Presentación da XLI Semana Galega de Filosofía | Concello de Pontevedra

A Semana Galega de Filosofía regresa a Pontevedra para denunciar o nihilismo actual da sociedade ao longo da súa XLI edición

3 Abril 2025

A Aula Castelao destaca que a Semana Galega de Filosofía é un congreso aberto e popular, que tenta sacar a filosofía á rúa, facela accesíbel e dialogante

Pontevedra será de novo epicentro de reflexión, pensamento e crítica a través da XLI Semana Galega de Filosofía. Unha nova edición dunha das citas culturais máis lonxevas da cidade, terá lugar na Boa Vila entre o 21 e o 25 de abril, baixo a epígrafe de ‘Filosofía e Nihilismo’.

O alcalde, Miguel Anxo Fernández Lores, presentou o primeiro adianto do programa que conformará esta cuadraséxima primeira edición, organizada pola Aula Castelao, e cuxo presidente e secretaria, Alexandre Cendón e Eva Mouriño, estiveron tamén presentes.

«Este ano estará adicada á filosofía e o nihilismo», sinalou o rexedor. «Realmente só quero darlle ás grazas á Aula Castelao por levar tantos anos poñendo a Pontevedra no mapa da filosofía mundial, pois este é un encontro internacional, cunha altísima calidade e relevancia dentro do eido académico, mais tamén no eido popular».

Lores lembrou que durante esta semana, Pontevedra convértese nun foro referente dentro da filosofía, xa non só a nivel galego, senón a nivel estatal, europeo ou mundial. «Coido que un encontro presencial sempre terá algo que as conferencias en liña non poden ofrecer, esa posibilidade de ser unha cita máis enriquecedora e participativa. Temos a sorte de ser escenario desta Semana Galega da Filosofía mañá, tarde e noite».

Desde a Aula Castelao, lémbrase e destácase o seu compromiso coa defensa do ensino da filosofía e do seu status académico, mais non concordamos en que fóra dese ámbito institucional esta non teña cabida.

«É posíbel e necesario sacar a filosofía das aulas á rúa, facela accesíbel, partillala e sometela a discusión pública, mais tamén é preciso facer o camiño inverso, aprender filosofía nas corredoiras e nas prazas, e traducir esta a unha linguaxe con aspiracións universais. Pretendemos estabelecer un diálogo entre o pensamento do pobo e a investigación académica, tronzando as burbullas nas que se adoita recluír ambos os dous ámbitos. Concordamos con quen considera que as ideas deben baixar de cando en vez do seu mundo para pasar pola experiencia da vida do pobo, antes de elevarse novamente na súa busca de universalidade», indican.

Alexandre Cendón agradeceulle un ano máis a colaboración ao Concello de Pontevedra á hora de facer posible este evento. «Son xa varias décadas, e é algo importante a subliñar. É raro que estes eventos duren tanto. É algo que sempre lles sorprende aos filósofos e filósofas de todo o mundo cando veñen», comentou. «É unha cita singular e distinta. É un congreso de filosofía aberto a toda a cidadanía, un evento popular».

«Este ano, a través da temática xa revelada, queremos afondar, constatar e denunciar ese estado de ánimo social e individual de falta de valores, de desesperanza e de falta de horizonte, mesmo de desacougo, e que está instalado nunha boa parte das persoas», sinalou o presidente da Aula Castelao. «Facémolo co ánimo de denuncialo e combatelo. Non queremos este nihilismo, esta falta de sentido. Fáltanos a verdade».

A asistencia a XLI Semana Galega de Filosofía é aberta e a matrícula é de balde. O prazo de matriculación estará aberto até o domingo 20 de abril no seguinte enlace.

Como en anos anteriores a asistencia á SGF poderá ser certificada como formación do profesorado (20 horas).

O programa, que contará coa participación de 15 relatores e relatoras é o seguinte:

NIHILISMO E FILOSOFÍA | Mañás, de 10:30 a 13:30 h.

  • Luns 21: Néstor Kohan. Profesor da Universidad de Buenos Aires (UBA). ‘Nihilismo, metafísicas «post» e dialéctica histórica’.
  • Martes 22: Luís G. Soto. Profesor de Filosofía Moral na USC. ‘Senda/Mar/Eira: Teo-, Me-, e De- ontoloxía’.
  • Mércores 23: José María Hernández Losada. Profesor de Filosofía Política na UNED. ‘Tecno-imperialismos: a nova carreira polo mundo’.
  • Xoves 24: Márcia Tiburi. Escritora e pensadora brasileira. ‘Ridículo Político’.
  • Venres 25: Laura Llevadot i Pascual. Profesora da Universidade de Barcelona (UB). ‘Contribución a unha teoría non depresiva da depresión. Desexo e melancolía no capitalismo neoliberal’.

GALIZA E NIHILISMO | Tardes, de 17:00 a 19:00 h.

  • Luns 21. Brais González Arribas. Profesor de Filosofía na Universidade de Vigo. ‘Do entoar: unha ontoecoloxía relacional e nihilista’.
  • Martes 22. Sami Ashour Ashour. Presidente da Comunidade Palestina en Galicia. ‘Gaza Palestina: Valor da solidariedade’.
  • Mércores 23. Mª Pilar García Negro. Profesora honoraria da UDC e escritora. ‘O valor da lingua galega: evidencias e necesidades’.
  • Xoves 24. Marta Dacosta. Poeta e profesora. ‘Berrar, berrar ben alto’.
  • Venres 25. Daniela Ferrández Pérez. Profesora e escritora. ‘Unha proposta teórica sobre o trans no pasado e no presente’.

TEMPOS DE NIHILISMO. Noites, de 20:00 a 22:00 h.

  • Luns 21. Laura Martín López-Andrade. Psiquiatra e investigadora. ‘Contradicións en torno á saúde mental’.
  • Martes 22. Leo Espluga. Filósofo. Do Ecce Homo ao Ecce Corpus. ‘Do discurso á linguaxe’
  • Mércores 23. Ayme Román. Filósofa e comunicadora en redes. ‘Se Deus morreu, hai que resucitalo. A deriva reaccionaria diante da incerteza’.
  • Xoves 24. Nuria Romo Avilés. Antropóloga. ‘Medicalización do malestar, uso e abuso de hipnosedantes’.
  • Venres 25. Paulina Chiziane. Escritora moçambicana. ‘Lección de clausura: O que hoje é moderno, amanhã pode ser tradicional’.
Está pasando!

ven04abrConsultarII Poio Mostra - Feira Multisectorial e do Automóbil4, 5 e 6 de abril de 2025(Consultar: venres) Poio

ven04abrConsultarII Ruta Pinchoterra en Salvaterra de Miñotodos os xoves e venres de abril(Consultar: venres) Salvaterra de Miño

ven04abrConsultarXXXVII Festa da Ostra de Arcade4, 5 E 6 DE ABRIL DE 2025(Consultar: venres) Soutomaior

ven04abrConsultarXXVI Salón do Libro Infantil e Xuvenil de Pontevedrado 21 de marzo ao 6 de abril de 2025(Consultar: venres) Pontevedra

VER MÁIS AXENDA