Sinsal 2021 – Queralt Lahoz | © Olalla Lojo

Os abonos do Sinsal SON Estrella Galicia 2022 sairán á venda o vindeiro xoves 26 de maio

20 Maio 2022

  • O festival, que celebrará entre o 22 e o 24 de xullo a súa 20º edición, activa a venda de abonos a prezo reducido para o público, que poderá gozar de tres xornadas de propostas musicais de vangarda e contacto coa natureza en San Simón
  • As e os asistentes que embarquen desde Vigo terán cada xornada un concerto extra e, por segundo ano consecutivo, o festival comisariado por Sinsalaudio programará artistas diferentes para cada día, dos que un 90% tocarán por vez primeira en Galicia
  • As entradas de día (para acceder unicamente ao festival o venres 22, sábado 23 ou domingo 24 e que tamén inclúen transporte marítimo) poderanse adquirir a partir do luns 30 na plataforma www.enterticket.es

O festival Sinsal SON Estrella Galicia activará a semana que vén a venda de abonos para a súa nova edición, que se celebrará os días 22, 23 e 24 de xullo na illa de San Simón. A cita musical, impulsada por Sinsalaudio, recupera logo de dúas edicións os abonos para o público, o que permitirá gozar, por un prezo reducido, de tres xornadas de directos con propostas musicais contemporáneas e diversas, en canto a estilo e orixe das bandas; ademais do contacto coa natureza e dunha viaxe en barco de ida e volta desde o litoral até a illa redondelá, situada no corazón das Rías Baixas.

Un dos principais atractivos desta edición será que, por segundo ano consecutivo, a programación secreta de cada xornada será completamente diferente a do día anterior, de xeito que cada día actuarán artistas diferentes, dos que un 90% tocarán por vez primeira en Galicia. Outro dos alicientes deste ano é que Sinsal SON Estrella Galicia retomará o seu horario habitual, de xeito que, mentres que a xornada do vernes será de tarde, tanto o sábado coma o domingo o festival desenvolverase ao longo de toda a xornada, desde pola mañá até o luscofusco.

O día 26, a partir das 11.00 horas, o público poderá adquirir os seus abonos de tres días a través da plataforma web www.enterticket.es, na que poderá seleccionar o seu abono en función do embarcadoiro desde o que desexe viaxar a San Simón: como é habitual, estarán situados no porto de Vigo e Meirande (xunto ao Centro de Interpretación de Rande). Aquelas persoas que decidan partir desde a cidade olívica gozarán dunha viaxe máis longa en barco, unha estancia de maior tempo na illa e, ademais, dunha bóla extra: cada xornada poderán desfrutar dun concerto máis ao desembarcar en San Simón.

Alén do punto de embarque, os prezos dos abonos variarán en función da idade do público (maior ou menor de 16 anos). Por unha banda, no caso das persoas adultas, os abonos de Vigo terán un prezo inicial reducido de 119 euros, mentres que no caso de Meirande o prezo de partida será 105 euros. Pola outra, o prezo deste tipo de entrada para as e os menores de 16 anos, ou que teñan esa idade no momento de celebración do festival, será de 45 euros (Vigo) ou 40 euros (Meirande). Como novidade, este ano Sinsal incorpora a posibilidade, grazas á colaboración que a Asociación de Festivais de Galicia mantén coa Xunta de Galicia, de que as persoas usuarias do Carné Xove poidan optar a un desconto do 15% sobre o prezo inicial á hora de adquirir os abonos, que se realizará sobre as primeiras 100 compras.

A organización recorda que o número de abonos de Sinsal SON Estrella Galicia, como é habitual, é limitado e convida ao público a non quedar sen a oportunidade de descubrir as músicas locais, nacionais e internacionais que se agochan este ano baixo o seu cartel. Para calquera dúbida, o festival lembra que se pode visitar a páxina de FAQ no espazo web oficial do festival,  http://festival.sins.al.

Entradas de día

De cara á semana seguinte, o luns 30, sairán á venda as entradas de día de Sinsal SON Estrella Galicia. Todas aquelas persoas interesadas nesta modalidade de entradas, que inclúen tamén o traslado á illa desde Meirande ou Vigo, poderán adquirilas a partir das 11.00 horas a través da plataforma www.enterticket.com.

Ao igual que no caso dos abonos, o prezo dos billetes variará en función da idade (persoas maiores ou menores de 16 anos) e do embarcadoiro no que se tome o barco. Ademais, as entradas do venres 22 serán máis reducidas (40 euros desde Vigo ou 35 euros desde Meirande, sendo a entrada de menores de 12 euros nos dous casos) ao desenvolverse en horario de tarde, mentres que as entradas do sábado 23 e do domingo 24 permitirán gozar dunha xornada completa de estancia en San Simón: desde pola mañá até a noite. Así, estas últimas serán de 50 euros cada día se o barco sae de Vigo (18 euros no caso de menores) e 45 euros se se toma desde Meirande (15 euros para menores). Todos os horarios de barcos e prezos están dispoñibles na web http://festival.sins.al, na que toda a información estará actualizada para consulta do público.

SINSAL SON ESTRELLA GALICIA

Sinsal SON Estrella Galicia é un dos encontros sonoros máis coidados e singulares do panorama musical estatal. Desde os seus inicios, a promotora viguesa Sinsalaudio impulsou un evento cultural para visualizar as artistas próximas á creación contemporánea da escena galega e estatal, mais tamén con espazo bandas do ámbito internacional; artistas que, máis adiante, formaron parte de carteis de grandes festivais e de salas de concertos de todo o mundo. Ao longo destas dúas décadas, Sinsalaudio xerou un ecosistema único no panorama de eventos musicais e, desde 2010, celebra o Sinsal SON Estrella Galicia na illa de San Simón, do que salienta o seu cartel: un programa secreto para as e os asistentes, que confían no criterio de Sinsalaudio para gozar das creacións máis estimulantes e vangardistas.

Está pasando!

xov25abr17:30Visitas guiadas á mostra ‘Comedy Wildlife’ en VigoCOMEDY WILDLIFE PHOTOGRAPHY AWARDS17:30 Vigo

xov25abr19:15xov20:45Proxección de 'Hit the Road' en Vigo'NO CAMIÑO. PELÍCULAS DE ESTRADA, VIEIROS E HORIZONTES'19:15 - 20:45 Vigo

xov25abr20:00Teatro espontáneo no Mercado de PontevedraTodos os 4º xoves de cada mes20:00 Pontevedra

ven26abrConsultarLXIV Festa da Lamprea de Arbo 26, 27 e 28 de abril de 2024(Consultar: venres) Salvaterra de Miño

VER MÁIS AXENDA