O fotógrafo Jordi Bru | jordibru.es

Jordi Bru, artista referente do fotorrealismo, retrata a xesta dos marinenses no Día da Liberación

1 Setembro 2025

  • A Asociación de Veciños Monte Penizas doará ao Concello de Marín un cadro no que o fotógrafo pamplonés recrea a toma do Forte de San Fernando por parte das Alarmas do Morrazo.
  • Presentarase o martes 2 de setembro no Museo Torres, xunto cunha exposición doutro libro de Bru sobre navíos da Armada Española.

O fotógrafo especializado en recreacións históricas a través da técnica do fotorrealismo, Jordi Bru (Pamplona, 1967), inspirouse na fazaña dos homes e mulleres valentes de Marín que, unidos nas Alarmas do Morrazo, enfrentáronse ás tropas francesas o 4 de abril, Día da Liberación, para reconquistar a nosa vila.

Esta inspiración foi posible grazas á mediación da Asociación de Veciños Monte Penizas, a través do seu presidente, José Iglesias. A entidade veciñal, promotora desta iniciativa, doará o cadro de Bru ao Concello de Marín, nun acto que se celebrará o martes 2 de setembro a partir das 20.00 horas no Museo Municipal Manuel Torres.

No espazo museístico reuníronse José Iglesias e a concelleira Itziar Álvarez para preparar todo de cara a este acto, no que se procurará coñecer máis sobre a historia e o protagonismo da sociedade marinense nesta xesta acontecida en abril de 1809.

José Iglesias e a concelleira Itziar Álvarez | Concello de Marín

De achegar ese contexto histórico encargarase o propio Iglesias, que despois dará paso a unha intervención do artista, na que explicará con detalle como é o seu proceso de traballo, co que consegue imaxes hiperrealistas que serven de ferramenta gráfica idónea para coñecer máis sobre a nosa historia.

Ademais de poder vislumbrar o cadro do 4 de abril, o Museo tamén exporá unha mostra das imaxes incluídas no libro “La Armada Española”, no que o fotógrafo de Pamplona recolle a recreación de escenas navais do século XVIII, apoiado polo historiador Rafael Torres.

Traxectoria profesional de Jordi Bru

Fotógrafo profesional, cuia labor céntrase na recreación visual de exércitos e batallas históricas. As súas obras cobren desde os Tercios españois do século XVI ata a Segunda Guerra Mundial, pasando polas Guerras Napoleónicas, as Guerras Carlistas e a Guerra Civil.

Comezou a súa carreira como reporteiro gráfico no diario El Mundo, onde traballou durante unha década nas delegacións do País Vasco e Cataluña. En 1993 cubriu o conflito de Bosnia, unha experiencia que marcou a súa traxectoria. Posteriormente regresou a Pamplona e comezou traballar para revistas de arquitectura e cultura, así como para editoriais do País Vasco e Francia.

En 2013, descubriu a súa paixón polas recreacións históricas tras asistir por primeira vez a un evento napoleónico, o que lle levou a adoptar un estilo inmersivo: participa como recreador e fotografía as escenas desde dentro, mesturando documentalismo, meticulosa documentación e montaxe dixital.

Está pasando!

mar02setConsultarSanxenxo Verán 2025Actividades culturais e festivas para o verán(Consultar: martes) Sanxenxo

mar02setConsultarVisitas guiadas por PontevedraTurismo de Pontevedra(Consultar: martes) Pontevedra

mar02setConsultarFestas patronais de Sanxenxo 2025Do 24 de agosto ao 5 de setembro de 2025(Consultar: martes) Sanxenxo

mar02set18:00Visitas guiadas ás salas de Castelao no Museo de Pontevedra75 aniversario do pasamento de Castelao18:00 Pontevedra

VER MÁIS AXENDA