© Concello de Bueu

O Concello de Bueu organiza as V Xornadas pola diversidade afectivo sexual

17 Xuño 2022

  • O programa incluirá a lectura dun manifesto, charlas sobre proxectos de diversidade e a proxección dun filme sobre esta temática.
  • Agustín Gallego, edil de mocidade e infancia, salienta que “é importante que as administracións loitemos pola visibilización e a reivindicación das persoas do colectivo LGBTIQ+”.

O Concello de Bueu organiza, como xa vén sendo habitual, as V Xornadas pola diversidade afectivo sexual, cun programa que se desenvolverá o 1 e 2 de xullo e co que se busca crear conciencia sobre a identidade persoal e a liberdade sexual.

Así o salientou o concelleiro de mocidade e infancia, Agustín Gallego, na rolda de prensa celebrada este venres, e na que estivo acompañado de Silvia Carballo, edil de promoción económica e turismo, e do artista local Marc Taeger, que se encargou do pintado e deseño para esta data da fonte dos Xardíns de María Eugenia, na Banda do Río.

Dende o Concello inciden no papel que deben cumprir as administracións públicas na loita polos dereitos das persoas do colectivo LGBTIQ+ e na visibilización da diversidade.

O programa deste ano iniciarase o 1 de xullo, ás 19.00 horas na Sala Multiusos do Centro Social do Mar, coa lectura do manifesto do Concello de Bueu con motivo do Día do Orgullo LGBTIQ+. A continuación, a investigadora Ana Amigo Ventureira presentará o proxecto “Bibliodiversidade”, unha guía que divulga material bibliográfico sobre a diversidade afectivo –sexual co obxectivo de promover o uso destes recursos como ferramenta didáctica nas aulas. Este traballo foi levado a cabo entre setembro e decembro de 2021 no marco do CEXeF, o Centro de Estudos de Xénero e Feministas da Universidade da Coruña. Despois, o IES Johan Carballeira de Bueu presentará o traballo levado a cabo durante este curso no equipo de diversidade do centro, co que recibiron o premio “Escola sen armarios”, concedido dende a Asociación Arelas. A xornada culminará ese día coa presentación do libro ‘Campo de plumas. Poemas LGBT+ para a mocidade dende a Antigüidade ata hoxe’, unha proposta do selo editorial cangués Sushi Books, antologada e traducida por Jesús Castro Yáñez, quen estará acompañado polo editor Moisés Barcia. O libro percorre a lírica ao longo do tempo, e lévanos dende Safo a Mary Jean Chan, a través de versos nos que se dan conta de diversas identidades e orientacións sexuais.

Ao día seguinte, 2 de xullo, o Cineclub Bueu proxectará o filme “Girl” de Lukas Dhont, que se poderá ver ás 21:00 horas no Centro Social do Mar con entrada de balde. O filme conta cunha adolescente de quince anos que naceu sendo un neno e o seu maior desexo é converterse nunha bailarina de elite.

Ademais, xa dende o 28 de xuño, Día do Orgullo LGBTIQ+, colocarase a bandeira no balcón da Casa Consistorial. Así mesmo, e como en algúns anos anteriores, o Concello encargoulle ao artista local Marc Taeger o pintado da fonte dos Xardíns de María Eugenia, que loce dende hai unhas semanas cun deseño colorido que alude e reivindica a diversidade.

Taeger salienta que “o deseño se basea no arco iris, e con ela significamos que somos moitas pezas diversas e xuntas conformamos un conxunto”. Ademais, a concelleira Silvia Carballo remarcou que “do que se trata é de que os espazos e o mobiliario públicos representen e reivindiquen o que nos pasa como sociedade”.

Está pasando!

ven22nov09:00XIII Encontro de Conservación e Restauración en PontevedraA madeira, soporte de bens culturais09:00 Pontevedra

ven22nov20:00Concerto de Abraham Cupeiro en Vilagarcía'resoando no pasado'20:00 Vilagarcía de Arousa

sáb23nov10:00Andaina solidaria do Rotary Club de Pontevedraaxuda aos damnificados pola DANA10:00 Lago de Castiñeiras

sáb23nov10:30Ruta guiada 'Mulleres na Historia de Moaña'Descubre Moaña no Outono 202410:30 Moaña

VER MÁIS AXENDA