Presentación do XI Encontro ‘Corazón da Artesanía’ | © Artesanía de Galicia

A Xunta volverá encher de artesanía, gastronomía e música Os Pendellos de Agolada co ‘Corazón da Artesanía’

6 Xuño 2024

  • O director xeral de Comercio e Consumo, Gabriel Alén, e a xerente da Fundación Artesanía de Galicia, Elena Fabeiro, participaron hoxe na presentación do XI Encontro da Artesanía Tradicional e Popular de Galicia que se celebrará do 5 ao 7 de xullo
  • Na edición deste ano participarán 53 artesáns e 32 expositores de produtos de alimentación gourmet para afondar na divulgación e posta en valor dos nosos oficios e da marca Artesanía de Galicia
  • A Xunta foi recoñecida co Premio Nacional de Artesanía 2023 na categoría Promociona para Entidades Públicas pola iniciativa do ‘Corazón da Artesanía’

O director xeral de Comercio e Consumo, Gabriel Alén, e a xerente da Fundación Artesanía de Galicia, Elena Fabeiro, participaron o pasado 4 de xuño, na presentación do XI Corazón da Artesanía. Encontro da Artesanía Tradicional e Popular de Galicia, que se celebrará os días 5, 6 e 7 de xullo no recinto histórico-artístico dos Pendellos de Agolada.

Durante a presentación, Gabriel Alén destacou o Corazón da Artesanía como un encontro multidisciplinar e orientado a amosar, poñer en valor, enxalzar e contribuír ao desenvolvemento integral dos nosos oficios artesanais, especialmente dos máis tradicionais, dos valores da artesanía e da marca Artesanía de Galicia, así como dos produtos gourmet.

“Agolada convértese cada ano nun espazo de confluencia entre artesáns e profesionais de diferentes ámbitos (deseño, decoración, gastronomía, moda, arquitectura, tendas especializadas…) que permiten establecer relacións comerciais e chegar a novos mercados”, explicou.

Na edición deste ano está prevista a participación de 53 profesionais da Artesanía de Galicia, 36 como expositores e outros 14 artesáns que participarán como docentes nos cursos de formación especializada e talleres abertos, entre os que se atopan sete obradoiros que participan neste evento por primeira vez. En canto aos expositores de produtos gourmet, este ano estará presente a oferta de 32 empresas, 19 das cales contan co selo de Artesanía Alimentaria.

Así, durante tres días en horario de 11,00 a 14,00 horas e de 16,00 a 21,30 horas, o Corazón da Artesanía xuntará tradición e vangarda nun encontro único no que se contará con demostracións de artesanía en vivo, o programa Artesanía no Prato que xunta gastronomía e artesanía, cursos especializados para artesáns e obradoiros abertos para todos os públicos, animado con música en directo e actividades para nenos.

Formación e actividades

Entre estas actividades de formación destacan os cursos de especialización impartidos por Álvaro M. Leiro, artesán pontevedrés especializado en cestería e gañador do Premio Nacional de Artesanía 2023; a empresa Ubedíes Artesanía (Jaén), un referente no traballo do esparto; ou dous dos docentes do proxecto de recuperación e transmisión dos oficios tradicionais Aprender da Tradición. Oficios e técnicas impulsado pola Xunta: o oleiro de Buño Antonio Pereira “O Rulo” e a tapiceira Stelle Bisson.

Entre os oficios artesanais que estarán representados atópanse a xoiería e a ourivería, a sombreirería, os instrumentos musicais, a olería, a cerámica, a elaboración de zocos, a marroquinería, o téxtil, bordado, o traballo coa madeira e co papel, a forxa, a cestería,as colareiras, os xoguetes, a estampaxe, a tapicería, o bordado ao aire e mais os labores de palla.

No programa de actividades inclúense cursos especializados que estarán relacionados coa cestería, co bordado, coa olería tradicional, coa tapicería ou co debuxo e talleres abertos para todos os públicos relacionados con diferentes oficios como a cestería, o tecido, a cerámica de torno, a estampaxe e a elaboración de figuras de miga de pan.

Como xa é habitual, o Corazón da Artesanía incorpora a iniciativa Artesanía no Prato, un proxecto que botou a andar no 2013 no marco deste encontro co obxectivo de establecer sinerxías entre artesanía, gastronomía e deseño. Durante os tres días do evento realizaranse demostracións de reputados cociñeiros que empregarán pezas da marca Artesanía de Galicia para presentar os seus menús. A programación do evento complétase con espectáculos e concertos musicais que terán lugar na Praza do Concello de Agolada durante toda a fin de semana.

En decembro de 2023, esta iniciativa impulsada pola Xunta resultou gañadora do Premio Nacional de Artesanía 2023 na categoría Promociona para Entidades Públicas.

Está pasando!

dom24nov09:00Andainas Saudables da Eurocidade Tui-ValençaDo 7 de abril ao 15 de decembro de 202409:00 Eurocidade Tui-Valença

dom24novConsultarConmemoración do 25N en RibadumiaDía Internacional da Eliminación da Violencia Contra a Muller(Consultar: domingo) Ribadumia

dom24nov10:30II Medio Maratón Concello de VilagacíaCampionato Xunta de Galicia de Medio MAratón 202410:30 Vilagarcía de Arousa

dom24nov20:00'Non pasarán' de Ártika Cía en VigoV Festival 'Comediártiko'20:00 Vigo

VER MÁIS AXENDA