© Museo de Pontevedra

O claustro do Sarmiento acolle as catorce propostas de artistas noveis que forman parte da exposición ‘Novos Valores 2021. Obra seleccionada’

17 Xullo 2021

Rebeca Lar, coa peza ‘Sen Título (Sobre paseos e arrepentimentos)’; Adrián Solleiro con ‘Reflexión’, Diego del Río con ‘Ras Al Hanout II’ e Daniel Cerecedo con ‘Picasso y Richter (después de)’, resultaron as persoas merecedoras das bolsas do certame Novos Valores na súa edición de 2021.

A calidade e a carga conceptual das tres creacións pictóricas e a escultórica fixeron que foran elixidas por unanimidade polo xurado, que estivo integrado por José Manuel Rey, director do Museo de Pontevedra; María Covadonga Barreiro Rodríguez-Moldes, profesora asociada na Facultade de Belas Artes de Pontevedra; Itziar Ezquieta Lamas, artista plástica e profesora asociada da Facultade de Ciencias da Educación e do Deporte de Pontevedra; Carmen Hermo Sánchez, artista e profesora asociada na Facultade de Belas Artes de Pontevedra; Pilar Corredoira, historiadora de Arte Contemporánea e comisaria de exposicións; e Javier Pérez Buján, director artístico da Fundación Laxeiro.


‘Reflexión’, de Adrián Solleiro González | © Museo de Pontevedra
‘Sen título (sobre paseos e arrepentimentos’, de Rebeca Lar | © Museo de Pontevedra
‘Ras Al Hanout II’, de Diego del Río Comesaña | © Museo de Pontevedra
Picasso y Richter (Después de)’, de Daniel Cerecedo Bretal | © Museo de Pontevedra

As catro obras formarán parte da exposición ‘Novos Valores 2021. Obra seleccionada’ que poderá visitarse ata o 12 de setembro no Edificio Sarmiento, xunto a outras dez pezas escollidas como as mellores das 29 presentadas.

Está pasando!