O Ateneo Santa Cecilia organiza un encontro de música tradicional coa participación de Ferriñas, Luzada e Trompos ós Pés

9 Novembro 2026

No marco dos actos organizados polo Ateneo Santa Cecilia con motivo do seu 74º aniversario e da festividade de Santa Cecilia, o vindeiro venres 13 de novembro, ás 19:00 horas, o salón de actos do IES Illa de Tambo de Marín acollerá un encontro de música tradicional.

O evento reunirá no escenario a tres destacadas agrupacións da contorna: Ferriñas, Luzada e Trompos ós Pés, que ofrecerán un percorrido polos ritmos e melodías máis representativos do noso patrimonio musical.

A entrada é libre e gratuíta ata completar a capacidade da sala.

FERRIÑAS

Con case quince anos de historia, este grupo de cantareiras e pandeireteiras está integrado integramente por 20 mulleres cunha media de idade entre os 65 e os 80 anos, expoñente claro de que nunca é tarde para aprender e manter viva a nosa cultura.

Desde hai tres anos contan coa dirección de Berto e ensaian semanalmente no Multiusos da Praza de Abastos grazas á colaboración do Concello.

Nas súas actuacións están acompañadas polo propio mestre ao acordeón, Javier á gaita e Jose e Luis (da familia Lago) na percusión.

LUZADA

Nado hai dous anos por iniciativa do propio alumnado tras a disolución do seu anterior grupo, Luzada representa a frescura e a continuidade da música tradicional. Con dous grupos de ensaio adaptados á dispoñibilidade e nivel musical das persoas, actualmente é un grupo mixto con ampla presenza feminina.

Baixo a dirección da profesora Dámaris, a formación traballa na recuperación de pezas do folclore tradicional respectando a súa esencia orixinal. O seu nome, que evoca a primeira luz do día e o resplandor, foi elixido por votación polas súas compoñentes.

AGRUPACIÓN FOLKLÓRICA TROMPOS ÓS PÉS

Creada no 1978 en Marín (Pontevedra) pola iniciativa dunha mocidade comprometida coa difusión do folclore galego, conta cunha traxectoria de case medio século percorrendo a xeografía galega, estatal e internacional. Destaca pola súa rica variedade de vestiario tradicional e por un repertorio de bailes, músicas e cantos recompilados directamente en numerosas aldeas de Galicia.

Ao longo do seu percorrido, Trompos ós Pés compartiu escenario con agrupacións de países como Brasil, Arxentina, Eslovaquia, Venezuela, Holanda, Portugal, Bulgaria, Corea do Sur, Letonia, Rusia, Polonia ou Moldavia.

Entre os seus fitos destacan a participación na banda sonora da curtametraxe ‘El Sueño Matriusko’ (2003) de Mario Iglesias, o 2º Premio de pandeireteiras no concurso de Cantigas e Agarimos, a edición do seu disco ‘In Mare’ (2003) no seu XXV Aniversario e a colaboración coa Orquestra Sinfónica de Melide no musical Gallaecia (2008).

Así mesmo, no ano 2009 representaron a España no prestixioso VII International Folk Dance Festival Sudmalinas en Letonia, participaron nas gravacións dos discos ‘Ruído Branco’ e ‘Nostra Fortuna’ do grupo Liorna, publicaron o traballo Sarahyba (2016) e celebraron o seu 40º Aniversario en 2018 cun espectáculo especial xunto á Banda de Música Musimarín.

Está pasando!

lun09novConsultarPontedetapas 2026 en Pontevedrado 4 ao 22 de novembro  de 2026(Consultar: luns) Pontevedra

lun09nov11:00X Etiqueta Negra en Pontevedraa Feira do Gourmet Galego11:00 Pontevedra

lun09novConsultarProgramación 25N en Pontevedra ‘Guía fácil' para acabar coa violencia machista en 4 sinxelos pasos(Consultar: luns) Pontevedra

lun09nov19:00Proxección de 'Creatura' en PontevedraActividades previas dos Feroz 202719:00 Pontevedra

VER MÁIS AXENDA