Recreación do transporte do viño na Feira Franca | Concello de Pontevedra

XXIV Feira Franca de Pontevedra

sáb06set11:30XXIV Feira Franca de Pontevedra5 e 6 de setembro de 202511:30 Centro Histórico de Pontevedra - Pontevedra

Detalles do Evento

A Feira Franca é, dende hai anos, unha cita ineludíbel para as xentes de Pontevedra e os milleiros de visitantes que veñen gozar dela, procedentes de todos os recunchos do país e máis alá das nosas fronteiras.

É un peche apoteósico dos días de verán creado por e para a xente, unha viaxe ao século XV participada por toda unha cidade.

É unha vivencia única habitada por artesáns, canteiros, ferreiros, palilleiras, cesteiros, oleiros, redeiras, carpinteiros, músicas, xograres, campesiños, toneleiros, artistas, comerciantes, damas e cabaleiros.

Achéganos o tempo do privilexio concedido a Pontevedra polo rei Henrique IV, no ano 1467, en virtude do cal se autorizaba a celebración dun mercado libre de impostos dun mes de duración.

A Feira Franca, que ten lugar na zona monumental da capital do Lérez todos os anos na primeira fin de semana de setembro, toma forma dende o ano 2000 coa organización de diversas actividades lúdicas de raigame histórica.

Actividades que van dende a representación do transporte do viño ou o imperdíbel torneo medieval, ata os espectáculos de cetraría, tiro con arco, esgrima ou as exhibicións de música e danza que enfeitizan as xornadas do venres a partir do serán e mais de todo o sábado.

Pero, sobre todo, o que fai especial e distinta esta festa medieval, declarada Festa de Interese Turístico pola Xunta de Galicia en 2013, son os milleiros de persoas que se visten de época para xantaren nas prazas e rúas, en mesas montadas e decoradas por elas mesmas, seguindo as pertinentes normas estéticas e utilizando tan só materiais existentes na segunda metade do século XV, conformando unha obra deleitosa na que o público é tamén actor sobre o escenario da cidade vella.

O programa da XXIV Feira Franca, dispoñíbel na web oficial da Feira Franca, inclúe todas as actividades cadanseus horarios, ademais de contar cun mapa infográfico do centro histórico de Pontevedra e da distribución dos puntos de interese.

VENRES 5 DE SETEMBRO | XORNADA INAUGURAL

  • 19.00 h Pregoeiros a cabalo anuncian o comezo da XXIV edición da Feira Franca polo centro histórico.

  • 22.00 h Espectáculo inaugural da Feira Franca: As Meigas, a cargo da compañía Pablo Méndez Performance na Ferraría.

SÁBADO 6 DE SETEMBRO | DÍA DA FEIRA FRANCA

  • 11.30 h Apertura do mercado medieval (avda. de Santa María) e da mostra de oficios (praza da Ferraría, Pedreira e do Peirao).

  • 12.00 h Recreación do transporte do viño pola asoc. Recriativa de Xeve, A Xanela do Maxín, Troula, Duos Pontes, música, representacións… Percorrido: rúas de Santa Clara, Sarmiento, Pasantaría, praza da Ferraría e remate na praza da Peregrina.

  • 12.30 h Cantar de cego e música medieval a cargo de Foula polas rúas do centro histórico.

  • 12.30 h Demostración e obradoiros de esgrima. Escola Hungaresa, Montero Ríos.

  • 13.00 h Grupo de animación. As Lendas do Camiño do Bruxo do Lerce.

  • 13.00 h Tiro con arco. Boa Vila, Montero Ríos.

  • 17.00 h Demostración e obradoiros de esgrima. Escola Hungaresa, Montero Ríos.

  • 17.30 h Gran torneo medieval. Hípica Celta, praza de touros. Entrada de balde ata completar capacidade; polas portas 2, 3 e 6.

  • 18.00 h Cantar de cego e música medieval a cargo de Foula polas rúas do centro histórico.

  • 18.00 h A galiña dos ovos de ouro. Art Monium.

  • 18.00 h Os bufóns e trobadores de Troula.

  • 18.00 h Música e bailes medievais. Asociación de Coros e Danzas Duos Pontes, Peregrina.

  • 18.30 h Tiro con arco. Boa Vila, Montero Ríos.

  • 18.30 h Pasarrúas Os Vikingos do Valhalla, La Fiesta Escénica polas rúas e prazas.

  • 18.30 h Animación. As Lendas do Camiño do Bruxo do Lerce a cargo de Polavila.

  • 19.30 h Pasarrúas. Art Monium, centro histórico.

  • 19.30 h Pasarrúas. A Lenda, centro histórico.

  • 20.00 h Gran torneo medieval. Hípica Celta, praza de touros. Entrada de balde; portas 2, 3 e 6.

  • 20.00 h Animación. As Lendas do Camiño do Bruxo do Lerce a cargo de Polavila.

  • 21.00 h Música medieval. Cantares de cego.

  • 21.45 h Pasarrúas SuvUmbra, centro histórico.

  • 22.00 h Pasarrúas. A Santa Compaña, A Xanela do Maxín, centro histórico.

LEVA UN RECORDO DE BALDE

  • Diario de Pontevedra. Raíña Vitoria. De 12.00 a 14.00 e de 15.00 a 18.30 h

XOGOS PARA NENOS E NENAS

  • RAÍÑA VITORIA. CASTELO MEDIEVAL

    • De 11.00 a 21.00 h Carruseis medievais para a cativada

    • De 12.00 a 14.00 e de 16.00 a 20.00 h Circuíto de xogos

  • PONTE DO BURGO

    • De 12.00 a 21.00 h Xogos tradicionais

  • SOPORTAIS DA PEDREIRA

    • De 12.00 a 14.00 e de 18.00 a 20.00 h Obradoiros creativos

    • De 12.00 a 14.00 e de 17.00 a 20.00 h Ludoteca medieval

  • PRAZA DE ESPAÑA

    • De 11.00 a 21.00 h Carruseis medievais para a cativada

    • A partir das 12.00 h Campamento medieval

Hora

(Sábado) 11:30

Localización

Centro Histórico de Pontevedra

Está pasando!

dom27set09:00dom14:30Mercadillo de antigüidades en PontevedraTodos os domingos na rúa Serra09:00 - 14:30 Pontevedra

dom27set21:00De Ste Xeito Producións presenta 'Señores' en Sanxenxounha comedia machirula21:00 Sanxenxo

VER MÁIS AXENDA