Apego na Primavera en Pontevedra

sáb12abr11:00Apego na Primavera en PontevedraDe 0 a 6 anos11:00 Illa do Covo - Pontevedra

Detalles do Evento

Xa está aberto o programa de actividades do programa Apego para esta primavera, e que pode ser consultado na súa totalidade a través da web a puntate.pontevedra.gal

As actividades van dirixidas ás nais e pais e demais titores e titoras, co fin de darlles a coñecer recursos que sirvan para activar ou enriquecer a lingua que se fala en familia coas crianzas, e tamén para promover espazos de socialización en galego para as familais con nenas e nenos ata seis anos —as actividades levan a referencia das idades para as que están recomendados os contidos—.

Deste xeito, o programa consta de distintas actividades en diferentes espazos da cidade, con opcións de 0 a 6 anos. Hai obradoiros para aprender dar arrolos, xogos, contos, ou para experimentar coa cianotipia.

Pecharase o 10 de xuño coa festa das Brincadeiras Miudiñas de Cé Orquestra Pantasma.

Ademais, tamén se inclúe un ciclo de actividades fóra da cidade, en distintas parroquias, para familias con crianzas a partir de 3 anos: ‘Un pobo con historia de seu’. Estas sesións estarán guiadas por Ab Origine Antropoloxía e por Polo Correo do Vento, coa música de Marcelo Dobode.

Cada sesión constará dunha pequena explicación de carácter antropolóxico sobre o tema da sesión, un conto, unha sesión guiada de debuxo e un pequeno obradoiro para realizar en familia.

Todas as actividades son de balde, mais cómpre inscribirse previamente a través da web xa nomeada, pois o número de prazas ofrecidas é limitado. Estas son as actividades:

SÁBADO 12 DE ABRIL

Cianotipia, con Alouette Machine. A partir de 4 anos. Ás 11 h e 12 h. na Illa do Covo.

Obradoiro para aprender a facer fotocomposicións empregando luz solar e auga, ao tempo que aprendemos a nomear e recoñecer as plantas da nosa contorna.

MÉRCORES 30 DE ABRIL

O almanaque musical, con Percubebés. De 0 a 3 anos. Ás 17 h e 18:15 h. na Cova dos Libros Fantásticos.

Sesión de xogos e música con Marcelo Dobode e Bea Martínez, para coñecer o almanaque e o ciclo do ano a través do canto e do baile.

VENRES 9 DE MAIO

Contiños e xogos de Lup, con Soledad Felloza. De 0 a 3 anos. Ás 17:30 h e 18:30 h. na Cova dos Libros Fantásticos.

Sesión de narración oral para a primeira infancia cos contos, trabalinguas, xogos de dedos, adiviñas e as cantigas favoritas de Lup.

VENRES 23 DE MAIO

Casa, casiña, casona, con Marta Ortiz. De 0 a 4 anos. Ás 17:30 h e 18:30 h. na Cova dos Libros Fantásticos.

Sesión de narración oral con cantos, xogos, cancións de dedos, trabalinguas, arrolos e poemas para forxar os cimentos da casa que construiremos ao longo das nosas vidas.

VENRES 30 DE MAIO

Corochas, con Atenea García. De 0 a 3 anos. Ás 17:30 h e 18:30 h. na Cova dos Libros Fantásticos.

Sesión de narración oral que utiliza o conto acumulativo, a canción e o xogo de imitación para achegar novas paisaxes e personaxes.

XOVES 5 DE XUÑO

Para cantar e bailar, con Luís Prego e Samuel Soto. A partir de 4 anos. De 18.30 h a 19.30 h nos xardíns do Doutor Marescot.

Obradoiro para aprender cantigas, danzas sinxelas e xogos cantados e bailados; para experimentar os primeiros pasos do baile tradicional e practicar diversas melodías e ritmos.

MARTES 10 DE XUÑO

Brincadeiras miudiñas, con Cé Orquestra Pantasma. De 0 a 6 anos. Ás 17 h. na Alameda.

Xornada de despedida das actividades da primavera: con música, xogos tradicionais, obradoiro de creación libre e espazo para bebés, onde descubrirmos outras formas de xogar e de pasar o tempo coa natureza como espazo para o xogo, o lecer e a felicidade.