Alberto Garzón, ministro de Consumo | © Ministerio de Consumo

O ministro Alberto Garzón participará en Pontevedra nun debate sobre os límites do crecemento económico

20 Setembro 2022

Post-Growth Innovation Lab promove o luns 26 de setembro, no Edificio Castelao do Museo de Pontevedra, un debate aberto respecto das consecuencias ambientais e sociais dun modelo económico baseado no crecemento e o papel que poden xogar as universidades como xeradoras de pensamento crítico e no que intervirá o economista e ministro de Consumo, Alberto Garzón.

‘Os límites do crecemento e o papel da universidade na transición ecolóxica’ é o título do coloquio que Garzón compartirá co director do Post-Growth Innovation Lab, Mario Pansera, e a directora científica do centro de investigación interuniversitario Ecobas, María Loureiro.

Programado para ás 11.00 horas e aberto ao público, o coloquio será coordinado polo investigador posdoutoral do Post-Growth Innovation Lab David Soto Oñate e contará tamén coa intervención do reitor da Universidade de Vigo, Manuel Reigosa.


O estudo de como poderían funcionar as organizacións, tanto públicas como privadas, nun sistema económico que non se basee nun crecemento continuo constitúe de feito o principal obxectivo do proxecto Prospera, polo que Pansera obtivo a axuda do ERC e é tamén un dos eixos centrais deste coloquio.

A idea, explica o investigador, é pór o foco nas “economías alternativas” e no papel que poderían xogar neste ámbito as institucións de ensino superior. “Tradicionalmente, a universidade era o lugar onde se podía xerar a crítica e o problema é cando esta é un lugar onde se protexe e reproduce a hexemonía cultural do capitalismo”, sinala Pansera, que incide na importancia de que nas institucións de ensino superior exista “un pluralismo na ensinanza dos modelos económicos”, que permita amosar ao alumnado “que hai distintas maneiras de entender a economía e a sociedade”.

Entrada de balde, sen necesidade de reserva previa. O debate poderá seguirse tamén en directo pola rede.


Está pasando!