Presentación de Pontedetapas 2025 | Concello de Pontevedra

Pontedetapas celebrarase entre o 5 e o 23 de novembro con 27 establecementos que competirán pola mellor tapa e o mellor cóctel

27 Outubro 2025

  • Os clientes poderán escoller entre 16 tapas tradicionais, 12 tapas creativas e 10 cócteles que competirán no certame que se desenvolverá ata o domingo 23 de novembro.
  • O público decidirá a “Tapa Pontevedra” e o xurado profesional outorgará os Premios do Xurado entre os 27 establecementos participantes.
  • Ademais, volve o “Pasaporte Pontedetapas” e haberá premios directos para o público como ceas para dúas persoas e o sorteo de dous vales de 500 euros.

O Concello de Pontevedra presentou hoxe unha nova edición do certame Pontedetapas no que competirán entre o 5 e o 23 de novembro 27 establecementos da Boa Vila. A iniciativa ten o obxectivo de dinamizar a restauración local e contribuír a desestacionalizar o sector.

A edil de Promoción Económica, Anabel Gulías, subliñou que Pontedetapas “reforza a imaxe de Pontevedra como referencia na gastronomía e ademais coincide con outros eventos aos que convidamos ao público, como Etiqueta Negra e as actividades que estamos a desenvolver no Mercado de Abastos”.

Amais, salientou que “nesta edición apostamos pola calidade do produto local, pola creatividade dos nosos profesionais da hostalería e pola participación das pontevedresas e os pontevedreses, que é esencial á hora de coñecer os gustos da cidadanía”.

O mércores 5 de novembro, para abrir o certame, a concelleira e o alcalde, Miguel Anxo Fernández Lores, percorrerán varios establecementos participantes da Boa Vila para probar as tapas e os cócteles que concorren ao novo certame.

Nesta nova edición presentáronse propostas para as tres modalidades: 16 tapas tradicionais, 12 tapas creativas e 10 cócteles. Cada local poderá concorrer cunha creación por categoría e, no caso dos cócteles, poderá presentar dúas versións: unha con alcol e outra sen alcol.

Como novidade, este ano as elaboracións terán un prezo variable: 3,50 euros de luns a xoves e 4 euros de venres a domingo na modalidade de tapa; e 6 euros para o cóctel.

O público participante poderá votar para elixir a “Tapa Pontevedra”, a proposta popular que representará á cidade no certame De Tapas por Galicia, promovido por Turismo de Galicia.

Ademais, un xurado profesional valorará as creacións e decidirá os premios ás mellores tapas tradicional e creativa, así como ao mellor cóctel. O fallo farase público nun acto ao remate do certame.

O público tamén poderá optar a premios directos: dous vales de 500 euros cada un para gastar nos locais participantes. Un sorteo realizarase entre os cupóns de papel depositados nas urnas e outro entre as votacións realizadas a través da aplicación oficial do Pontedetapas. Entre todos os cupóns de votación sortearase un pack de produtos premium de El Nogal.

Ademais, volve o “Pasaporte Pontedetapas”: as dez primeiras persoas que logren selar o pasaporte en todos os locais participantes e o entreguen na Oficina Municipal de Turismo antes do 6 de decembro de 2025 recibirán como agasallo seguro unha cea para dúas persoas valorada en 60 euros, a elixir entre todos os establecementos do concurso.

Por outra banda, Hijos de Rivera outorgará un premio á mellor maridaxe dunha tapa con caña de Estrella Galicia. O establecemento gañador recibirá o equivalente ao peso da persoa propietaria en produtos HdR e os clientes participarán nunha experiencia especial para dúas persoas en MEGA, o museo de Estrella Galicia, un espazo dedicado a descubrir, entender e celebrar a cultura cervexeira.

Está pasando!

lun27outConsultarSamaín Soutomaior 2025do 26 de outubro ao 2 de novembro de 2025(Consultar: luns) Soutomaior

lun27outConsultar53º Curtas Festival do Imaxinario en VilagarcíaDel 24 de octubre al 2 de noviembre de 2025(Consultar: luns) Vilagarcía de Arousa

mar28out12:00mar12:00Visitas guiadas ás Ruinas de San DomingosMuseo de Pontevedra12:00 - 12:00 Pontevedra

mar28out19:30Proxección de 'Fimei paxaros voando' en Marínciclo “Martes de Cinema”19:30 Marín

VER MÁIS AXENDA