Estíbaliz Urresola | © FICBUEU

A guionista de ‘20.000 especies de abellas’ titorizará en Ons o desenvolvemento de catro proxectos de curtametraxes

20 Maio 2024

  • A convocatoria para optar á participación no programa formativo da II Residencia FICBUEU, que implica ademais a produción dunha das curtametraxes, está aberta ata o 10 de xuño
  • O cineasta catalán Jordi Sanz Angrill avanza coa produción de ‘Sismes’, o filme escollido na primeira edición do programa para ser producido co apoio do Festival

Será na Illa de Ons. Entre o 16 e o 23 de outubro. Catro creadoras e creadores audiovisuais traballarán da man de catro especialistas consolidadas no sector para avanzar no desenvolvemento de cadanseu proxecto de curtametraxe. Será a II Residencia FICBUEU. O programa formativo acada a súa segunda edición. Estíbaliz Urresola, cuxo traballo recente máis destacado foi o guión da premiada longametraxe ‘20.000 especies de abellas’, titorizará os catro proxectos participantes.

As actividades da II Residencia FICBUEU, inclúen titorías individualizadas e grupais relacionadas co desenvolvemento de guión e dirección. Ademais, haberá formacións específicas en tres áreas relacionadas coa produción dun filme.

A guionista Carmen Ávalos impartirá formación en ‘Guión con perspectiva de xénero’. A produtora Beli Martínez sobre os ‘Primeiros pasos tras a finalización dun guión’. Sobre a ‘importancia da coordinación de intimidade nunha rodaxe’ impartirán clases Tábata Cerezo e Lucía Delgado. A súa empresa, Intimact, traballa con produtoras audiovisuais asesorándoas sobre a mellor maneira de afrontar a rodaxe das escenas íntimas de cada ficción.

Producións participantes na I Residencia

O Festival Internacional de Cinema de Bueu, FICBUEU, promove o proxecto por segundo ano consecutivo. Na primeira edición, a de 2023, as catro creadoras e creadores participantes traballaron en Ons no desenvolvemento de cadanseu filme. Tiveron coma titora á guionista de filmes coma ‘As Bestas’, Isabel Peña.

O proxecto de Residencia mereceu en 2023 o apoio do Ministerio de Cultura e da Axencia Galega das Industrias Culturais. De entre as curtametraxes participantes, unha está en desenvolvemento grazas ao primeiro impulso recibido co premio desta primeira edición. As outras tres persoas participantes tamén están desenvolvendo os seus proxectos.

A illa de Lanzarote acolle a rodaxe da curtametraxe seleccionada para a súa produción co apoio do Festival. Tratase de ‘Simes’, do realizador catalán Jordi Sanz Angrill. O filme recibiu 15.000 euros do festival logo de pasar polas actividades de desenvolvemento de titoría e formación pola Illa de Ons.

As bases e o formulario de inscrición para a II Residencia FICBUEU están na páxina web do Festival Internacional de Cinema de Bueu. O prazo de presentación de candidaturas está aberto ata o 10 de xuño.

Está pasando!

sáb27xulConsultarFestival Sinsal 202426, 27 e 28 de xullo de 2024(Consultar: sábado) Illa de San Simón

sáb27xul13:00Concertos Feroz en Pontevedra27 e 28 de xullo de 202413:00 Pontevedra

sáb27xul19:00Andainas Saudables da Eurocidade Tui-ValençaDo 7 de abril ao 15 de decembro de 202419:00 Eurocidade Tui-Valença

sáb27xul20:00'Asdomare' con Rilo & Penadique en VilaboaEspectáculo de Teatro a cargo de Rilo & Penadique20:00 Vilaboa

VER MÁIS AXENDA