Presentación da Festa do Mar de Combarro 2025 | Concello de Poio

A Festa do Mar de Combarro pon en valor a tradición mariñeira e reforza o seu compromiso co sector e coa cultura

21 Agosto 2025

  • Ángel Moldes: “Gastronomía, música, cultura, tradición e propostas para os máis pequenos conflúen nun evento que queremos que sexa de todos e para todos”.
  • A programación estruturase en tres bloques: o gastronómico, a carpa museo e as embarcacións tradicionais, que se suman aos concertos gratuítos de Miss Caffeína, Coti, Natalia, La Ocaband, Grupo América, os djs locais Jorge Álvarez e Arroww e o espectáculo da Pop Rock Symphony Fusion.

O Concello de Poio deu a coñecer esta mañá a programación íntegra da Festa do Mar 2025, que se celebra en Combarro do 28 ao 31 de agosto. Unha cita que, como subliñou o alcalde, Ángel Moldes, volve consolidarse como un evento de referencia, cunha programación moi potente deseñada para poñer en valor o legado cultural vencellado ao mar e visibilizar o papel estratéxico do sector marítimo no desenvolvemento económico e social do territorio.

“Este ano presentamos unha programación diversa e de calidade, pensada para todos os públicos, e centrada, como non podía ser doutro xeito, no mar como elemento identitario e motor económico fundamental para Poio, para amosar o orgullo do noso concello pola xente do mar.

Presentación da Festa do Mar de Combarro 2025 | Concello de Poio

Gastronomía, música, cultura, tradición e propostas para os máis pequenos conflúen nun evento que queremos que sexa de todos e para todos”, engadiu o alcalde, que presentou esta mañá a programación acompañado polo secretario xeral de Lingua, Valentín García, dos edís de Eventos e Festexos e de Cultura, Fran Dasilva e Natalia Sabarís, respectivamente, así como de representantes das entidades locais que colaboran, como son Ateneo Corredoira de Combarro, Amecomra, Opmega ou Club Mariño A Reiboa.

A todos eles agradeceu a súa implicación, xunto coa do tecido empresarial e social: “Un dos piares da Festa do Mar é a colaboración e participación de asociacións que de xeito directo forman parte da organización, unha participación clave para que esta cita sexa un éxito colectivo”.

Fixeron a presentación na nova rotonda de acceso a Combarro, unha rotonda que representa a riqueza, o patrimonio e beleza dunha contorna única en Galicia, na que o Concello de Poio recuperou un hórreo e unha embarcación tradicional, símbolos da parroquia e dunha das zonas máis visitadas de Galicia.

UNHA PROGRAMACIÓN EN TRES BLOQUES: GASTRONÓMICO, CARPA MUSEO E EMBARCACIÓNS TRADICIONAIS

Cun enfoque integrador que une tradición, sustentabilidade e dinamización cultural, a programación deste ano incluirá concertos de primeiro nivel, exposicións temáticas sobre o mar, cine do mar, foodtracks, vermús mariñeiros e propostas para o público infantil.

“A Festa do Mar reforza así o seu papel como espazo de encontro e participación, nun evento que reivindica as nosas raíces, aposta polo talento e proxecta o futuro dun sector fundamental e estratéxico para o municipio”, apuntou.

A programación estruturase en tres bloques na Praza da Chousa: o gastronómico, a carpa museo e as embarcacións tradicionais. Con respecto ao gastronómico, inclúese a degustación de produtos do mar nas foodtrucks ‘Galicia sabe Amar’, da Consellería do Mar, e con actuacións musicais durante a sesión vermú o venres, sábado e domingo, con La Mmarca, Víctor Manuel Movilla e Miguel Barroso Cerqueira, “e todas as persoas que decidan quedarse a comer poderán facelo nalgún dos máis de vinte locais de hostalería que hai nesta parroquia, onde poden consumir produtos do mar da máxima calidade”, sinalou Moldes.

Na carpa museo, que estará aberta todos os días desde as 12.00 horas, poderanse visitar exposicións sobre a cultura mariñeira, entre as que se inclúen maquetas de barcos e outras pezas cedidas por veciños, fotografías antigas seleccionadas polo Ateneo Corredoira de Combarro, pezas do Museo do Mar de Vigo ou a exposición fotográfica “No centro do Mar”, coa colaboración de Cultumar. Ademais, nesta ocasión tamén se inclúe o ciclo cinematográfico “Cine do Mar”, en colaboración coa Asociación Museo do Mar de Marín, con proxeccións diarias de curtas ás 12.30 horas.

E o terceiro eixo da programación son as embarcacións tradicionais, con encontro e regatas entre o venres e domingo en colaboración co Club Mariño A Reiboa, para a que se estima que participen máis de trinta embarcacións.

PROPOSTAS PARA PÚBLICO INFANTIL, CANCIÓN MARIÑEIRA E CONCERTOS GRATUÍTOS

A música tamén supón unha parte importante para a programación da Festa do Mar con concertos gratuítos para todos os públicos. O xoves 28, inaugurará os concertos La Ocaband co seu musical “A historia da verbena”, ás 21.00 horas, e posteriormente será quenda do Grupo América.

O venres será quenda de Miss Caffeína, banda de pop electrónico alternativo, con directos moi enérxicos que se converteron en indispensables no calendario dos festivais máis importantes do país (23.30 horas). Un concerto que se completará coa sesión do DJ local Jorge Álvarez.

Xa o sábado, Natalia e Coti subirán ao escenario da Praza da Chousa, (desde as 22.45 horas) onde tamén actuará o DJ local Arroww ao inicio e final da gala.

Coñecida polo seu paso por Operación Triunfo e cunha carreira chea de éxitos: 5 discos, 2 de ouro, 1 de platino e máis de 500.000 copias vendidas, Natalia traerá a Combarro clásicos como “Vas a volverme loca”, “Besa mi piel” ou “Loco por mí” e temas máis actuais que farán vibrar ao público.

Pola súa banda, o cantautor arxentino Coti, recoñecido a nivel internacional por temas como “Antes de ver el sol”, “Nada fue un error” ou “Otra vez”, incluirá Poio como unha das paradas na súa xira europea, que o levará tamén por cidades como Londres, Dublín e Ámsterdam.

O domingo será quenda do espectáculo musical ‘Pop Rock Symphony Fusion’ (22.00 horas).

Para o público infantil tamén se inclúen propostas como o espectáculo ‘Os Piñeiriños’, o xoves ás 20.00 horas, ou sesión de maxia con Samuel Moreno, o sábado ás 19.30 horas.

O certame de Música Mariñeira celebrarase do venres ao domingo pola tarde, coas actuacións de Son das Corbacerias, Adelaidas, Os Chispas do Lérez, Pontis Veteris, As Abeleiras, ademais das actuacións de Máis Cantos e Vides Novas.

Está pasando!

xov21agoConsultarSanxenxo Verán 2025Actividades culturais e festivas para o verán(Consultar: xoves) Sanxenxo

xov21agoConsultarFestaclown 2025 en VilagarcíaDo 18 ao 23 de agosto de 2025(Consultar: xoves) Vilagarcía de Arousa

xov21agoConsultarVisitas guiadas por PontevedraTurismo de Pontevedra(Consultar: xoves) Pontevedra

xov21agoConsultar4ª Mostra do Audiovisual e Cinema de MarínDo 20 ao 23 de agosto de 2025(Consultar: xoves) Marín

VER MÁIS AXENDA