Presentación de ‘Titirivedra 2026’ | Concello de Pontevedra

Titirivedra encherá Pontevedra de monicreques internacionais e locais con espectáculos infantís e de adultos

10 Xullo 2026

O festival celebrarase do 13 ao 18 de xullo nos xardíns de Marescot e na praza do Teucro

Pontevedra acollerá do 13 ao 18 de xullo unha nova edición do festival Titirivedra, un evento deseñado para achegar a arte dos monicreques a toda a cidadanía. As funcións desenvolveranse nos xardíns de Marescot ás 19.00 horas para o público infantil, mentres que a praza do Teucro acollerá os espectáculos dirixidos a adultos as noites do luns e do martes ás 22.00 horas.

O concelleiro de Festas, Demetrio Gómez, salientou que a programación se planificou para ofrecer propostas de calidade nas Festas do verán. “Teñen que ser festas para todos e para todas, especialmente para as crianzas”, explicou Gómez, quen puxo en valor que Pontevedra aposta por diversificar as disciplinas artísticas durante o verán.

O concelleiro sinalou tamén que a interacción física e teatral cos monecos supón unha alternativa indispensable fronte ao consumo de contidos dixitais, destacando que as crianzas gozan moito desta experiencia directa.

Pola súa banda, Borja Insua definiu a carteleira deste ano como unha proposta equilibrada e de proxección internacional, que reúne a creadores de Arxentina, Euskal Herria e Galicia. Insua subliñou o interese de contar con Manuel Mansilla, recoñecido no ámbito internacional polo seu traballo en Europa, quen ofrecerá pases para nenos e adultos. Do mesmo xeito, destacou a combinación de formacións históricas do teatro galego como Os Monicreques de Kukas co talento emerxente de novas compañías locais como Titiritrés.

O responsable da compañía Kalina Teatro, Plamen Dipchikov, detallou a súa experiencia coa obra Limonardo dá vento, que se representará durante o festival. Dipchikov expuxo que o espectáculo afonda na procura de respostas e no camiño da vida a través dunha criatura nacida dun limón. “Ao final resulta que sempre vence o que insiste, o que persigue a súa razón, o que defende a verdade e a xustiza sobre todo”, engadiu o creador galego-búlgaro.

A programación completa do ciclo estrutúrase do seguinte xeito:

Luns 13

  • 19.00 h: Titiritrés (Galiza) representa ‘Emotivas’ nos Xardíns do Doutor Enrique Marescot.
  • 22.00 h: Manu Mansilla (Arxentina) presenta a obra para adultos ‘Cóctel’ na Praza do Teucro.

Martes 14

  • 19.00 h: Manu Mansilla (Arxentina) ofrece o espectáculo ‘Títeres a cielo abierto’ nos Xardíns do Doutor Enrique Marescot.
  • 22.00 h: Fantoches Baj (Galiza) presenta a obra para adultos ‘Castelao, un corazón á intemperie’ na Praza do Teucro.

Mércores 15

  • 19.00 h: Kalina Teatro (Galiza) representa ‘Limonardo dá vento’ nos Xardíns do Doutor Enrique Marescot.

Xoves 16

  • 19.00 h: Os Monicreques de Kukas (Galiza) ofrece a obra ‘Xan Perillán, compra queixo, compra pan’ nos Xardíns do Doutor Enrique Marescot.

Venres 17

  • 19.00 h: Títeres Babaluva (Galiza) presenta ‘Feira das sementes’ nos Xardíns do Doutor Enrique Marescot.

Sábado 18

  • 19.00 h: Ostomila (Euskal Herria) pecha o ciclo coa obra ‘Alaia’ nos Xardíns do Doutor Enrique Marescot.
Está pasando!

ven10xulConsultarFestas do Carme 2026 en Marín'un xeito de vivir o verán'(Consultar: venres)

ven10xul20:30Concertos de Verán de Soutomaior 2026Talco, De Ninghures, 9 louro e La Duendedena20:30 Soutomaior

ven10xul23:00Proxección de 'Arco'en PontevedraCiclo 'Cinema e Estrelas'23:00 Pontevedra

sáb11xulConsultarRoteiros Ambientais e Culturais en Redondela16 actividades ao longo do mes de xullo(Consultar: sábado) Redondela

VER MÁIS AXENDA