Baldur Brönnimann | © RFG

Concerto da Real Filharmonía de Galicia en Vigo

xov09xan20:00Concerto da Real Filharmonía de Galicia en Vigo Tempada de Abonos de Clásica do Teatro Afundación en Vigo20:00 Teatro Afundación - Vigo

Detalles do Evento

O programa da nova Tempada de Abonos de Clásica Afundación comeza o vindeiro 9 de xaneiro de 2025 cunha sesión musical moi especial: a Real Filharmonía de Galicia (RFG) presentaralle ao público de Vigo o proxecto no que colabora sobre o escenario co actor Tamar Novas.

Será o primeiro dos 6 concertos programados ao abeiro da Tempada de Abonos no primeiro semestre do vindeiro ano. Ademais da RFG, entre xaneiro e maio pasarán polo Teatro Afundación a Sinfónica de Galicia e máis o conxunto de cámara alemán Hamburger Elbphilharmonisches Sextett.

Os novos abonos poden mercarse ata o 29 de decembro en Ataquilla.com. A partir do día 30 de decembro estarán dispoñibles as entradas sen abono.

No Concerto de Reis do 9 de xaneiro, Tamar Novas colabora coa RFG na posta en escena do ‘Peer Gynt’ do compositor noruegués Edvard Grieg (1843-1907). A peza musical é unha adaptación da obra literaria homónima, e en verso, escrita por Henrik Ibsen. E narra as peripecias dun personaxe extravagante e antiburgués.

Director: Baldur Brönnimann

Dramaturxia: Lorena Conde

Actor: Tamar Novas

‘Inconformistas’

O director titular da Real Filharmonía de Galicia, Baldur Brönnimann, levará a batuta neste concerto e nos outros 3 nos que a formación musical compostelá dará no Teatro Afundación durante a Tempada de Abono. En todos eles participa alumnado da Escola de Altos Estudos Musicais de Galicia.

O proxecto da RFG para a tempada ten por título ‘Inconformistas’. Nun tempo de guerras e dificultades, dende a Real Filharmonía cren que a súa “obriga como cidadanía é manifestar o inconformismo, como noutros momentos ao longo da historia o fixeron boa parte das persoas creadoras que protagonizan” a temporada da orquestra.

O catálogo de ‘Inconformistas’ comeza cunha frase do compositor e guitarrista estadounidense Frank Zappa: “Sen desviación da norma, o progreso non é posible”.