Manu Lourenzo, Carolina Silva e César Pazos na presentación da II Xornada Manoel Vello | Concello de Soutomaior

O castelo de Soutomaior acollerá unha xornada sobre o potencial cinematográfico da historia de Galicia

22 Outubro 2025

O 26 de outubro poderemos empaparnos dos momentos da historia de Galicia como motor cinematográfico grazas ás charlas e mesas redondas impartidas por especialistas en historia, escritores e directores de cine

Moi poucos galegos saben que Santiago lle disputou á mesma Roma a sede papal, ou que o Duque de Lancaster chegou a ser rei no século XIV dunha Galicia aliada a Portugal.

Estes son un par de exemplos dos moitos feitos que agocha a nosa historia, que poucos de nós coñecemos e que algúns cineastas quere explotar a nivel internacional.

A cita para falar da produción dun Xogo de Tronos galego terá lugar o próximo domingo 26 de outubro no castelo de Soutomaior, durante a II Xornada Manoel Vello ‘A historia de Galicia como motor cinematográfico’, organizada pola Asociación Pro-Fundación Manoel Vello en colaboración co Concello de Soutomaior e a Deputación Provincial.

O acto comezará ás 12:00 horas coa benvida do alcalde de Soutomaior, Manu Lourenzo, e da presidenta da Asociación Pro-Fundación Manoel Vello, Carolina Silva.

Trala apertura chegará a quenda da intervención do investigador histórico José Manuel Barbosa, autor de “A evolución histórica dos limites da Galiza” e de “Porque que caiu a Galiza?”.

Barbosa arrancará contándonos feitos da nosa historia descoñecidos para a maioría dos galegos e que ben se poderían levar ao cine en virtude tanto da súa repercusión na construción europea como na súa capacidade dramática.

Pola súa banda, o director e escritor Tomás Martínez e Iago de Sants, director de cine de inmersión, exporán, xunto co escritor de novela histórica César Pazos, as posibilidades reais de converter en filme a nosa historia e distribuíla polos circuítos ou plataformas internacionais.

César Pazos, impulsor desta xornada, explica a súa finalidade: “O noso país non se coñece a si mesmo e a mellor forma de facelo é a través do cine”. Porque “antes a xente contaba as historias ao redor do lume, pero hoxe fano a través do cine”, engade.

“Imaxina aos nosos celtas e cabaleiros armados, a Galicia indómita e as súas lendas, os amantes, os traidores, os deuses antergos, os santos cristiáns, os guerrilleiros erguéndose entre luces de cámara e guións, para lembrar que fomos moito máis do que nos contaron”, pídenos César Pazos, aclarando que “a II Xornada Manoel Vello non é unha mesa de cine”, pois “é un chamamento aos que cren que a nosa historia ten que ser contada como nunca antes”.

Entrada de balde ata completar o aforo (non é preciso inscrición previa).

Está pasando!

mér22out18:00mér20:00Obradoiro de Exlibris en Soutomaior'Dalle a volta á Biblioteca'18:00 - 20:00 Soutomaior

mér22out19:00Ciclo ‘Castelao 75 aniversario’ en PontevedraAteneo de Pontevedra19:00 Pontevedra

xov23out20:30Concerto da Orquesta Clásica de Vigo en PontevedraSociedad Filarmónica de Pontevedra20:30 Pontevedra

xov23out21:00Ponteatro 2025 - ‘As desterradas’outubro e novembro de 202521:00 Pontevedra

VER MÁIS AXENDA