de gorilas e o amor a Jane espertan no protagonista sentimentos enfrontados ao chocar a súa educación animal cos seus instintos humanos.

Entradas anticipadas á venda dende 17 euros en Ataquilla.com e, de non esgotarse, na billeteira do Auditorio dende 2 horas antes do inicio da función.

Está pasando!

dom24nov09:00Andainas Saudables da Eurocidade Tui-ValençaDo 7 de abril ao 15 de decembro de 202409:00 Eurocidade Tui-Valença

dom24novConsultarConmemoración do 25N en RibadumiaDía Internacional da Eliminación da Violencia Contra a Muller(Consultar: domingo) Ribadumia

dom24nov10:30II Medio Maratón Concello de VilagacíaCampionato Xunta de Galicia de Medio MAratón 202410:30 Vilagarcía de Arousa

dom24nov20:00'Non pasarán' de Ártika Cía en VigoV Festival 'Comediártiko'20:00 Vigo

VER MÁIS AXENDA