Combarro acollerá durante os vindeiros meses gran número de actividades para conmemorar o 50 aniversario

21 Xullo 2022

No ano 1972 producíase o fito do nomeamento de Combarro como Conxunto Histórico. Agora, para conmemorar o medio século desa data de referencia para Poio, o Concello impulsa diferentes actividades lúdicas, pensadas para xente de todas as idades, que axuden a poñer en valor a tradición e a historia da localidade, ao tempo que se pon a disposición á cidadanía unha oferta de lecer do máis variada. As áreas de Cultura, Deportes e Normalización Lingüística xa teñen perfiladas varias destas iniciativas, que comezan neste mes de xullo e se prolongarán ata novembro. Cómpre lembrar que foi o 19 dese mes cando, 50 anos atrás, se levou a cabo este histórico nomeamento.

As concelleiras responsables destes departamentos, as nacionalistas Raquel Rodríguez e Marga Caldas, adiantaron xa varias das citas que terán lugar ao longo dos vindeiros cinco meses. Neste sentido, lémbrase que a programación xa se iniciou a pasada semana, con iniciativas como o concerto a cargo dos e das integrantes do grupo de clarinetes do Conservatorio Profesional de Música de Vilagarcía, un dos máis prestixiosos da provincia, e que contou cunha grande afluencia de público.

Agora, nestas semanas xorden iniciativas como ‘Mar de sons’. Esta é unha ruada musical, na que “terán protagonismo agrupacións musicais de Poio e que se celebrará de xeito periódico ao longo de todo o verán, con percorridos polo casco histórico”, tal e como explicou a titular de Cultura. Ademais, o día 14 de xullo tamén tivo lugar a primeira sesión de ‘FalaRedes’, unha actividade de animación para o público familiar, que chega a través da Rede de Dinamización Lingüística da Xunta de Galicia, co espectáculo ‘O Tranvía Leonardo’ que se completará o día 21 con ‘Picadiscos Marifaltri’; ambos na Praza da Chousa.

Xa en agosto, o sábado día 6 chegará, no espazo natural colindante coa Ermida da Renda, o espectáculo de danza ‘Bailando a Terra’, coa compañía Galicia en Danza de Baiona e en colaboración coa Deputación de Pontevedra. Neste mes tamén cobrará un especial protagonismo o deporte, con dúas grandes probas como son o Campionato do Mundo de Vela da clase Vaurien Worlds 2022, que chegará a Combarro o xoves 11 de agosto, coa participación de preto de 200 regateiros de diferentes países. O domingo 21, pola súa banda, estréase a I Volta a Nado Illa de Tambo, que “nace co obxectivo de consolidarse como unha das citas de natación máis importantes de Galicia”, apunta Marga Caldas. O prazo de inscrición abrirase nos vindeiros días. Ese mesmo día, a Praza da Chousa será escenario do espectáculo de maxia Galicia Ilusiona, que traerá a Poio ao Mago Paco, e que se inclúe dentro da programación do Xacobeo 2021-2022. Previamente, o domingo 14 de agosto, a Praza da Rualeira acollerá o concerto da Ukestra do Medio, ás 21.30, unha actividade que tamén chega a través do ‘FalaRedes’.

Asemade, en agosto tamén permanecerá aberta na Oficina de Turismo de Combarro, na Escola do Campo, a exposición Matriarcas, a través da cal “réndese homenaxe ás nosas antecesoras e ás mulleres que adicaron boa parte da súa vida a traballos relacionadas co mar”. A mostra abrirase do 1 ao 31.

Raquel Rodríguez e Marga Caldas confirman que a programación continuará unha vez finalizado o verán. Así, o 22 de setembro a sede da Comunidade de Montes Rega dos Agros de Combarro acollerá a presentación do libro ‘Tambo. La isla en el tiempo’, de José Manuel Pidre Novás, no que se aborda a historia e evolución desta emblemática paraxe.

Unha vez comezado o curso escolar, tamén se contemplan actividades para levar a cabo co alumnado dos centros educativos do municipio. Esta programación vivirá un gran peche a fin de semana do 18 e 19 de novembro, cando se cumprirán 50 anos do nomeamento de Combarro como Conxunto Histórico. As concelleiras de Cultura e Normalización Lingüística e Deportes fan un chamamento á veciñanza para “gozar destas actividades, coas que queremos poñer en valor un feito histórico e unha localidade que non só é un referente turístico, senón tamén patrimonial, cultural e da tradición do país”.

Programa (PDF)

Está pasando!

sáb23nov10:00Andaina solidaria do Rotary Club de Pontevedraaxuda aos damnificados pola DANA10:00 Lago de Castiñeiras

sáb23nov10:30Ruta guiada 'Mulleres na Historia de Moaña'Descubre Moaña no Outono 202410:30 Moaña

sáb23nov11:30Visita ao mural ‘O río da vida’ da UNED Pontevedra Fundación Manuel Moldes e Concello de Pontevedra11:30 Pontevedra

sáb23nov18:00‘Conversas do primeiro andar’ no Mercado de PontevedraMúsica, libros e viño no Gastroespazo do Mercado 18:00 Pontevedra

VER MÁIS AXENDA