O Concello de Pontevedra abre o prazo para presentar solicitudes de hostalaría, mercado, xantares e ceas para a Feira Franca 2023

14 Xuño 2023

A Feira Franca, Festa de Interese Turístico Galego, será celebrada na cidade de Pontevedra entre o 1 e o 2 de setembro, seguindo a tradición de ocupar o primeiro fin de semana de setembro.

Desta volta, o prazo para presentar solicitudes para hostalaría, mercado e/ou xantares e ceas estará aberto entre o 15 de xuño e o 17 de xullo de 2023, ámbolos dous incluídos. Seguindo este calendario, a oficina da Feira Franca abrirá mañá as súas portas.

As solicitudes poderán ser presentadas de dúas formas posíbeis: de xeito telemático, a través da web oficial www.feirafranca.pontevedra.gal, nos formularios que se habilitarán na sección correspondente; ou de xeito presencial na nomeada oficina da Feira Franca, que estará situada no edificio do antigo conservatorio, na rúa Alfonso XIII.

O horario de atención ao público será de 10:00 a 14:00 horas, ademais do teléfono 986 86 05 87 e o enderezo electrónico feirafranca@pontevedra.gal.

O programa será presentado no seu momento, ao tempo que a temática deste 2023.

A Feira Franca é, dende hai dúas décadas, unha cita ineludíbel para as xentes de Pontevedra e os milleiros de visitantes que veñen gozar dela, procedentes de todos os recunchos do país e máis alá das nosas fronteiras; un peche apoteósico dos días de verán creado por e para a xente; unha viaxe ao século XV participada por toda unha cidade; unha vivencia única habitada por artesáns, canteiros, ferreiros, palilleiras, cesteiros, oleiros, redeiras, carpinteiros, músicas, xograres, campesiños, toneleiros, artistas, comerciantes, damas e cabaleiros que nos achegan o tempo do privilexio concedido a Pontevedra polo rei Henrique IV, no ano 1467, en virtude do cal se autorizaba a celebración dun mercado libre de impostos dun mes de duración.

A Feira Franca, que ten lugar na zona monumental da capital do Lérez todos os anos na primeira fin de semana de setembro, toma forma dende o ano 2000 coa organización de diversas actividades lúdicas de raigame histórica, que van dende a representación do transporte do viño ou o imperdíbel torneo medieval, ata os espectáculos de cetraría, tiro con arco, esgrima ou as exhibicións de música e danza que enfeitizan as xornadas do venres a partir do serán e mais detodo o sábado.

Pero, sobre todo, o que fai especial e distinta esta festa medieval, declarada Festa de Interese Turístico pola Xunta de Galicia en 2013, son os milleiros de persoas que se visten de época para xantaren nas prazas e rúas, en mesas montadas e decoradas por elas mesmas, seguindo as pertinentes normas estéticas e utilizando tan só materiais existentes na segunda metade do século XV, conformando unha obra deleitosa na que o público é tamén actor sobre o escenario da cidade vella.

Está pasando!

ven10maiConsultarFesta do Choco en Redondela10 , 11 e 12 de maio de 2023(Consultar: venres) Redondela

ven10mai20:00Proxección de 'Sica' en Redondelaciclo de cine galego20:00 Redondela

ven10mai20:00Oviravai presenta ‘O Violín de Luisa’ en Sanxenxo'sanxenxo fala'20:00 Sanxenxo

sáb11mai10:00XVI Sementeira e Música en Salvaterra de MiñoAsociación Cultural Quinta do Piñeiro10:00 Salvaterra de Miño

VER MÁIS AXENDA