Presentación da XXV Feira Franca | Concello de Pontevedra

A Feira Franca de Pontevedra celebra o seu 25º aniversario cunha viaxe no tempo polas tabernas e un gran espectáculo inaugural

26 Agosto 2026

O alcalde de Pontevedra, Miguel Anxo Fernández Lores, e o director artístico Pablo Méndez presentaron os detalles dunha edición especial que contará cunha ocupación hoteleira total e un show exclusivo de gran complexidade técnica

Pontevedra prepárase para revivir o seu esplendor medieval os vindeiros venres 4 e sábado 5 de setembro coa celebración da vixésimo quinta edición da Feira Franca. Trátase dun ano moi especial ao cumprirse un cuarto de século dunha festividade que o alcalde, Miguel Anxo Fernández Lores, definiu como unha gran “romería urbana” sostida sobre a activa e multitudinaria implicación cidadá.

O rexedor municipal subliñou que a Feira Franca é un evento masivo, de enorme importancia para Pontevedra e de gran calado entre a xente. “É unha festa para todos os pontevedreses, pero tamén para quen nos visitan”, afirmou Lores, quen lembrou que o nacemento da festa estivo ligado á posta en valor do dinamismo do centro histórico peonil.

A implicación social e comercial é histórica nesta edición: participarán máis de 100 establecementos de hostalería e haberá entre 160 e 164 espazos autorizados para comidas e ceas no espazo público. O mercado medieval contará con preto de 100 postos de artesanía e 47 de alimentación, distribuídos por un recinto que se amplía este ano cara á Alameda. A expectación é de tal magnitude que a ocupación hoteleira na comarca atópase ao 100 % (con reservas feitas desde hai catro meses).

O tema central deste 25º aniversario serán “As Tabernas”, destacadas polo alcalde como espazos de cohesión, relación social e unión comunitaria. Entre as principais novidades figura a recuperación da cervexa artesanal do convento de San Bieito (anterior ao ano 1467), unha iniciativa do actual párroco de Lérez que traerá de volta este produto á feira.

No eido organizativo, ante o peche do edificio principal, a planta baixa da Casa Consistorial converterase no hospital de campaña para o operativo especial sanitario, que contará con médicos, profesionais de enfermaría e ambulancias distribuídas de xeito estratéxico por todo o mapa da festa.

Presentación da XXV Feira Franca | Concello de Pontevedra

“ALDARA”: UN ESPECTÁCULO INAUGURAL ÚNICO E DESEÑADO EN EXCLUSIVA

O venres 4 de setembro ás 22:00 horas terá lugar o esperado espectáculo de inauguración a cargo da recoñecida compañía Pablo Méndez Performances. O seu fundador e director, Pablo Méndez, desvelou que a responsabilidade de conmemorar os 25 anos levounos a deseñar un show de gran complexidade técnica que requirirá iniciar a montaxe xa desde o luns previo, un esforzo loxístico sen precedentes para a compañía.

O espectáculo xirará en torno a Aldara, unha moza que asume as rendas da taberna da súa defunta nai en 1467. A través desta dramaturxia, búscase poñer en valor o papel histórico da muller como empresaria e motor da sociedade. Mentres agarda pola chegada do viño do Ribeiro para saldar as débedas cun recadador de impostos, Aldara compartirá co público as fantásticas historias que viaxeiros, trobadores e soldados contaron na súa taberna.

Méndez destacou que se trata dunha produción completamente exclusiva —desde o vestiario ata a dramaturxia e o deseño do escenario— deseñada especificamente para ese día. A montaxe mobilizará a un equipo de arredor de 100 persoas, incluíndo un elenco de 30 artistas chegados de diferentes puntos do Estado e de Europa, e a colaboración de máis de 20 empresas de iluminación, son e escenografía.

PROGRAMA DA XXV FEIRA FRANCA

O programa da XXV Feira Franca, dispoñíbel en feirafranca.gal, inclúe todas as actividades con cadanseus horarios, ademais de contar cun mapa infográfico do centro histórico de Pontevedra e da distribución dos puntos de interese.

VENRES 4 DE SETEMBRO | XORNADA INAUGURAL

  • 19.00h. Pregoeiros a cabalo anuncian o comezo da XXV edición da Feira Franca polo Centro Histórico.
  • 22.00h. Espectáculo inaugural da Feira Franca: ‘As Tabernas’. Compañía Pablo Méndez Performance. Praza da Ferraría.

SÁBADO 5 DE SETEMBRO | DÍA DA FEIRA FRANCA

  • 11.00h. Desembarco na ponte do Burgo da cervexa do Ollo Redondo.
  • 11.30h. Apertura do mercado medieval (avda. de Santa María) e da mostra de oficios (prazas da Ferraría, da Pedreira e do Peirao).
  • 12.00h. Recreación do transporte do viño. Asoc. Recriativa de Xeve, A Xanela do Maxín, Troula, Duos Pontes; con música e representacións. Percorrido: rúas de Santa Clara, Sarmiento, Pasantaría, praza da Ferraría e remate na praza da Peregrina.
  • 12.30h. Cantar de cego e música medieval. Foula, Centro Histórico.
  • 12.30h. Demostración e obradoiros de esgrima. Escola Hungaresa, Montero Ríos.
  • 13.00h. ‘As Lendas do Camiño do Bruxo do Lerce’. Grupo Adarve, Centro Histórico.
  • 13.00h. Tiro con arco. Boa Vila, Montero Ríos.
  • 17.00h. Demostración e obradoiros de esgrima. Escola Hungaresa, Montero Ríos.
  • 17.30 h. Gran torneo medieval. Hípica Celta, praza de touros. Entrada de balde ata completar capacidade, portas 2, 3 e 6.
  • 17.30h. Pasarrúas Os Vikingos do Valhalla. Compañía La Fiesta Escénica, Centro Histórico.
  • 18.00h. Cantar de cego e música medieval. Foula, Centro Histórico.
  • 18.00h. ‘A galiña dos ovos de ouro’. Art Monium.
  • 18.00h. ‘Os bufóns e trobadores’. Troula.
  • 18.00h. Música e bailes medievais. Asociación de Coros e Danzas Duos Pontes, Peregrina.
  • 18.30h. Tiro con arco. Boa Vila, Montero Ríos.
  • 18.30h. ‘As Lendas do Camiño do Bruxo do Lerce’. Grupo Adarve, Centro Histórico.
  • 19.00h. Pasarrúas Os Vikingos do Valhalla. La Fiesta Escénica, Centro Histórico.
  • 19.00h. Contacontos a Corsaria Lola. Pedreira.
  • 19.30h. Pasarrúas: Art Monium e O Gran Dragón. Centro Histórico.
  • 20.00h. Gran torneo medieval. Hípica Celta, praza de touros. Entrada de balde ata completar capacidade, portas 2, 3 e 6.
  • 20.00 h. ‘As Lendas do Camiño do Bruxo do Lerce’. Grupo Adarve, Centro Histórico.
  • 21.00h. Cantar de cego e música medieval.
  • 21.30h. Pasarrúas: Os Vikingos do Valhalla, Errantes e A Santa Compaña. Centro Histórico.
Está pasando!

ven11setConsultarFestival Revenidas 2026 en Vilaxoán11, 12 e 13 de setembro de 2026(Consultar: venres) Vilagarcía de Arousa

ven11set19:00Concerto de Carmen Prieto en PontevedraHomenaxe a cantautores chilenos e hispanoamericanos19:00 Pontevedra

sáb12setConsultarV Lérez Up en Pontevedra salón do videoxogo e da cultura friki de Pontevedra(Consultar: sábado) Pontevedra

sáb12setConsultarIII Festa da Temporada en Mondariz Balneario12 e 13 de setembro de 2026(Consultar: sábado) Mondariz Balneario

VER MÁIS AXENDA