O Ateneo Santa Cecilia comeza a nova tempada de exposicións coa inauguración de ‘Cianotipias’ de Santiago Leal Casás

2 Setembro 2026

O venres 4 de setembro, ás 20:00 horas, a sede do Ateneo Santa Cecilia comeza a nova tempada de exposicións coa inauguración de ‘Cianotipias’ do creador marinense Santiago Leal Casás.

A exposición estará aberta ao público na Sala de Exposición do Ateneo do 4 ao 18 de setembro. Poderase visitar de luns a venres, en horario de 18:00 a 20:30 horas.

A entrada é libre e de balde ata completar a capacidade do local.

Esta exposición está baseada na técnica de carácter artesanal da cianotipia. A base da mostra está dedicada a motivos vexetais aos que se engade o seu nome científico. Tamén se amosan outras obras de carácter máis experimental.

O método da cianotipia baséase en varios pasos, primeiro debemos elixir o soporte sobre o que queremos realizar a cianotipia. Pode ser papel, tea, madeira, cerámica, pedra, coiro… Logo elixiremos o motivo que desexamos mostrar. Neste caso Santiago Leal elixiu fotografías en branco e negro e como soporte optou por papel. Ás fotografías hai que darlles algo de contraste, facer un negativo desa foto e imprimir en acetato.

O seguinte paso é darlle ao papel un líquido baseado na mestura de dous produtos químicos, metade e metade. Isto hai que facelo nunha zona onde non entre a luz do sol. Deixaríase secar e, unha vez seco, ponse o negativo sobre o papel e expoñerase ao sol uns tres minutos, intentando que lle dea a luz dunha forma perpendicular. Pasados eses tres minutos, métese o papel a unha zona sen luz solar, e limparase o papel con varios baños de auga. Unha vez limpado con auga só queda poñelo a secar e xa estaría a nosa cianotipia rematada.

SANTIAGO LEAL CASÁS

Nado en Marín en 1966, Santiago Leal estudou Imaxe e Son na Coruña. En 1993 foi proxeccionista de cine, percorrendo moitos pobos de Galicia. Traballou en Radiotelevisión Compostela (1995) e na produtora CTV (1996-2004), onde estivo en títulos tan populares como ‘Pratos Combinados’, ‘Supermartes’, ‘Buscamos unha estrela’, ‘Toda unha vida’, ‘Pequeno Hotel’, ‘A noite en branco’, ‘Pepe o inglés’, ‘O Rei da comedia’…

Formou parte do equipo organizador das VII Xornadas internacionais de vídeo-Monográfico sobre infografía, en 1991, levadas a cabo polo Ateneo Santa Cecilia. Nestas xornadas realizouse unha das primeiras demostracións feitas en España de Televisión de Alta Definición, e participaron persoas de referencia, como Gustavo Martínez Schmidt, realizador do programa Metrópolis de TVE.

É afeccionado desde hai moito tempo a diversas expresións artísticas, como la fotografía ou a pintura, entre outras.

Está pasando!

xov03setConsultarXXXII Festa dos Callos de Salceda de CaselasDo 3 ao 12 de setembro de 2026(Consultar: xoves) Salceda de Caselas

ven04setConsultarXXV Feira Franca de Pontevedra'as tabernas'(Consultar: venres) Pontevedra

ven04set12:00'Contos con xeito' de Bea Campos en SoutomaiorPrograma 'Ler conta moito'12:00 Soutomaior

sáb05set12:005º Festival de Charangas de Salceda de CaselasCharanga SGHAE e Concello de Salceda de Caselas12:00 Salceda de Caselas

VER MÁIS AXENDA