Parque Forestal da Tomba | Concello de Pontevedra

O Concello de Pontevedra lanza unha nova edición do programa ‘O monte é teu’, cunha chea de actividades para gozar da natureza

21 Maio 2025

Xa é posíbel realizar a inscrición nas primeiras actividades, que comezarán o 23 de maio e finalizarán o vindeiro 21 de xuño, tendo como escenario os parques forestais da Fracha, Pontillón do Castro e A Tomba

A concelleira de Montes, María José Abilleira, presentou este martes, 20 de maio, unha nova edición do programa ‘O monte é teu’, unha iniciativa xa consolidada na axenda municipal tralo éxito dos anos anteriores, éxito que amosa o grande interese da cidadanía pontevedresa á hora de coñecer os seus montes e as posibilidades de ocio que estes poden ofrecer.

Abilleira explica que desde o Concello «seguimos apostando con forza por poñer en valor o uso e gozo dos nosos parques forestais», considerados espazos únicos que combinan natureza, lecer e identidade. «O obxectivo é que as familias, a mocidade e tamén a xente maior se achegue ao monte para coñecer cada un dos seus recunchos».

Presentación do programa ‘O monte é teu’ 2025 | Concello de Pontevedra

Nesta nova edición levarase a cabo unha ampla programación de até 20 actividades, pensadas para realizar en familia e con xente de todas as idades. O fío condutor é o coñecemento da biodiversidade destes espazos forestais dende unha perspectiva lúdica. «Queremos que as persoas aprendan xogando, atopen especies autóctonas, entendan o valor dos nosos ecosistemas e gocen dos nosos espazos naturais».

As actividades desenvolveranse dende o 23 de maio ata o 21 de xuño, repartidas nos tres parques forestais de Pontevedra, con seis actividades no parque forestal da Fracha, oito no da Tomba e seis na contorna do Pontillón do Castro. En total, o Concello ofertará de xeito libre e gratuíto un total de 450 prazas.

Repetiranse actividades de gran acollida como as rutas interpretativas, a observación astronómica, os xogos tradicionais ou as observación directas de plantas e animais; sempre cun enfoque creativo e de respecto polo medio. Como novidade este ano, inclúense obradoiros artísticos e creativos, coñecemento de plantas para uso cotián e actividades deportivas como o paddle surf.

Os prazos de inscrición xa están abertos para as primeiras actividades. Por mor da gran acollida que teñen estes obradoiros e sendo as prazas limitadas, recoméndase apuntarse canto antes, pois as prazas adxudícanse por rigorosa orde de chegada. É posíbel realizar esta inscrición a través desta ligazón. Existe un límite de catro prazas por cada persoa na inscrición.

«O programa ‘O Monte é teu’ é unha mostra do noso orgullo polo rural, pola nosa terra, polas nosas tradicións e pola xente que vive e coida deses espazos durante todo o ano», explicou Abilleira. «O Concello quere agradecer a gran xenerosidade das Comunidades de Montes de Marcón, Tomeza, Canicouva, Campañó e Verducido pola cesión dos espazos. O monte é de todos, cómpre vivilo, gozalo e respectalo».

PROGRAMA:

Maio

  • Venres 23 de maio. O Bestiario Máxico. A Fracha. Actividade nocturna, de 21:00 a 22:30
  • Sábado 24 de maio. Lugares Máxicos. A Fracha. De 11:30 a 13:00
  • Sábado 24 de maio. Ludonatura. O Pontillón do Castro. De 10:30 a 12:30
  • Domingo 25 de maio. Buscando o Norte. A Tomba. De 10:00 a 13:00
  • Domingo 25 de maio. A Música da Natureza. O Pontillón do Castro. De 17:00 a 19:00
  • Venres 30 de maio. Observación Astronómica. A Tomba. Actividade nocturna, de 23:00 a 01:00
  • Sábado 31 de maio. Cómete o Monte. A Fracha. De 10:00 a 13:00
  • Sábado 31 de maio.Baño de Bosque. A Tomba. De 10:00 a 12:30
  • Sábado 31 de maio. Kaiak. O Pontillón do Castro. De 11:00 a 13:30

Xuño

  • Domingo 1 de xuño. Obradoiro de Petróglifos. A Tomba. De 11:00 a 13:00
  • Sábado 7 de xuño. Ioga en Familia. A Tomba. De 17:30 a 19:00
  • Sábado 7 de xuño. Paddle Surf. O Pontillón do Castro. Quendas de 10:00 a 11:00, de 11:30 a 12:30 e de 13:00 a 14:00
  • Domingo 8 de xuño. A Procura do Tesouro. Pontillón do Castro. De 10:00 a 13:00
  • Domingo 8 de xuño. Aves e Caixas Niño. A Tomba. De 10:30 a 13:30
  • Sábado 14 de xuño. Descubre os Parques Forestais. A Fracha. De 10:00 a 13:00
  • Sábado 14 de xuño. Ventá Silvestre. A Tomba. De 11:30 a 13:00
  • Domingo 15 de xuño. Rastros e Pegadas. A Fracha. De 11:00 a 13:00
  • Domingo 15 de xuño. Naturalismo. A Tomba. De 10:00 a 13:00
  • Domingo 15 de xuño. Personaxes de Conto. A Fracha. De 17:30 a 18:30
  • Sábado 21 de xuño. Os Xoguetes de Sempre. O Pontillón do Castro. De 17:00 a 19:00
Está pasando!

sáb21xuñConsultar‘A Lanzada na Historia’20, 21 e 22 de xuño de 2025(Consultar: sábado) Sanxenxo

sáb21xuñConsultar'O monte é teu’ nos parques forestais de PontevedraActividades en familia nos parques forestais de pontevedra(Consultar: sábado) Pontevedra

sáb21xuñConsultarMundial Multisport Pontevedra 2025Do 19 ao 29 de xuño de 2025(Consultar: sábado)

sáb21xuñ11:00Paseo sobre a historia da poesía no Concello de PontevedraPontevedra Poética11:00 Pontevedra

VER MÁIS AXENDA