Presentación da programación previa dos Feroz 2025 | © Concello de Pontevedra

Eduardo Casanova, Lois Patiño, Paula Ortiz e Víctor Iriarte estrean as previas dos Feroz 2025 en Pontevedra

19 Setembro 2024

A programación audiovisual que se realizará antes da Gala do 25 de xaneiro iniciarase este outubro con catro proxeccións de balde no Pazo da Cultura e na Facultade de Ciencias da Comunicación do campus da Boa Vila

Os Premios Feroz 2025 achéganse cara Pontevedra do mesmo xeito que o calendario avanza. Este xoves, 19 de setembro, o alcalde, Miguel Anxo Fernández Lores, acompañado da coprodutora executiva dos Feroz, Laura Seoane, e o vicepresidente da Deputación de Pontevedra, Rafael Domínguez; participou na presentación da programación do mes de outubro como previa a celebración da Gala dos Premios Feroz na cidade.

A nomeada gala, que se celebrará o sábado 25 de xaneiro no Recinto Feiral, virá precedida dunha ampla programación que se prolongará ao longo de todo o outono e parte do inverno, e que convocará na Boa Vila a algúns dos creadores e creadoras de cinema e series españolas.

Presentación da programación previa dos Feroz 2025 | © Concello de Pontevedra

Deste xeito, en outubro iniciarase un ciclo de proxección de películas gañadoras e nomeadas nos Premios Feroz Arrebato nos últimos anos, destinados a aquelas obras que merecen ser recoñecidas polos seus logros específicos no apartado artístico ou pola súa innovación: Serán as seguintes:

  • Venres, 4 de outubro, 18.30h – Proxección de ‘La piedad’ con Eduardo Casanova, película protagonizada por Ángela Molina, gañadora no 2022 do Premio Feroz Arrebato de ficción. Lugar: Pazo da Cultura.
  • Mércores, 16 de outubro, 18.30h – Proxección de ‘Samsara’ con Lois Patiño, que ao seu paso pola Berlinale 2023 alzouse co Premio Especial do xurado na sección ‘Encounters’ (ex aequo). A película foi candidata ao Premio Feroz Arrebato de No Ficción en 2024. Sesión en colaboración con Novos Cinemas. Modera Suso Novás. Lugar: Facultade de Comunicación – Sala de cine.
  • Mércores, 23 de outubro, 18.30h – Proxección de ‘Sobre todo de noche’ con Víctor Iriarte, película protagonizada por Lola Dueñas e Ana Torrent. Gañadora do Premio Feroz Arrebato de Ficción este mesmo 2024. Lugar: Facultade de Comunicación – Sala de cine.
  • Mércores, 30 de outubro, 18.30h – Proxección de ‘Teresa’ con Paula Ortiz, baseada no texto de Juan Mayorga (‘La lengua en pedazos’) que afonda na figura da relixiosa coma unha arma subversiva, encarnada en Blanca Portillo. A película foi candidata ao Premio Feroz Arrebato de Ficción no 2024. Modera Pedro Vallín. Lugar: Facultade de Comunicación – Sala de cine.

As entradas a todas as sesións son de balde previa retirada de localidades na oficina de Turismo da Praza de España de Pontevedra desde sete días antes de cada actividade e até completar o foro. Repartiranse un máximo de catro entradas por persoa.

O alcalde, Miguel Anxo Fernández Lores, lembrou que Pontevedra aspira a ser «unha das capitais da cultura cinematográfica» a través dos Premios Feroz nos anos 2025 e 2026. «Levamos tempo traballando neste tema e só podemos agradecer a colaboración de todas as partes implicadas á hora de facelo posíbel. Para min é unha alegría tremenda poder acoller esta cita, unha cita que transcende á cidade. Estamos encantados».

As actividades previas continuarán en novembro con novas convocatorias e propostas. Xa en decembro e xaneiro, tras anunciarse os nomeamentos aos Feroz 2025 e unha vez que se coñeza a personalidade distinguida co Feroz de Honra, proxectaranse algunhas das películas e series con opcións de facerse cunha figura na gala do 25 de xaneiro, e un ciclo especial dedicado ao premio honorífico desta 12ª edición.

En suma, proxeccións e coloquios que van máis aló dos galardóns anuais, reafirmando a vocación dos Feroz como punto de encontro para celebrar os logros artísticos, pero tamén como espazo de reflexión coa sociedade mesma. En palabras de María Guerra, presidenta da AICE: «Somos unha asociación de xornalistas de cinema e series empeñada en poñer en contacto á cidadanía cos seus artistas. E non só aspiramos a organizar unha cerimonia de premios, senón a atraer ao público a actos e eventos que lles interpelen».

Pola súa banda Pontevedra, co acordo establecido coa AICE, revalida a súa xenuína condición de cidade aberta ás voces dos artistas do audiovisual, que cada ano proxectan un novo imaxinario da nosa sociedade.

Os Premios Feroz 2025, que destacan o mellor da produción audiovisual española do ano para a prensa especializada, están patrocinados polo Concello de Pontevedra así como por Legado Ibérico, marca premium do Pozo Alimentación e líder no sector do ibérico. Ademais, contan coa colaboración de Audi —Vehículo Oficial— e co financiamento do Goberno de España – Instituto da Cinematografía e das Artes Audiovisuais (ICAA) do Ministerio de Cultura.

A Asociación de Informadores Cinematográficos de España (AICE) é un grupo plural de máis de 250 xornalistas e críticos dedicados a informar sobre cinema en televisión, radio, prensa e Internet de todo o país. Desde 2014 entregan os PREMIOS FEROZ® para destacar o mellor da produción audiovisual española do ano.

Ademais dos galardóns anuais, a asociación outorga o Premio Feroz Zinemaldia no Festival Internacional de Cinema de San Sebastián, o Premio Feroz Porta Escura no Festival de Málaga e o Premio Feroz Cinema Jove á mellor curtametraxe no seo do festival do mesmo nome. A AICE tamén organiza o festival ‘Lo que viene’, o campus de cinema e series ‘La Inmortal’ en Zaragoza e o programa de formación en xornalismo de cinema e series ‘María Luz Morales’.

Está pasando!

mar03decConsultarSanxenxo no Nadal 2024Do 29 de novembro de 2024 ao 6 de xaneiro de 2025(Consultar: martes) Sanxenxo

mar03decConsultarNadal en Poio 2024Do 30 de novembro de 2024 ao 6 de xaneiro de 2025(Consultar: martes) Poio

mar03dec20:30Proxección de ‘A hora da estrela’ en PontevedraCineclube Pontevedra20:30 Pontevedra

xov05decConsultarNadal Pontevedra 2024Do 5 de decembro de 2024 ao 6 de xaneiro de 2025(Consultar: xoves) Pontevedra

VER MÁIS AXENDA