O director galego Lois Patiño presentará no Auditorio da Facultade de Comunicación de Pontevedra a súa película ‘Samsara’

15 Outubro 2024

  • Continúan as actividades previas dos Premios Feroz 2025, cuxa gala se celebrará o próximo 25 de xaneiro no Pazo da Cultura
  • As entradas xa están esgotadas, pero para as próximas proxeccións poden sacarse de balde sete días antes na oficina de Turismo da Praza de España, e cinco minutos antes da proxección permitirase a entrada libre até completar capacidade

Este mércores, 16 de outubro, o director galego Lois Patiño presentará no auditorio da Facultade de Comunicación, do campus de Pontevedra a súa película ‘Samsara’, a segunda das actividades previas dos Premios Feroz 2025, que o vindeiro 25 de xaneiro celebrará a súa gala no Pazo da Cultura.

‘Samsara’ obtivo o Premio Especial do xurado na sección ‘Encounters’ (ex aequo) da Berlinale 2023 e foi candidata ao Premio Feroz Arrebato de No Ficción en 2024. O director falará con Suso Novás, organizador de ‘Novos Cinemas’, logo do remate da proxección que comezará ás 18.30 horas.

As 400 entradas do auditorio da facultade xa están esgotadas dende este luns, pero aquelas prazas que queden vacantes se porán a disposición das persoas que queiran achegarse cinco minutos antes do inicio da proxección.

As actividades previas continuarán en novembro con novas convocatorias e propostas. Xa en decembro e xaneiro, tras anunciarse os nomeamentos aos Feroz 2025 e unha vez que se coñeza a personalidade distinguida co Feroz de Honra, proxectaranse algunhas das películas e series con opcións de facerse cunha figura na gala do 25 de xaneiro, e un ciclo especial dedicado ao premio honorífico desta 12ª edición.

En suma, proxeccións e coloquios que van máis aló dos galardóns anuais, reafirmando a vocación dos Feroz como punto de encontro para celebrar os logros artísticos, pero tamén como espazo de reflexión coa sociedade mesma. 

Os Premios Feroz 2025, que destacan o mellor da produción audiovisual española do ano para a prensa especializada, están patrocinados polo Concello de Pontevedra así como por Legado Ibérico, marca premium do Pozo Alimentación e líder no sector do ibérico. Ademais, contan coa colaboración de Audi — Vehículo Oficial— e co financiamento do Goberno de España – Instituto da Cinematografía e das Artes Audiovisuais (ICAA) do Ministerio de Cultura.

A Asociación de Informadores Cinematográficos de España (AICE) é un grupo plural de máis de 250 xornalistas e críticos dedicados a informar sobre cinema en televisión, radio, prensa e Internet de todo o país. Desde 2014 entregan os PREMIOS FEROZ® para destacar o mellor da produción audiovisual española do ano. Ademais dos galardóns anuais, a asociación outorga o Premio Feroz Zinemaldia no Festival Internacional de Cinema de San Sebastián, o Premio Feroz Puerta Oscura no Festival de Málaga e o Premio Feroz Cinema Jove á mellor curtametraxe no seo do festival do mesmo nome.

A AICE tamén organiza o festival Lo que viene, o campus de cinema e series La Inmortal en Zaragoza e o programa de formación en xornalismo de cinema e series María Luz Morais.

Está pasando!

xov21nov09:00XIII Encontro de Conservación e Restauración en PontevedraA madeira, soporte de bens culturais09:00 Pontevedra

xov21novConsultarConmemoración do 25N en RibadumiaDía Internacional da Eliminación da Violencia Contra a Muller(Consultar: xoves) Ribadumia

xov21nov18:30Proxección de 'Amanece que no es poco' en Pontevedraciclo de proxeccións dos premios feroz 202518:30 Pontevedra

xov21nov20:00‘Conversas do primeiro andar’ no Mercado de PontevedraMúsica, libros e viño no Gastroespazo do Mercado 20:00 Pontevedra

VER MÁIS AXENDA