Presentación da V Lérez Up | Concello de Pontevedra

A Lérez Up, o salón do videoxogo e da cultura friki de Pontevedra prepara a edición máis grande e ambiciosa organizada ata a data

2 Setembro 2026

O Recinto Feiral acollerá o evento os días 12 e 13 de setembro, estreando unha Zona Retro-Arcade con máquinas xaponesas e un xogo de rol masivo para todos os asistentes

A Lérez Up, o salón do videoxogo e da cultura friki de Pontevedra, prepárase para celebrar a súa quinta edición os próximos 12 e 13 de setembro no Recinto Feiral. Trátase da cita máis ambiciosa e de maior envergadura organizada ata a data, cunha programación que superará o cento de actividades, máis de 50 artistas e expositores, e máis de vinte torneos de nivel nacional e internacional.

Durante a presentación oficial do evento, o concelleiro Alberto Oubiña, amosou o seu total entusiasmo cunha proposta que cualificou como “máis que consolidada” e que dende o primeiro momento destacou por ter unha “potencia espectacular”.

Oubiña sinalou con orgullo o papel do Concello ao apoiar un proxecto impulsado con excelencia por xente nova, organizada arredor da Asociación de Videoxogos de Pontevedra Gaming Troop e o seu equipo de voluntariado.

O edil subliñou, ademais, que a Lérez Up é un claro exemplo de que a xuventude “ten capacidade para sacar adiante cousas grandes desde o pequeno, desde o cotián, desde a nosa cidade” e ver como estas se consolidan, avanzan e medran co tempo.

Pola súa banda, as representantes da organización compartiron esa mesma satisfacción polo camiño percorrido nestes cinco anos. Sonia Piñeiro botou a vista atrás para lembrar con emoción que “quen ía dicir fai 5 anos que seguiamos aquí facendo a quinta edición”, agradecendo o traballo conxunto de colaboradores, empresas e asociacións locais de Pontevedra que cada ano se unen ao evento e forman “unha pequena piña” onde se apoian de xeito mutuo.

Nesa mesma liña de expansión, a tamén organizadora Rocío Fernández fixo fincapé no crecemento a pasos xigantescos que experimenta o salón, o cal fixo necesaria unha “profesionalización da comunicación” coa estrea de canles web e redes sociais de uso exclusivo para o festival.

Fernández confesou o orgullo do equipo ao sentir que a Lérez Up se propaga “coma un virus moi positivo por todas as partes”, recoñecendo que o Recinto Feiral se está a quedar “bastante pequeno para todas as cousas que queremos facer”, o cal definiu como excelentes noticia.

Un salto internacional e grandes novidades interxeracionais

A quinta edición da Lérez Up consolídase como un referente non só en Galicia e no resto do Estado, senón tamén fóra das nosas fronteiras, con moita afluencia de afeccionados de Portugal e convidadas procedentes de Alemaña e da República Checa, esta última como parte do xurado do concurso de Cosplay.

Entre as principais novidades deste ano atópanse:

  • Zona Retro-Arcade (Patrocinada por WordPress.com): Definida pola organización como o seu maior logro ata a data. Trátase dun espazo que traerá recreativas clásicas xaponesas e consolas retro con títulos míticos como ‘Tetris’, ‘Metal Slug’ ou ‘Pacman’ co obxectivo de crear un evento interxeracional.
  • O Mando Único: Unha nova proposta interactiva en formato de xogo de rol masivo en vivo. Cunha narrativa propia onde os voluntarios actuarán como actores, calquera persoa que acceda ao Recinto Feiral formará parte deste universo e poderá realizar retos para conseguir puntos e facerse co “mando único”.
  • Zona Indie (Patrocinada por UNIR): Acollerá o maior número de estudos participantes ata a data, con oito videoxogos independentes. O público poderá utilizar o popular Pasaporte Indie para probar os videoxogos, obter os selos correspondentes e votar polo seu favorito para elixir o premio ao “Mellor Xogo Indie 2026”.
  • Torneos e Competicións: Os videoxogos serán protagonistas cun torneo nacional de ‘Super Smash Bros Ultimate’ (que xa supera os 100 inscritos), así como torneos de ‘League of Legends’, ‘Valorant’, ‘EA Sports FC 26’, ‘Mario Kart’, ‘Tekken 8’ e ‘Street Fighter ‘6.
  • Zona K-Pop: Amplía a súa programación cun concurso que contará con máis de vinte actuacións individuais e grupais, coas prazas xa esgotadas.
  • Cosplay e obradoiros: Concurso de cosplay cos premios patrocinados por Green Stuff World, ademais dunha Zona de Stands con máis de 50 ilustradores e artesáns e unha Zona de Talleres patrocinada por Comunicación para la Venta e Dixital Marketers.

O evento tamén integra a colaboración de colectivos locais como o Club de Esgrima de Pontevedra, que se suma este ano ao de Kendo, e de entidades coma a Biblioteca de Pontevedra, que se puxo en contacto coa organización para difundir o festival e dar a coñecer a súa colección de videoxogos, manga e cómics.

Entradas e Guía do Visitante

As entradas xa están dispoñibles na web lerezup.es a un prezo reducido ata o xoves 10 de setembro ás 15:00 horas, cun custo de 7 euros para un día e 10 euros para os dous días. A partir dese momento, poderanse adquirir na billeteira física do Recinto Feiral a un prezo de 8 euros por un día e 12 euros polos dous días.

A organización tamén puxo a disposición do público a Guía do Visitante en formato dixital na súa web e redes sociais (@lerez_up), un documento de 50 páxinas con toda a información detallada para preparar a visita.

Está pasando!

xov03setConsultarXXXII Festa dos Callos de Salceda de CaselasDo 3 ao 12 de setembro de 2026(Consultar: xoves) Salceda de Caselas

ven04setConsultarXXV Feira Franca de Pontevedra'as tabernas'(Consultar: venres) Pontevedra

ven04set12:00'Contos con xeito' de Bea Campos en SoutomaiorPrograma 'Ler conta moito'12:00 Soutomaior

sáb05set12:005º Festival de Charangas de Salceda de CaselasCharanga SGHAE e Concello de Salceda de Caselas12:00 Salceda de Caselas

VER MÁIS AXENDA