Ensaio do grupo de adultos da Aula de Teatro Municipal | © Concello de Redondela

A Aula de Teatro Municipal de Redondela pon en escena ‘A escaleira’ e ‘A disparatada historia do teatro’

30 Abril 2024

  • A estrea será o domingo 5 de maio, ás 12.30 horas coa obra do grupo xuvenil ‘A disparatada historia do teatro’ e ás 19.30 horas coa peza do grupo de adultos ‘A escaleira’
  • A concelleira de Cultura, Rita Pérez, e o mestre da Aula de Teatro Municipal, Roberto Casal, animan á veciñanza a asistir a estas estreas e a participar nas actividades de teatro en próximos cursos

A próxima fin de semana a Aula de Teatro Municipal de Redondela pon en escena as obras nas que estiveron traballando ao longo do curso. Será o domingo, 5 de maio, no auditorio da Xunqueira. O grupo xuvenil, con rapazada de entre 11 e 16 anos, representará ‘A disparatada historia do teatro’, unha obra orixinal e divertida na que repasarán a historia da dramaturxia desde o comezo da humanidade ata os nosos días.

O seu mestre, Roberto Casal, explica que contarán dun xeito “moi didáctico” a historia do teatro, poñendo en escena o que levan aprendido ao longo do curso “con exercicios e nos ensaios”. A obra “é froito do traballo de todo o grupo, ao longo do curso van achegando ideas, falamos, dámoslle forma entre todos e logo eu encárgome da dramaturxia”, sinala Casal. A obra do grupo xuvenil poderá verse ás 12.30 horas.

No caso do grupo de adultos, con 14 compoñentes que van desde os 23 ata máis de 60 anos, a obra que representarán titúlase ‘A escaleira’. Trátase dun traballo orixinal creado tamén polo propio grupo da aula de teatro no que reivindican “a necesidade de declararnos vulnerables”.

A mensaxe desa obra quere “identificarse co espectador” a través de diferentes escenas nas que actrices e actores rachan cos estereotipos. Roberto Casal explica que esta reflexión nace como resposta á idea xeneralizada durante a pandemia da Covid “de que temos que resistir, ser fortes e aguantar”.

Nesta ocasión o obxectivo é “reivindicar o teatro como un espazo onde amosarnos vulnerables para poder evolucionar”, afirma Casal. ‘A escaleira’ poderá verse ás 19.30 horas.

Desde a concellería de Cultura, a edil Rita Pérez, anima á veciñanza á achegarse ao auditorio para gozar destas pezas teatrais. A concelleira convida tamén á rapazada, adolescentes e adultos a participar nas aulas de teatro, especialmente aos mozos e homes adultos “xa que o alumnado destas aulas é maioritariamente feminino”.

O grupo xuvenil está composto por 5 rapazas e 1 rapaz, e no de adultos son 11 mulleres e 3 homes. Para Casal a escasa presenza masculina débese “a que aos homes cústalles máis traballar o seu lado emocional, porque non estamos educados para expoñer os nosos sentimentos”.

O mestre confía en que “pouco a pouco” este rol vaia cambiando e anima aos mozos a apostar pola aulas de teatro “unha actividade diferente que lles pode ofrecer moitos beneficios”.

Está pasando!

mar21mai10:00mar18:00Navalia, Feira Internacional da Industria Naval en VigoDo 21 ao 23 de maio de 202410:00 - 18:00 Vigo

mér22mai20:30Proxección de 'A quimera' en PontevedraCineclube Pontevedra20:30 Pontevedra

xov23mai19:00Coloquios formativos de prevención de violencia de xénero en SanxenxoCentro de Información á Muller (CIM) de Sanxenxo19:00 Sanxenxo

xov23mai19:15xov20:45Proxección de 'Drive my car' en Vigo'NO CAMIÑO. PELÍCULAS DE ESTRADA, VIEIROS E HORIZONTES'19:15 - 20:45 Vigo

VER MÁIS AXENDA