Unha imaxe do filme ‘Vermiglio’ de Maura Delpero premiado en Venecia

A programación do Cineclube Pontevedra contará en abril coas recentemente estreadas ‘Grand Tour’ de Miguel Gomes e ‘Vermiglio’ de Maura Delpero

26 Marzo 2025

A programación de abril do Cineclube Pontevedra contará con dúas recentísimas estreas. ‘Grand Tour’ (2024), o último traballo do portugués Miguel Gomes, que se alzou no último festival de Cannes co Premio á Mellor Dirección, poderá verse o martes 1.

A nova proposta do portugués é unha arrebatadora viaxe polo sueste asiático, en palabras de Elsa Fernández-Santos «de principio a fin unha oda á beleza que emana de toda tristura, esa saudade portuguesa que este filme eleva a monumento».

O martes 29 será a quenda de ‘Vermiglio’, o último traballo da directora italiana Maura Delpero, que foi gañador do Gran Premio do Xurado no Festival de Venecia de 2024. Un aquel de léxico familiar da directora ambientado nos Alpes italianos e co escenario da Segunda Guerra Mundial ao lonxe, aínda que ben presente na vida das que non van ao campo de batalla: mulleres, crianzas, maiores, mestres ou sacerdotes.

As sesións de filmoteca de abril dedicaránselle ao cineasta brasileiro Leon Hirszman (1937-1987), membro precoz do Cinema Novo e considerado no seu seo como a conciencia política do movemento. Hirszman interesouse por temas queridos pola esquerda na primeira metade dos anos setenta, deulle protagonismo nos seus filmes ao suxeito proletario e expuxo no seu cine os mecanismos de opresión capitalista.

Proxectaranse ‘Eles Não Usam Black-Tie’ (1981) o 7 de abril, unha das grandes triunfadoras do Festival de Venecia de 1981, e o documental ‘ABC da greve’ (1979-1990), cun novísimo Lula da Silva liderando as folgas das grandes fábricas automobilísticas no ano 1979.

Todas as sesións terán lugar ás 20:30 horas no Teatro Principal de Pontevedra.

O Cineclube Pontevedra é unha asociación sen ánimo de lucro cuxo funcionamento e financiamento depende fundamentalmente das achegas económicas que realizan periodicamente as súas socias e socios, cara a quen están dirixidas as súas actividades.

Podes escoller a opción que máis se adapte ás túas preferencias: 70 euros anuais, 25 trimestrais ou 3 euros por pases soltos.

As persoas que desexen asociarse poden facelo calquera día en que haxa proxección ou ben a través do blog da asociación.

MARTES 1 DE ABRIL

‘Grand Tour’ (Miguel Gomes, 2024, Portugal, 129 min., VOSE, Lingua orixinal: portugués, chinés, tailandés, francés, birmano, vietnamita, filipino, xaponés).

Non recomendado para menores de 12 anos.

1917, Birmania. Edward é un funcionario do Imperio Británico destinado en Rangún. Ante a inminente chegada de Molly, a súa prometida, entra en pánico e foxe. Durante a súa viaxe, non obstante, o pánico deixa paso á melancolía.

Contemplando o baleiro da súa existencia, o covarde de Edward pregúntase que será de Molly. Mais Molly, decidida a casar e divertida pola xogada de Edward, séguelle a pista a través de distintos lugares de Asia.

Premio á Mellor Dirección en Cannes 2024.

LUNS 7 DE ABRIL

‘Eles Não Usam Black-Tie’ (Leon Hirszman, 1981, Brasil, 112 min., Brasil, VOSE, Lingua orixinal: portugués).

‘Eles não usam black-tie’ achéganos aos conflitos, as contradicións e os desexos da clase traballadora brasileira de finais dos anos 70, durante a crise final da ditadura militar.

Baseada na obra de teatro homónima de Gianfrancesco Guarnieri escrita en 1950, a película adopta unha narrativa realista que expón solucións antagónicas para a vida dos traballadores: a esperanza no colectivo fronte ás solucións individualistas.

A trama constrúese de maneira conmovedora en torno ao conflito entre un pai militante que defende a acción colectiva e o seu fillo alienado con aspiracións pequeno-burguesas, reflectindo os efectos da loita pola supervivencia no seo dunha familia de clase traballadora.

León de Prata – Gran Premio do Xurado, premios Fipresci e OCIC no Festival de Venecia de 1981.

LUNS 28 DE ABRIL

‘ABC da greve’ (Leon Hirszman, 1979-1990, Brasil, 100 min., VOSE).

Documental que rexistra a primeira folga xeral do Brasil logo da implantación do Auto Institucional núm. 5 polo réxime militar. Na rexión do ABC paulista, o 13 de marzo de 1979 arredor de 180 000 obreiros do sector metalúrxico interrompen a produción conducidos polo sindicato, liderado entón por Luis Inácio «Lula» da Silva.

Filmado en 16 mm e baixo un sistema cooperativo, o filme recolle as imaxes do movemento obreiro das grandes fábricas automobilísticas e multinacionais na loita por mellores salarios e condicións de vida, e en plena construción da súa identidade política.

O proxecto foi concluído postumamente entre 1989 e 1990, trala prematura morte de Hirszman, polo fotógrafo Adrian Cooper e co apoio da Cinemateca Brasileira.

MARTES 29 DE ABRIL

‘Vermiglio’ (Maura Delpero, 119 min., Italia, VOSE, Lingua orixinal: italiano)

Non recomendado para menores de 12 anos.

Finais da Segunda Guerra Mundial en Vermiglio, un remoto lugar nos Alpes italianos. A chegada dun soldado desertor á aldea vai marcar un antes e un despois na vida dos seus habitantes, especialmente na familia do mestre, que verá como cada un dos seus membros se dirixe a un destino inesperado.

Gran Premio do Xurado en Venecia 2024.

Está pasando!

lun31marConsultarXXVI Salón do Libro Infantil e Xuvenil de Pontevedrado 21 de marzo ao 6 de abril de 2025(Consultar: luns) Pontevedra

VER MÁIS AXENDA