Presentación do ‘Invernia Fest’ | Concello de Pontevedra

Chega a Pontevedra o ‘Invernia Fest’, un novo evento musical de rock e pop con grupos como La Fuga, Sôber ou Efecto Mariposa

1 Decembro 2025

  • Javi Gómez Noya e Fernando Fernández son os promotores desta iniciativa, que conta co Concello de Pontevedra como colaborador
  • As entradas xa están dispoñíbeis na web oficial do evento www.inverniafest.com

O Concello de Pontevedra acolleu esta mañá a presentación do ‘Invernia Fest’, un novo evento musical para a cidade, que tomará o Recinto Feiral como base durante as xornadas do 6 e o 7 de febreiro do 2026.

Trátase dunha proposta novidosa para o inverno que está por chegar e que conta coa colaboración da institución local, figurando como organizadores e promotores dous nomes ben coñecidos na cidade: Javi Gómez Noya, lendario triatleta, e Fernando Fernández, fundador de Los 3 Monos.

As concellerías de Cultura e de Promoción da Cidade, dirixidas por Demetrio Gómez e Anabel Gulías, colaboraron na presentación deste evento, cuxo obxectivo é complementar a oferta cultural da cidade e ofrecer música en directo de gran formado durante todo o ano, e non só nos meses de verán.

O ‘Invernia Fest’ celebrarase no Recinto Feiral de Pontevedra o venres día 6 e o sábado día 7. A elección do recinto garante a comodidade do público, xa que é un espazo climatizado que permite gozar da música mesmo con choiva ou temperaturas baixas, tal e como lembraron os organizadores.

O festival presenta un cartel «moi variado e compensado», con grupos míticos de rock e pop. Entre os artistas confirmados atópanse Efecto Mariposa, inmerso na xira do seu 25 aniversario, así como bandas de rock «cañeiro» como La Fuga e Obús. O cartel inclúe tamén a Sôber (cun hard rock con toques melódicos e case metal), e o talento galego de Agoraphobia. Completan a oferta dúas bandas tributo (a Red Hot Chili Peppers e Guns N’ Roses) e grupos locais de Pontevedra, como Liorta e Chroma, ademais de picadiscos da cidade.

A programación estenderase dende a tarde do venres ata a madrugada do sábado, cunha xornada completa o sábado dende a hora do vermú. O recinto contará con food trucks para que a xente poida cear e comer, e haberá zonas habilitadas con música de DJs para que o público non «descanse» mentres se fan as probas de son dos grupos.

As entradas xa están dispoñíbeis na web oficial do evento, www.inverniafest.com. As primeiras 500 entradas están en promoción: o bono de dous días custa 49 euros.

Está pasando!

lun01dec20:30Concerto do Cuarteto Gerhard en PontevedraSociedad Filarmónica de Pontevedra20:30 Pontevedra

mar02dec18:00Visitas guiadas ás salas de Castelao no Museo de Pontevedra75 aniversario do pasamento de Castelao18:00 Pontevedra

mér03dec19:00'SuperArte', da Fundación SIFU en Vigoo espectáculo inclusivo máis importante de Europa19:00 Vigo

xov04dec10:00xov18:00Master Class de Elaboración de Viños Espumosos en Salvaterraformación impartida por Eva Plazas Torné10:00 - 18:00 Salvaterra de Miño

VER MÁIS AXENDA