Uxía Blanco | MAC MARÍN

A Mostra do Audiovisual e Cinema de Marín presenta este sábado o xurado da súa V edición e pon en marcha o novo Cineclub Marín

7 Maio 2026

A Asociación Marín de Cine celebrará este sábado 9 de maio ás 12.15 horas no espazo A Bailona Gastrobar a presentación oficial do xurado da V edición de MAC MARÍN – Mostra do Audiovisual e Cinema de Marín, o primeiro festival de cinema impulsado na historia do municipio de Marín e unha das iniciativas culturais con maior proxección audiovisual da comarca nos últimos anos.

O acto estará encabezado polo director do certame, Dani Antelo, e servirá para presentar ante os medios de comunicación, profesionais do sector e comunidade cultural os tres integrantes do xurado oficial desta quinta edición: a actriz Uxía Blanco, o académico e crítico cinematográfico Severiano Casalderrey e o profesor, poeta e escritor Adolfo Caamaño.

Uxía Blanco, unha das actrices máis recoñecidas do audiovisual galego, foi protagonista de ‘Sempre Xonxa’, considerada a primeira longametraxe de ficción rodada integramente en galego, ademais de participar en títulos históricos como ‘A lingua das bolboretas’ e en series emblemáticas da TVG como ‘Mareas Vivas’ ou ‘Serramoura’. A intérprete xa fora homenaxeada por MAC MARÍN durante a terceira edición do festival.

Severiano Casalderrey | MAC MARÍN

Pola súa parte, Severiano Casalderrey conta cunha ampla traxectoria como investigador, crítico e divulgador cinematográfico, colaborando en medios especializados e formatos de análise audiovisual como podcasts e espazos radiofónicos centrados na actualidade cinematográfica e nos grandes festivais internacionais.

Adolfo Caamaño | MAC MARÍN

O xurado completarase coa presenza de Adolfo Caamaño, profesor durante décadas no colexio San Narciso de Marín e unha das voces literarias máis destacadas da comarca, cunha ampla produción poética e narrativa recoñecida en diversos certames galegos.

Tras a presentación institucional, Marín de Cine organizará unha charla-coloquio aberta ao público arredor do presente e futuro da produción audiovisual galega en lingua galega, nun encontro moderado polo propio Dani Antelo. A actividade funcionará ademais como punto de partida do novo Cineclub Marín, unha iniciativa coa que a asociación busca consolidar unha programación estable de cinema ao longo de todo o ano.

Este primeiro ciclo arrancará nas semanas posteriores á celebración das Letras Galegas coa proxección de dous títulos fundamentais da historia do audiovisual galego: ‘Mamasunción’ e ‘Sempre Xonxa’. A organización dará a coñecer proximamente os horarios e localizacións definitivas das exhibicións, que aspiran a contar co novo Auditorio Municipal como principal espazo anfitrión co apoio do Concello de Marín.

A través desta nova programación anual, MAC MARÍN – Mostra do Audiovisual e Cinema de Marín continúa ampliando a súa actividade cultural máis aló das datas oficiais do festival, reforzando ao mesmo tempo a internacionalización da sección Cinema Xove, que nesta quinta edición está rexistrando unha crecente participación de curtametraxes e traballos académicos procedentes de escolas de cinema e universidades de diferentes países europeos.

Está pasando!

xov07maiConsultarIII Certame Gastronómico TapeaPoio 2026do 1 ao 17 de maio de 2026(Consultar: xoves) Poio

xov07mai20:30'Querida Agatha Chistie' en VigoDirixida por Juan Carlos Rubio20:30 Vigo

ven08maiConsultarXXXIX Festa do Choco de Redondela 8, 9 e 10 de maio de 2026(Consultar: venres) Redondela

ven08maiConsultarXIII Festa do Viño de Vilaboa8, 9 e 10 de maio de 2026(Consultar: venres) Vilaboa

VER MÁIS AXENDA