Elena Torres presenta a programación cultural do Auditorio Emilia Pardo Bazán | Concello de Sanxenxo

Música, teatro, danza e humor serán os protagonistas da axenda cultural de outono en Sanxenxo

1 Setembro 2025

O Concello de Sanxenxo xa ten pechada a programación do primeiro trimestre da axenda do Pazo Emilia Pardo Bazán co que se dará contido ás fins de semana de setembro, outubro e novembro.

Música, teatro, danza e humor serán os protagonistas das citas culturais. “Pensamos nunha programación que puidera atraer aos distintos tipos de público cunha proposta diferente e atractiva”, asegura Elena Torres, concelleira de Cultura e Eventos.

O espectáculo familiar ‘I love and rock and roll’, con máis de 100.000 espectadores e unha extensa xira nacional que o levou con continuos sold outs polos principais teatros de máis de 15 cidades, aterra no Auditorio Emilia Pardo Bazán o próximo 6 de setembro, ás 21 horas.

Un espectáculo cheo de música e humor no que os máis pequenos da casa gozarán descubrindo a historia e as cancións máis representativas de AC/DC, Queen, Ramones, Metallica, The Beatles, Iron Maiden, Led Zeppelin. El Oso Rosendo é o anfitrión ideal para contar a toda a familia a historia e as máis divertidas anécdotas das bandas que nos fixeron amar o Rock and Roll e que marcaron a toda unha xeración.

A proposta escénica ‘Nove Espellos’, baseada na música do artista compostelán Sergio Cobos, onde a danza de raíz galega comparte espazo coa danza clásica, a contemporánea e a danza de contacto, chegará ao Auditorio o próximo 26 de setembro ás 20:30 horas.

‘Nove Espellos’ é unha viaxe polo multiverso do eu-non-consciente, un espazo onde o todo e a nada son o mesmo, onde se recrean medos, desexos, fracasos, ausencias, acertos, alegrías e tristezas.

O mes de outubro estréase o día 11 co concerto de Luis Fercán, onde presentará o seu terceiro álbum ‘Postais Perdidas’. A actuación dará comezo ás 21 horas. Trátase do disco máis maduro do artista ata a data. Gravado en Garate Studios e coa produción de Nacho Mur, o artista acerca de novo ás súas vivencias máis persoais.

Coa súa característica voz rachada, o autor presentará este disco en directo cunha sutileza e calidez propia dunha alma vella e como sempre, a corazón aberto.

O 18 de outubro, ás 21 horas, é a quenda de Abraham Cupeiro con ‘Resonando en el Pasado’. Un concerto-monólogo no que o músico viaxa ao pasado máis remoto da nosa especie a través dos sons dos instrumentos de vento. Este proxecto, xorde da inquietude de Abraham por coñecer e recuperar instrumentos de todas as épocas e lugares.

‘Resonando en el Pasado’ viu a luz en 2006 e desde entón máis de 40.000 persoas puideron gozar deste concerto, onde Abraham toca máis de 100 instrumentos ao longo do espectáculo.

O Teatro Suavila subirá ao escenario do Pazo Emilia Pardo Bazán o próximo 25 de outubro, ás 21 horas con ‘O cazador de fortunas’.

O 31 de outubro será a quenda de Teatro Noroeste que traerá a obra ‘Guerra’, unha traxedia aderezada de comedia e ironía para adultos de máis de 16 anos.

En novembro, o 15, ás 21 horas, Moura Teatro presenta ‘Prognóstico Reservado’. É unha comedia divertida e desenfadada cuxo único propósito é facerlle pasar ao espectador un intre distendido para adultos de máis de 16 anos.

O ciclo trimestral péchase co espectáculo de David Amor e Josito Porto, ‘Go Home’, ás 21 horas para máis de 16 anos.

A venda de entradas será a través de Ataquilla.com, incluída a de ‘Nove Espellos’ que, aínda que é gratis, será necesario retirala para controlar o aforo.

Está pasando!

lun01setConsultarSanxenxo Verán 2025Actividades culturais e festivas para o verán(Consultar: luns) Sanxenxo

lun01setConsultarVisitas guiadas por PontevedraTurismo de Pontevedra(Consultar: luns) Pontevedra

lun01setConsultarFestas patronais de Sanxenxo 2025Do 24 de agosto ao 5 de setembro de 2025(Consultar: luns) Sanxenxo

mar02set18:00Visitas guiadas ás salas de Castelao no Museo de Pontevedra75 aniversario do pasamento de Castelao18:00 Pontevedra

VER MÁIS AXENDA