O Concello de Mos anuncia un Nadal cargado de ilusión, tradición e espírito rondalleiro

4 Decembro 2025

O Concello de Mos anuncia a súa Programación de Nadal 2025, unha proposta ampla, diversa e cargada de ilusión, tradición e espírito rondalleiro.

O municipio prepárase para vivir unhas semanas cheas de música, encontro social, actividades familiares, deporte, espectáculos e visitas aos beléns, converténdose nun referente comarcal durante estas datas tan especiais. Esta programación chega cun marcado carácter comunitario, reforzando o valor da convivencia e o orgullo de pertenza ás nosas parroquias.

O programa de actividades arranca coa celebración do Queda en Mos, que terá lugar o sábado 6 e o domingo 7 no Pazo de Mos, con horario de 12:00 a 22:00 horas. O sábado ás 18:00 celebrarase ademais o tradicional acto de acendido das luces de Nadal, que cada ano congrega a centos de familias.

A continuidade festiva chegará a fin de semana seguinte co Rondallas Fest, un dos eventos máis esperados do Nadal mosense, que se celebrará dende o venres 12 ata o domingo 14, tamén no Pazo de Mos. O programa inclúe o coloquio co director e actores da película “Rondallas”, foodtrucks durante toda a tarde e as actuacións das rondallas ás 16:30 horas ambos días, consolidando Mos como un dos epicentros desta tradición tan nosa.

O venres 19, ás 19:00 horas, o Multiusos das Pozas acollerá a Festa do Deporte, un evento de recoñecemento ao tecido deportivo local.

O domingo 21, a programación multiplicarase con varias actividades ao longo do día: ás 10:30 horas terá lugar a Papanoelada Moteira coa saída dende a Avenida de Sanguiñeda; no mesmo horario celebrarase a Concentración de Coches Clásicos no Parque O Son do Regueiro de Torroso; ás 12:00 horas o Multiusos das Pozas acollerá o Festival de Nadal das Escolas de Patricia Martínez; e ás 19:00 horas o Auditorio de Torroso será o escenario do concerto de Chavellos Sinfónico e a Banda de Música Xuvenil de Torroso.

O sábado 27, a partir da medianoite, o Pazo de Mos será o lugar da tradicional Festa Pre Fin de Ano, unha cita pensada para toda a veciñanza que cada ano reúne a centos de persoas.

Xa o domingo 28, ás 18:00 horas, o Auditorio de Torroso acollerá unha nova sesión de Ocio en Familia, con “Os Fabulosos Cleaners” da compañía Malasombra e un espectáculo de pompas xigantes para público infantil e familiar.

Durante todo o Nadal permanecerán abertos ao público os dous beléns máis emblemáticos do municipio.

O Belén do Pazo de Mos poderá visitarse de luns a domingo de 17.00 a 20.00 horas, e os sábados e domingos de 10.00 a 13.30 e de 17.00 a 20.00 horas, agás o 25 de decembro pola tarde e o 1 de xaneiro durante todo o día, que permanecerá pechado.

Pola súa banda, o Belén de Herville, na Asociación Cultural de Herville, abrirá de luns a venres en horarios de 15.00 a 17.00 e de 19.00 a 22.30; os sábados de 15.00 a 23.00 e os domingos, de 11.30 a 13.30 e de 15.00 a 21.30 horas, mantendo a súa tradicional acollida á veciñanza e visitantes de toda a comarca.

A programación de Nadal pecharase en xaneiro coa celebración da Cabalgata de Reis, que percorrerá as rúas de Sanguiñeda o luns 5 a partir das 18:00 horas, levando a ilusión ás casas dos máis pequenos e poñendo o broche final a estas semanas de festa e convivencia.

O Concello de Mos anima a toda a veciñanza a participar activamente desta programación, pensada para dinamizar o municipio, apoiar o comercio local e celebrar con orgullo as nosas tradicións. O Nadal en Mos chega un ano máis cheo de emoción, luz e espírito rondalleiro.

Está pasando!

xov04dec18:00Proxección de 'RBG' en Vigociclo 'Mulleres (d)e Abril. Activistas: cinema por mulleres'18:00 Vigo

xov04dec19:00Visita guiada á exposición 'Comedy Wildlife' en PontevedraCOMEDY WILDLIFE PHOTOGRAPHY AWARDS19:00 Pontevedra

ven05decConsultarPazo de Nadal en SanxenxoDo 5 de decembro de 2025 ao 5 de xaneiro de 2026(Consultar: venres) Sanxenxo

ven05decConsultarTempo de Nadal en PontevedraDo 5 de decembro de 2025 ao 11 de xaneiro de 2026(Consultar: venres) Pontevedra

VER MÁIS AXENDA