Play-Doc, Festival Internacional de Cinema de Tui, presenta catro retrospectivas inéditas en España

29 Abril 2022

Nunha traxectoria que en breve abarcará dúas décadas, o festival tudense destaca por presentar primeiras retrospectivas en España, dedicadas tanto a recoñecidos directores e figuras lendarias do cinema documental, como a outros moitos cineastas esquecidos, censurados, perdidos ou sinxelamente descoñecidos. Este labor de recuperación, redescubrimiento e reivindicación volve estar fortemente presente nesta próxima edición, que se celebrará do 4 ao 8 de maio en Tui.

HELKE MISSELWITZ

Play-Doc presentará por primeira vez en España unha retrospectiva dedicada á cineasta alemá Helke Misselwitz (1947), unha das realizadoras máis importantes da última xeración da DEFA –a primeira compañía cinematográfica fundada tras a Segunda Guerra Mundial baixo a ocupación soviética e o único estudo cinematográfico en Alemaña Oriental–. As películas que se poderán ver nesta retrospectiva documentan os cambios sociais e políticos da RDA da década dos oitenta, que levaron á reunificación de Alemaña e á caída do muro de Berlín.

A situación de desigualdade das mulleres baixo o réxime socialista, as dificultades das clases traballadoras e a perda da identidade cultural da mocidade, son os temas centrais dunha filmografía brillante. As súas películas, que foxen de consignas políticas e cuestionan o discurso oficial, son sobre todo, un retrato honesto e sen sentimentalismos da complexidade das relacións humanas. Helke Misselwitz acudirá a Tui para presentar as súas películas e falar da súa obra co público do festival.

DANNY LYON

Así mesmo, nesta edición poderase ver a primeira retrospectiva internacional dedicada a Danny Lyon (1942), prestixioso fotógrafo da Magnum, cuxo libro The Bikeriders (1965) está considerado como un dos documentos fundacionais do chamado Novo xornalismo. As súas imaxes da vida carcelaria, do movemento a favor dos dereitos civís e das nacións nativo americanas, son lendarias. Con todo as súas películas, filmadas en 16mm ao longo de 25 anos, permaneceron durante décadas sen poder verse. O programa incluirá algunhas das súas obras realizadas entre 1969 e 1985, e que retratan a vida na fronteira, as comunidades marxinadas de Novo México ou os traballadores ilegais.

Play-Doc presentará tamén en estrea internacional a súa última película SNCC finalizada en 2020 e na que Lyon recrea o apoxeo do movemento polos dereitos civís a través de centos de imaxes nunca antes vistas, capturadas a comezos dos anos sesenta e pertencentes ao seu propio arquivo.

RICHARD P. ROGERS

Tamén en estrea internacional, o festival galego presentará catro películas do realizador norteamericano Richard P. Rogers (1944 – 2001). Ao longo da súa vida artística, Rogers foi un celebrado director e produtor de cinema de non ficción así como un mentor e profesor en Harvard, onde daba clases de fotografía e cinema. O seu afán de coñecemento levoulle por medio mundo, dende as selvas de Nicaragua –onde filmou, xunto a Alfred Guzzetti e Susan Meiselas, a Revolución Sandinista e as súas secuelas–, ata as rúas da Albany de clase traballadora.

Neste programa, comisariado polo director dos Arquivos Cinematográficos de Harvard, Haden Guest, poderanse ver en exclusiva as curtametraxes máis persoais de Rogers, unha sorte de autorretratos nos que o cineasta utiliza a cámara non tanto para rexistrar o mundo como para darlle sentido, analizando de maneira crítica a súa propia vida e a súa arte.

Haden Guest estará presente no festival tudense para descubrir ao público este tesouro saído directamente dos arquivos da prestixiosa universidade norteamericana.

ANTÓNIO CAMPOS

A cuarta retrospectiva desta edición estará protagonizada polo portugués António Campos (1922-1999), cineasta amateur nacido en Leiria, cuxa obra singular, complexa e marxinal, que por moito tempo xulgouse perdida, ocupa hoxe un lugar destacado dentro da historia do cinema Portugués. As súa películas documentais ou de ficción, de marcado carácter etnográfico e antropolóxico, e realizadas practicamente en solitario, rexistran a evolución social, económica e psicolóxica dun país en plena transformación.

Para celebrar o centenario do seu nacemento, Play-Doc presentará en colaboración coa Cinemateca Portuguesa- Museu  do Cinema e o CGAI (Centro Galego de Artes da Imaxe), a primeira retrospectiva española dedicada ao cineasta luso, que supoñerá así mesmo a estrea mundial da súa obra recentemente restaurada e dixitalizada polo ANIM- Arquivo Nacional das Imagens em Movimento.

Play-Doc agradece o apoio e a colaboración a Deutsche Kinemathek in Berlin, a DEFA Film Library en UMass Amherst, ao Goethe-Institut Madrid, ao HFA ( Harvard Film Archive), á Cinemateca Portuguesa- Museu do Cinema, ao ANIM- Arquivo Nacional das Imagens em Movimento e ao CGAI (Centro Galego de Artes da Imaxe).

Está pasando!

sáb23nov10:00Andaina solidaria do Rotary Club de Pontevedraaxuda aos damnificados pola DANA10:00 Lago de Castiñeiras

sáb23nov10:30Ruta guiada 'Mulleres na Historia de Moaña'Descubre Moaña no Outono 202410:30 Moaña

sáb23nov11:30Visita ao mural ‘O río da vida’ da UNED Pontevedra Fundación Manuel Moldes e Concello de Pontevedra11:30 Pontevedra

sáb23nov18:00‘Conversas do primeiro andar’ no Mercado de PontevedraMúsica, libros e viño no Gastroespazo do Mercado 18:00 Pontevedra

VER MÁIS AXENDA